Përpara se të miratoni ndonjë regjim për humbje peshe, ka të paktën dhjetë gjëra që duhet të dini.
Në realitet, dietat e shpejta ekzistojnë dhe funksionojnë, por jo në planin afatgjatë: ose sepse janë të vështira për t’u mbajtur ose sepse kanë efekte të dëmshme.
Shumë dieta të pa bazuara në asnjë rregull çojnë në humbjen e shpejtë të kilogramëve, por ato janë të pabalancuara.
Mundesh me e lexu edhe…
Shumë proteina shtazore, disa perime dhe fruta, disa yndyra dhe zero karbohidrate (makarona, oriz, bukë).
“Pikëpamja shkencërisht naive është se gjenomi ynë është kryesisht i njëjtë me atë të paraardhësve tanë gjuetarë-mbledhës”, shpjegon Stefano Erzegovesi, specialist në shkencën e ushqimit.
Por miti i “egërsirës” së shëndoshë, të fortë dhe muskuloz nuk e merr parasysh se për arsye mjedisore dhe jo vetëm ushqimore, paraardhësit tanë nuk jetuan gjatë.
Në planin afatgjatë, teprica e mbetjeve azotike dhe efekti pro-inflamator i lidhur me një tepricë të proteinave shtazore çojnë në një ulje të cilësisë dhe kohëzgjatjes së jetës.
Konsideratat për një dietë të karakterizuar nga shumë proteina të çojnë drejt e në pikën e dytë: ndryshe nga ajo që besohet dhe lexohet shpesh, për të humbur peshë, nuk është e nevojshme të hiqen nga dieta të gjitha grupet ushqimore.
“Është mirë të përfshihen të gjitha ushqimet në sasitë e duhura”, nënvizon specialistja Michela Barichella.
Heqja totale ose e pjesshme e karbohidrateve është një gabim sepse si makronutrient nuk janë më kaloritë, pastaj janë të rëndësishme për ndjenjën e ngopjes dhe për energjinë që i japin trupit.
Çdo lëndë ushqyese ka funksionin e vet, përmasat që duhen respektuar janë ato të dietës mesdhetare që përfshin drithërat, veçanërisht ato integrale dhe, nëse doni të humbni peshë, duhet të veproni në sasi, duke reduktuar marrjen e kalorive.
Një konsideratë tjetër e rëndësishme për t’u mbajtur mend është se kur një dietë dështon, kilogramët e humbur gjithmonë rikuperohen, ju peshoni më shumë se më parë.
Mund të duhen disa muaj, por do të ndodhë. Dhe kjo nuk mjafton. Efekti famëkeq “yo-yo” është i dëmshëm: ndryshon metabolizmin e trupit , duke na bërë edhe më rezistent ndaj humbjes së peshës, në një rreth vicioz që është gjithnjë e më i vështirë për t’u thyer.
Më pas vjen faktori tjetër, pas një jete mbipeshë mund të duhen muaj ose vite që trupi ynë të veprojë ndryshe.
“Zakonisht ruajtja e humbjes së peshës gjashtë muaj pas një diete është shumë e ulët. Mund të themi se ia kemi dalë kur objektivi i arritur të ruhet pas 6-12 muajsh. Por nëse i ktheheni të ngrënit si më parë, pesha do të rikthehet”, veçon Barichella.
Humbja e kilogramëve duhet të jetë e qëndrueshme me kalimin e kohës, edhe sepse ata që kanë humbur peshë do të duhet të hanë më pak se më parë pavarësisht se dieta ka mbaruar.
“Një 60-vjeçar që tani peshon 90 kilogramë, por dikur peshonte 130, do të ketë nevojë për shumë më pak kalori në ditë krahasuar me dikë të së njëjtës moshë dhe madhësi që nuk ka qenë kurrë mbipeshë”, vëren Erzegovesi.
“Sigurisht që sasia e ushqimit është thelbësore, por gjëja më e rëndësishme, për ata që duan të ruajnë rezultatet e marra, është cilësia e ushqimit”, dallon Barichella.
Shumë shpesh obezët nuk hanë shumë, por preferojnë ushqime me kalori të larta.
Në vend të kësaj ju mund të hani sasi të mëdha ushqimesh për sa kohë që ato janë të shëndetshme. Formula e duhur është futja e ndryshimeve të qëndrueshme në dietë, bazuar në një dietë të shëndetshme dhe të lehtë për t’u përshtatur gjatë gjithë jetës, një proces jo i thjeshtë për nga zakonet dhe veçanërisht i vështirë nga pikëpamja psikologjike .
Dietat e modës janë kaq tërheqëse për psikikën tonë sepse ne kërkojmë “pilulën magjike” dhe një mënyrë të shpejtë dhe pa dhimbje për të arritur atje.
Në vend të kësaj, ne duhet të punojmë shumë.
“Fatkeqësisht, nuk është e lehtë të respektosh një dietë me kalori të ulëta dhe të ekuilibruara, edhe kur je i ndjekur në mënyrën më të mirë. Duhet shumë përkushtim dhe vullnet: ata që duhet të humbin shumë kilogramë janë njerëz që kanë një dëshirë shumë më të ngutshme për urinë se të tjerët, kërkojnë një shpërblim emocional në ushqim dhe janë të njohur me mbipeshën dhe obezitetin”.
“Për këtë arsye duhet të gjejnë motivimin e duhur dhe të ndihmojnë veten me kënaqësitë që vijnë nga aktivitete të tjera, si sporti”.
Sporti është i nevojshëm.
Stërvitja vepron në trup me mekanizma fiziologjikë të veçantë që favorizojnë humbjen e peshës. Nuk ka humbje të qëndrueshme në peshë nëse nuk shoqërohet me stërvitje adekuate, e cila ndihmon në arritjen e qëllimit të dietës dhe formëson fizikun.
Gjithashtu muskujt përshpejtojnë metabolizmin, duke konsumuar kalori edhe kur jemi në pushim.
Edhe fakti që ndërsa rritemi, lëvizim më pak dhe hamë më shumë është një nga variablat që kushtëzojnë peshën tonë me kalimin e kohës.
Elementi që duhet të kemi parasysh është se pas moshës 40 vjeç do të jetë më e vështirë të humbni peshë.
“Edhe ata që mbeten aktivë, duke filluar nga mosha 30 vjeçare, dekadë pas dekade, humbasin masën muskulore duke e zëvendësuar atë me masë dhjamore”, argumenton Erzegovesi.
Të moshuarit gjithashtu priren të kenë më shumë dhimbje dhe të qëndrojnë më shumë ulur, ata shpesh përdorin ushqimin si rehati emocionale.
Çka çon në favorizimin e një diete të përsëritur me shije shumë të theksuara, për shembull shumë të ëmbla ose shumë të kripura, kështu që edhe sasitë e vogla mund të ndikojnë në marrjen totale të kalorive.
Sakaq, të qenit femër e bën edhe më të vështirë “luftën” me peshoren.
“Në moshën e lindjes së fëmijëve, variacionet hormonale rrisin urinë; në premenopauzë dhe menopauzë, me uljen e estrogjenit yndyra zëvendëson masën e dobët”, shpjegon Barichella.
Marrë nga “Corriere della Sera”, përshtatur për “Albanian Post”./Katror.info
Përgatiti:
