Maratona njëjavëshe e Festivalit të Teatrove në Ferizaj me shfaqje, diskutime e koncerte është kurorëzuar me ndarjen e çmimeve, të dielën mbrëma. “Djali” me tekst të Florian Zeller, nën regji të Erson Zymberit dhe me producent Erson Zymberi, është shpallur shfaqja më e mirë e edicionit të 55-të. Por për të nuk ka mjaftuar vetëm ky çmim ashtu sikurse edhe për shfaqjet e tjera.
Çmimi për kostumografinë më të mirë është ndarë për Njomza Lucin, për kostumet në shfaqjen “Prishtina – Vrasja e paralajmëruar e një ëndrre” me tekst të Jeton Nezirajt, nën regji të Blerta Nezirajt.
Çmimin për skenografinë më të mirë e ka marrë Bekim Korça për shfaqjen “13”, atë për rolin më të mirë episodik e ka marrë Aurita Agushi për performancën në shfaqjen “God bless America”. Po nga kjo shfaqje me tekst dhe regji të Fatos Berishës, Çmimin për aktorin më të mirë në rol dytësor e ka marrë Kushtrim Qerimi.
Mundesh me e lexu edhe…
Çmimin për aktoren më të mirë në rol dytësor e ka marrë Hayat Ocilla për interpretimin në shfaqjen “Komedia e zezë” me tekst të Peter Shaffer, nën regji të Ilir Bokshit.
Çmimi “Adriana” për aktoren më të mirë e ka marrë Donika Zeqiri me shfaqjen “13”, me dramatizim e nën regji të Sulejman Rushitit.
Çmimin “Ylli në ardhje” e ka marrë aktori Yzeir Meha për rolin në shfaqjen “Djali”.
Çmimi Special i Festivalit është ndarë për shfaqjen “Prishtina – Vrasja e paralajmëruar e një ëndrre”.
Çmimi “Ismail Rama” për aktorin më të mirë është ndarë për Avni Shkodrën, për rolin në shfaqjen “God bless America”.
Çmimi për regjinë më të mirë është ndarë për Sulejman Rushitin, për regjinë e shfaqjes “13”, produksion i teatrit “Adriana” në Ferizaj. Po kjo shfaqje ka marrë edhe Çmimin e Publikut.
Ka qenë “13” shfaqja me të cilën në ditën e parë të shtatorit u ngrit perdja e ngjarjes teatrore më me traditë jo vetëm në Kosovë. Ajo u shndërrua në mesazh të krejt hapjes, fjalimi kishte kërkesë të qartë për udhëheqësit politikë të institucioneve kulturore, por ajo që ishte parë në skenë ka qenë ironia goditëse edhe ndaj politikës që sot i kthen shqiptarët në vitin 1913, tek tërheq paralele me një shekull pas, e ajo që mbetet është lufta e shqiptarëve me njëri-tjetrin që s’i lë të ecin para.
Gjithsej gjashtë shfaqje kanë qenë konkurrencë për kategorinë kryesore dhe katër kanë ardhur me atë që është quajtur “Youth in the Black Box”. Tradicionalisht teatri “Adriana” ka qenë hapësira qendrore ku ky festival e ka shtrirë programin, e edhe sivjet lokacionet kryesore kanë qenë hapësirat e këtij teatri krahas Galerisë së Arteve.
Kur para dy vjetësh Ministria e Kulturës nuk kishte ofruar përkrahje për këtë festival në ftesën vjetore për përkrahje të projekteve artistike e kulturore, ishte bërë shumë zhurmë brenda komunitetit artistik. Pas reagimeve, Ministria kishte ofruar mbështetje në formë të një memorandumi të bashkëpunimit, mirëpo Festivali i Teatrove në Ferizaj kishte refuzuar ta pranonte ofertën e Ministrisë, duke e konsideruar këtë vendim si “akt qëndrese e solidariteti”.
Sfida më e madhe mbetet sërish mbështetja institucionale për këtë festival. Ndonëse merr mbështetje sivjet nga Ministria e Kulturës dhe nga Komuna e Ferizajt, ajo nuk del të jetë e denjë për formatin e festivalit. Kërkesat për një “ngurtësim” të fondeve për më shumë se një vit, siç theksohet, kanë hasur në vesh të shurdhër deri tani. Pak ditë para nisjes së festivalit, dizajnimi i tij është bërë thuajse i pamundur, nën stresin e organizimit “pa asnjë cent në llogari”./Koha
Përgatiti:
