Është enciklopedi digjitale. E tillë që gjendet rrallë në vendin tonë, sidomos me iniciativë vullnetare. Në një shfletim të lehtë të bie në sy gjithëpërfshirja që ka. Kompleksiteti i saj dallohet nga përmbajtja që ofron nga brezi parashkollor e deri te klasa e 9-të.
Madje platforma “Zgjoi.com” e iniciuar nga Agron dhe Kimete Dida është adresë arsimore për lëndë shkencore, artistike e filozofike. E pjesa më atraktive është që kryefjala e saj janë mbi tre mijë video, si mediumi më atraktiv në kohën e pushtimit teknologjik.
Qe shtatë vjet, çifti Dida nuk e ka ndalur aktivizmin e tyre pavarësisht mungesës së përkrahjes nga institucionet, shkollat e mësimdhënësit. Ajo që e mban gjallë këtë iniciativë është entuziazmi i jashtëzakonshëm i tyre, e që i ka bërë të jenë autodidaktë të çdo sfere deri në realizimin e kësaj nisme.
Mundesh me e lexu edhe…
“Thash çka të bëj diçka që kishte me qenë interesant. Së pari mendova me kënd, kush duhet të jetë audienca? Vendosa të jenë fëmijët, për arsye se të rriturve, atyre veç ju ka kalu ‘afati’. Ata munden me mësu nëse duan dhe janë të pjekur mjaft me kuptu si duhet të ecin përpara në këtë drejtim. Por, fëmijët janë ata që kanë më së shumti nevojë që me i mbështet për me zhvillu kulturën digjitale,” shprehet Dida për Katror Media.
Frymëzim për “Zgjoin” u bë vet zonja Kimete, e cila si profesoreshë e teknologjisë kishte tentuar që gjithnjë mësimin ta kombinonte me video herë duke përdorur grafoskop, e së voni edhe projektor.
“Krejt ata që i kam kontaktuar në email, nuk kam dashur t’i bëj presion me telefon, asnjëri nuk m’u ka përgjigjur. Mbet emri “Zgjoi” si bashkëpunim i bletëve, kam punuar veç me Kimeten edhe vetë,” thotë Dida.
Ndoshta “Zgjoi” nuk ka gjetur përkrahje, por ka gjetur vlerësim të lartë nga profesionistët e fushës. Xhavit Rexhaj si udhëheqësi i mësimit online të eShkollorit, të zhvilluar në kohën pandemike, çmon karakteristikat e kësaj platforme.
“Është mirë se është one-stop shop, nëse je i interesuar për arsim e gjen aty, nuk është i shpërndarë në temat tjera, pos digjitalizimit. Arsimin dhe digjitalizimin e ka si tema kryesore. Është mirë se njerëzit që janë të interesuar të jenë mësimndhënës apo prindër të mirë, kanë shumë materiale, të cilat janë në gjuhë angleze dhe janë në trend, të përditësuara,” thotë Rexhaj për Katror Media.
Tutje, ai tregon edhe raste që kjo platformë e ndarë në Website, kanale në YouTube dhe rrjete sociale i ka shërbyer edhe atij si profesor universitar.
“Unë për vete shpesh aty gjej përgjigje edhe për mua, që nuk do të duhej të isha i preokupuar për ato. Fillimisht ndonjë metodologji, për konceptet e arsimit, për qasjet e reja, për konstruktivizmin. Dy tre artikuj jashtëzakonisht të mirë i kam gjetur për qasjet konstruktiviste në mësimdhënie, këto janë krejt trendet ma të reja prej të cilave përfitojmë të gjithë.”
Lajm i mirë përbën fakti se së fundmi platforma e inteligjencës artificiale në Francë, NOLEJ AI, me fokus në arsim, ka kërkuar bashkëpunim me “Zgjoin”. Kjo si përparësi e përmbajtjes, 90% e së cilës është në gjuhën angleze.
“Na thanë se e kemi parë “Zgjoin” dhe ne duam t’ju jepim një lajm shumë të mirë që ekipi ynë ka vendosur që në mes të 30 portaleve në botë edhe “Zgjoi” me qenë njëri prej tyre që të jetë pjesë e sistemit të tyre. Unë po kuptoj që me qenë pjesë e data bazës së tyre, me qenë si një filter në kuadër të filtrimit të informacioneve. (Zgjoi) është i gatshëm, janë 3200 video të zgjedhura me kujdes të cilat kanë përmbajtje të mirë,” tha Dida.
Steam Zgjoi nuk është krijuar veç për nxënësit. Ai iu ofron edhe mësimdhënësve punëtori pedagogjike, linqe edukuese e materiale tjera të mësimdhënies. Ndërkaq për nxënësit ata kanë siguruar literaturë në lëndët ekzakte, sociale, artistike e filozofike.
“Zgjoi” është themeluar në vitin 2015 dhe prej atëherë nuk ka pushuar duke u përditësuar gjithnjë me materiale në trend me kohën.
Edicionin #15 të plotë e gjeni KËTU 🙂
Kliko këtu dhe bonja Follow/pëlqeje Katror.info për me pa veç Lajme të Mira 🙂
Përgatiti:
