Kjo javë ka qenë e mbushur me lajme të mira, që na kanë ardhur bashkë me motin e ngrohtë dhe pranveror. Nga arritje të reja në shkencë e kulturë, te iniciativa që sjellin ndryshime pozitive, kemi përzgjedhur pesë lajme që do t’ju japin shpresë dhe energji të mirë.
Le të festojmë së bashku gjërat e mira që po ndodhin rreth nesh!
Në një epokë digjitale si kjo në të cilën jetojmë, një lajm i mirë vjen nga Biblioteka Kombëtare e Kosovës, e cila ka digjitalizuar rreth 1 milion materiale – libra, gazeta, harta dhe dorëshkrime. Ky është një hap i rëndësishëm përpara, duke mundësuar qasje më të lehtë dhe të sigurt për studiuesit dhe publikun.
“Në një epokë digjitale, çdo faqe e digjitalizuar është një hap drejt ruajtjes dhe qasjes së përhershme në dije.”
Po, kemi diçka të bukur për t’ju treguar edhe për fëmijët tanë!
Nëse lajmi për digjitalizimin kishte të bënte me dijen, ky lajm ka të bëjë drejtpërdrejt me të ardhmen tonë – me fëmijët, të cilët çdo ditë i quajmë pasqyra e së ardhmes. Po ndërmerren hapa të rëndësishëm për sigurinë dhe mirëqenien e tyre, duke krijuar kushte më të mira për rritjen dhe zhvillimin e tyre.
Kështu, Komuna e Kamenicës ka ndërmarrë një hap të rëndësishëm për përkujdesjen ndaj fëmijëve, duke siguruar kartelat e sigurimeve shëndetësore në çerdhet publike. Pas sigurimit të ushqimit të shëndetshëm për fëmijët, kjo është një tjetër iniciativë që ka për qëllim të ofrojë mbulim të plotë shëndetësor, duke garantuar kushte më të sigurta dhe të shëndetshme për të vegjlit tanë. Ky projekt, që për herë të parë implementohet në Kosovë, është një hap i madh përpara në përmirësimin e kushteve në institucionet parashkollore. Nëse nuk e keni parë këtë lajm më herët, mund ta lexoni të plotë këtu!
“Fëmijët kërkojnë mbështetje dhe kushte të shëndetshme për të arritur potencialin e tyre.”
Ja një lajm inspirues për t’ju frymëzuar këtë 8 mars!
Dokumentari “Ajo’Mal”, që pasqyron udhëtimin e 20 vajzave përmes maleve të Kosovës, është përzgjedhur për Festivalin Ndërkombëtar të Filmit Mjedisor në Washington, D.C! Ky festival shfaq bukurinë natyrore të Kosovës dhe histori frymëzuese të grave kosovare.
“Ajo’Mal” është më shumë se një dokumentar natyror, është një rrëfim për forcën dhe guximin e grave që sfidojnë çdo kufi. Siç tha alpinistja Uta Ibrahimi: “Jam e emocionuar që ‘Ajo’Mal’ tregon fuqinë e rinisë kosovare.”
Në Ditën Ndërkombëtare të Gruas, ky dokumentar është një festë e forcës dhe guximit të grave kosovare, që po sfidojnë kufijtë dhe po arrijnë maja të reja suksesi.
Ky lajm do të mbushë zemrën tuaj me gëzim dhe shpresë për më të mirën!
Në këtë muaj të shenjtë të Ramazanit, Mitrovica po tregon se solidariteti dhe dashuria për të tjerët janë thelbësore për forcimin e komunitetit dhe ndihmën ndaj atyre që kanë nevojë.
Në rrugën “Mbretëresha Teutë”, një iniciativë e bukur ka nisur: një raft me pitalka falas për qytetarët në nevojë. Ky akt i thjeshtë, por i fuqishëm, është një tregues i forcës së komunitetit dhe shpirtit të bashkëpunimit. Organizatoret, që e kanë bërë këtë me dashamirësi të pastër, dëshirojnë të bëjnë një ndryshim të vërtetë në jetën e atyre që kanë më shumë nevojë.
Ky është një moment që na bën të ndiejmë gëzim dhe solidaritet. Në një kohë kur solidariteti ka rëndësi më shumë se kurrë, ky lajm na tregon se sa e fuqishme është dashuria dhe kujdesi që ndajmë me njëri-tjetrin.
E kemi edhe një lajm të mirë që ka qëndruar në kutinë tonë këtë javë!
Ministria e Kulturës, Rinisë dhe Sportit ka nënshkruar memorandumet e para me federatat sportive për financimin e aktiviteteve vjetore. Deri tani, marrëveshjet janë finalizuar me federatat e Hendbollit, Karatesë, Pingpongut, Notit dhe Triathlonit. Një tjetër hap pozitiv – federatat duhet të dedikojnë së paku 30% të fondeve për aktivitetet sportive të vajzave dhe grave.
Ky është lajmi i fundit për këtë edicion! Gëzuar ditët e mira që po ndodhin përreth nesh, dhe le të vazhdojmë të ndajmë energji pozitive dhe shpresë! /Katror.info
Përgatiti:
