Një artist tetëvjeçar mori ftesën për të ekspozuar pikturat e tij me ujë në një ekspozitë lokale, ku ka arritur të shesë veprat e tij të para.
Kevin Kovacs, një artist autodidakt, nisi të vizatonte që në fëmijëri. Ai u ftua të organizojë një ekspozitë personale në Qendrën e Artit Tacchi-Morris në Taunton, Angli, pasi nëna e tij filloi të shpërndante krijimet e tij në rrjetet sociale, shkruan Good News Network, transmeron Katror.info.
Artisti i ri nga Somerset përcaktoi vetë çmimet për veprat e tij, të cilat do të jenë të ekspozuara deri më 29 prill.
Mundesh me e lexu edhe…
“Jam i lumtur që njerëzit mund të shohin artin tim nëpër mure dhe shpresoj të kem një ekspozitë tjetër në Londër,” shprehet ai.
Kevin ka qenë i rrethuar nga arti dhe kreativiteti që në vegjëli, pasi të dy prindërit e tij janë pasionantë pas fotografisë.
“Bashkëshorti im fotografon natyrën, kafshët dhe peizazhet, ndaj Kevin u rrit mes kamerave dhe ne e inkurajuam të vizatonte që kur ishte foshnjë,” tregon e ëma.
“Ne i blinim çdo lloj materiali – bojëra, ngjyra uji dhe mjete të tjera artistike – dhe mund ta shihja që e shijonte që kur ishte vetëm dy vjeç”, thotë ajo.
“Në moshën pesëvjeçare, Kevin nisi të skiconte, duke marrë frymëzim nga udhëtimet familjare në qytetet bregdetare të Jugperëndimit të Anglisë”, tregon e ëma e tij, Natalia, për agjencinë e lajmeve SWNS.
Ai adhuronte të skiconte ndërtesa dhe, sa herë që ata do të uleshin në një fshat, ai do të ishte duke vizatuar. Pas kësaj, Kevin përdorte telefonin e Nataliës për të bërë foto të rrethinës dhe fillonte të vizatonte ato imazhe që kishte kapur.
Më pas, ai filloi të përdorte ngjyra kur Natalia i tregoi piktura fituese nga konkurse ndërkombëtare. Një vepër e fituar nga India, e mbushur me ngjyra të pasura, ishte ajo që e inspirroi të shtonte ngjyrë në punimet e tij.
Kur njerëzit filluan të shfaqin interes për veprat e Kevin-it, Natalia vendosi të krijojë një faqe në Instagram për të mbledhur të gjitha punimet e tij në një vend: “Më pyesnin vazhdimisht për artin e tij.”
Më pas, një vullnetar nga Qendra e Artit Tacchi-Morris kontaktoi familjen, duke shprehur interes për të organizuar një ekspozitë me veprat e Kevin-it. Ai e pranoi me entuziazëm këtë mundësi.
“Ai është jashtëzakonisht i lumtur. Ishim të pranishëm në ditën e parë të ekspozitës dhe disa njerëz treguan menjëherë interes për të blerë veprat e tij. Është një talent i lindur. Tani është i magjepsur pas anijeve dhe më thotë se i vizaton me lehtësi”, tregon ajo tutje.
“Mbaj mend që disa artistë më kanë thënë se anijet janë të vështira për t’u vizatuar – por për të, duket se është diçka krejt natyrale”, përfundon ajo./Katror.info
Përgatiti:
