Kishin mujtë me punu kudo, me pasë një orar e me u marrë veç me veten, por personazhet e këtij edicioni e tregojnë ma së miri se çka do me thanë me u ba zani i dikujt që nuk dëgjohet ma, ose që të tjerët nuk e kanë lanë me iu dëgju.
Janë këta njerëz që besojnë në drejtësi dhe barazi, prandaj e ngrisin zanin, dalin në protesta e aksione, vetëm e vetëm me pru drejtësi për ato që nuk munden me bo vetë diçka të tillë.
Kjo ditë, si jo pak të tjera, e gjeti Lëvizjen Feministe Studentore (LFS) në protestë për siguri ma të madhe për vajzat.
Mundesh me e lexu edhe…
“Ne nuk do të lejojmë që dhuna të tolerohet andaj nuk do të ndalemi së protestuari për sigurinë tonë,” thotë gjatë protestës Anita Mjeku– Aktiviste e LFS-së.
Studentët kërkuan përjashtimin nga Universiteti i Prishtinës i profesorit të fakultetit të Filologjisë Bekim Bejta, i akuzuar nga disa studente për përdorimin të gjuhës denigruese.
Reagimi i studentëve dhe raportimi i mediave solli rezultat, meqë Universiteti i Prishtinës të martën e suspendoi Bekim Bejtën nga detyra. Kjo u konfirmua nga rektori i Universitetit të Prishtinës, Qerim Qerimi.
“Duke pasur parasysh që ka denoncime të hapura dhe në pritje të një vendimi nga ana e Këshillit të Etikës për të, ne morëm vendimin e sotëm për suspendim efektiv të menjëhershëm,” iu tha Qerimi gazetarëve.
Megjithatë, studentet thonë se nuk do të ndalen deri në plotësimin e kërkesës së tyre për përjashtimin e Bejtës.
“Protestat edhe mobilizimi jonë ka me vazhdu, na nuk kemi me leju që edhe më tutje të rehabilitohen abuzuesit, qysh e ka rehabilitu deri më tash një abuzues Universiteti i Prishtinës,” shprehet Mjeku.
Studentet e Lëvizjes Feministe thonë se ky aktivizëm nuk po i lodh e përpara tij asgjë nuk po i ndal.
“Ka pasur nevojë Universiteti i Prishtinës edhe shoqëria për një lëvizje të tillë që e ngjall aktivizmin si ide, e çon përpara feminizmin si koncept, por njëkohësisht reagon për problemet që i preokupojnë studentët. Nëse kishim mbërri veç me lajmëru dikënd, me njoftu dikënd me konceptin e feminizmit si ide dhe me njoftu me botën e aktivizmit ne e konsiderojmë si sukses tonin të brendshëm,” thotë në një intervistë për Katror.info, Fleta Mujaj.
Njëjtë ndodh edhe me aktivizmin e Rrjetit të Grave të Kosovës (RrGK), që tashmë është bërë një adresë e sigurt për viktimat e dhunës me baza gjinore, ndërsa reagimet me kohë për padrejtësi kanë filluar të dëgjohen më shumë nga institucionet. Besarta Breznica zyrtare e Programit për Adresimin e Dhunës në Baza Gjinore në RrGK rrëfen përvojën e saj.
“Takohemi me viktima të dhunës me bazë gjinore, ofrojmë këshillim ligjor falas, në të njëjtën kohë kemi edhe avokat i cili i përfaqëson në procese gjyqësore. Gjithashtu, kemi edhe monitoruese e cila shkon dhe monitoron seanca të ndryshme penale në gjykata,” shprehet ajo.
Fatmirësisht, pas shumë peripecish, shumica e rasteve të adresuara në Rrjetin e Grave të Kosovës përfundojnë në favor të vajzave dhe grave.
“Kur po flasim për raportime dhe që gratë janë më të informuara për të drejtat e tyre, padyshim këtu ka kontribuar edhe shoqëria civile, posaçërisht organizatat e grave të shoqërisë civile, sepse ato kanë qenë në terren vazhdimisht duke i informuar gratë dhe vajzat për të drejtat e tyre dhe në të njëjtën kohë duke i fuqizu që ato të mos jetojnë në ambiente abusive.”
Besarta fokusimin në aktivizëm për të drejtat e vajzave dhe grave e sheh si diçka të mirë për krejt shoqërinë posaçërisht për gratë edhe vajzat sesa për ndonjë përfitim individual.
“Kur takohesh me vajza edhe me gra të shumta, të cilat i informon ato për procese të ndryshme, dhe kur pas dy apo tri viteve apo edhe më herët vjen një vendim i cili është në të mirë të një gruaje dhe një vajze, padyshim që kjo është një shtysë e madhe për me vazhdu tutje e mos me ndalë aktivizmin,” shprehet Breznica.
E për të na dëshmuar se të drejtat e grave nuk janë çështje që ju takojnë vetëm atyre, por krejt shoqërisë është angazhimi i Ehat Miftaraj nga Instituti i Kosovës për Drejtësi.
IKD-ja brenda vitit ofron për afërsisht 500 deri në 600 raste ndihmë juridike falas ku dominojnë ndihma juridike falas që ka të bëjë me gratë në fushat e ndryshme qoftë civile apo juridike.
“Brenda vitit mund të them që kemi afërsisht 1000 kërkesa, por sigurisht që, jo çdo kërkesë mund të përmbushë kriteret të cilat i ka përcaktuar ligji që mund të përfitojnë ndihmë juridike falas, por që 50-60% e këtyre kërkesave miratohen. Në bazë të statistikave që ne si IKD kemi është fakti që deri më tani nëse i kemi ofruar mbi 3 mijë raste ndihmë juridike falas afërsisht 60% e tyre janë që i takojnë grave dhe mbi 30 apo 35% që ju takojnë komuniteteve jo shumicë në Kosovë apo edhe grupeve të margjinalizuara të cilat në njëfarë forme kanë nevojë për ndihmën e një qendre të specializuar për të garantuar të drejtat e tyre në praktikë.”
Ai mendon se në Kosovë ka aktivizëm qytetar mjaft të zhvilluar.
“Sidoqoftë kjo nuk do të duhet të vetëmjaftonte, por do të duhej që kërkesa për të drejtat e grupeve të margjinalizuara në Kosovë, me theks të veçantë të grave, duhet të jetë prioritet i çdo qytetari, i çdo gjyqtari, i secilit institucion në mënyrë që të mësojmë nga gabimet e institucioneve, gabimeve tona dhe të njëjtat që mos përsëriten,” thotë Miftaraj.
Ai thotë se aktivizmi qytetar është vlerë në botën demokratike dhe ai nuk do të thotë qëtë ngritemi kundër instucioneve të shtetit, të mallkojmë apo të gjykojmë institucionet e shtetit.
“Aktivizmi qytetar nënkupton që në radhë të parë të ngritemi për të drejtat dhe liritë që na ofron Kushtetuta e cila është miratuar nga përfaqësuesit e popullit që janë votuar nga qytetarët.”
Aktivizmi qytetar tregon se veprimet e vogla mund të çojnë në ndryshime të mëdha dhe se heshtja nuk është opsion./Katror.info
Edicionin #4 të plotë e gjeni KËTU 🙂
Kliko këtu dhe bonja Follow/pëlqeje Katror.info për me pa veç Lajme të Mira!
Përgatiti:
