Kastrioti, djali nga shehri që meritoi titullin e punëtorit sportiv në kryeqytet

Kur po mendoja ta nis’ ta shkruaj këtë profil për Kastriotin, padyshim më erdhën në mend shumë figura që jetojnë e veprojnë në Prishtinë, por edhe shumë të tjerë sportista dhe punëtorë sportivë që nuk janë më në mesin tonë. Sa e sa syresh me vitet të tëra pa u lodhur kanë kontribuar në fushat e blerta, sallat e basketbollit, tavolinat e pingpongut e fushat e tenisit…

Njëri nga ta është sot edhe Kastriot Orana, një djalë modest e punëtor i madh. Në sallën e sportit ku takohemi shpesh me Kastriotin është fjalëpak por gjithmonë i zhurmshëm kur bëhet fjalë për planet në zhvillimin e PRiPing-ut-klubit të pingpongut që e drejton, masovizimin e këtij sporti dhe kontributin e tij edhe në sportet tjera. Po pra, mjafton të diskutohet ndonjë ide e mirë dhe Kastrioti merr përsipër ta realizojë sa çel e mshel syt’.

Kështu ka ndodhur edhe kohët e fundit me nismat mbresëlënse që i ka zhvilluar si sportist por edhe si udhëheqës klubi.

Por si u rrit në aspektin sportiv Kastrioti deri më sot?

Le të shkojmë me radhë…

Kastriot Orana merret me sportin e pingpongut që nga viti 2002, pra tash e dy dekada. I rritur mes familjarësh sportistë të dalluar në moshë të re ka përfaqësuar klubin e pingpngut Prishtina në garat rajonale. Si junior ka përfaqësuar edhe Kosovën në garat evropiane për të rinj, në Itali në Terni (2008).

Duke pasur për pasion punën në zhvillimin e pingpongut, Kastrioti ka shërbyer si anëtar i bordit të Federatës së Pingpongut të Kosovës për 6 vite, ku ka qenë përgjegjës për marrëdhënie ndërkombëtare, PR dhe marketing. Që nga viti 2019 është anëtar i komitetit për marketing në BTTU (Ballkan Table Tennis Union).

Në 2017 eventi i organizuar nga ai për nder të Ditës Botërore të Pingpongut është cilësuar si kremtimi më masiv në botë i ditës së pingpongut, ku Kastrioti është shpërblyer me pajisje sportive të duhura për klubin e pingpongut nga ITTF.

Në vitin 2020, pas përfundimit të mandatit në bordin e Federatës Kastrioti themeloi klubin më të ri në kryeqytet, KPP Priping. Fillimisht shërbeu si sekretar gjeneral e pastaj ne 2021, morri timonin e klubit, duke u zgjedhur kryetar, pozitë të cilën e mban edhe sot.

Aktivitetet e organizuara nga Kryetari i Priping, disa herë janë cituar/publikuar në faqen zyrtare të Federatës Botërore të Pingpongut dhe atë Evropiane si: Dhurimi i gjakut për personat e prekur nga Covid, Organizmi i Javës Evropiane të Sportit, Turneu për vetedijësimin për kancerin e gjirit, aktivitetet në të mirë të qytetarëve të prekur nga tërmetet në Kroaci dhe Shqipëri.

Viti 2022 ka qenë periudhë shumë e sukseshme për Klubin e pingpongut PRiPING të udhëhequr nga Kastriot Orana, ku për të gjitha të arriturat e klubit është vlerësuar edhe si Punëtori Sportiv i vitit nga Komuna e Prishtinës.

Nën drejtimin e Kastriotit PRiPING po shkëlqen e këto janë disa nga organizimet që ka realizuar me sukses:

• Organizator i turneut për personat e shurdhër ku morën pjesë 7 qendra nga gjithë Kosova, të pranishëm mbi 30 lojtarë.
• Ideator dhe organizator i turneut tradicional “PinK Pong Breast Cancer Awareness Table Tennis Tournament” për ngritjen e vetëdijesimit kundë kancerit të gjirit.

• Me KPP Priping organizoi disa ndeshjet derbi te Superligës
• Organizator i eventit Dita Botërore të Pingpongut në sallën e pingpongut ku të pranishëm ishin shumë diplomatë përfshi edhe shefen e zyres kineze në Prishtinë.

• Në bashkëpunim me komunën e Prishtinës organizuan festivalin pranveror në sheshin Xhorxh Bush, ku fëmijët patën mundësi të luajnë pingpong me lojtarë profesionistë;
• Organizoi seancë stërvitore për fëmijët me Syndrome Down të cilët u argëtuan me sportin e pingpongut, dhe treguan se pingpongu është sport për të gjithë;
• Promovoi vazhdimisht sportin e pingpongut.

• Ideator dhe Organizator i turneut Business Ping Pong Tournament;
• Organizoi disa turne të mbyllur për lojtarët e klubit te Prishtinës;
• Organizoi kampe për të rinj si për lojtarët e klubit ashtu edhe për klube të ndryshme të Kosovës, disa nga to me ekspertë të jashtëm;
• Organizoi ndeshje miqësore me KPP As Persa nga Selaniki në Greqi;
• Realizoi vizitën e lojtarëve të klubit Priping në akademinë e pingpongut në Londër;
• Me Priping merr pjesë dhe përkrah shumë kauza në të mirë të fëmijëve dhe sportistëve

• Menaxhoi projektin Table Tennis for all, ku ka involvuar minoritetet në sportin e pingpongut;
• Organizoi turneun e pingpongut “Diaspora” për mërgaten kosovare gjatë veres 2022;
• Asistoi Komitetin Olimpik të Kosovës për organzimin e ditës Olimpike;
• Me Komunën e Prishtinës organzoi Ditën e Fëmijëve;
• Ka udhëhequr klubin Priping drejt titullit të Kupës së Kosovës.

Komisioni vlerësues e pati shumë të lehtë marrë parasysh të gjitha këto aktivitete sportive të udhëhequra nga Kastrioti, për ta shpallur “Punëtori Sportiv i Vitit në Prishtinë”.

Vet Kastrioti u shpreh i lumtur që mes të gjithë punëtorëve sportiv dhe aktivistëve të kryeqytetit ‘rrëmbeu’ titullin e ma të mirit.

Duke pasur parasysh që janë mbi 300 klube në Prishtinë, e qindra punëtorë sportivë, që merren me sport në baza ditore, me të vërtetë po ndihem shumë i lumtur që Komuna e Prishtinës e ka nda këtë çmim për mu. Në vitin 2022 kam organizu dhjetra aktivitete sportive dhe ka qenë një vit me rezultate të sukseshme për Klubin Priping në rrafshin vendor, e në 2023 do të synojmë edhe rezultate pozitive në arenën ndërkombëtare. Kastriot Orana, Kryetar i KPP PRiPING

Vitin 2023 e ka filluar me masovizim të klubeve edhe në rajonin e Prishtinës, duke ndihmuar në ri-aktivizimin e klubit Kosovari, klub ky me traditë në pingpong, por për shkak të kushteve ekonomike pauzoi për disa vite. 

Me më shume aktivistë qytetarë si Kastrioti, sporti kosovar pa dyshim do të arrijë të japë edhe më shumë rezultate ndërkombëtare në të ardhmen. /Katror.info