Një studim i ri ka zbuluar prova të shumta që tregojnë se konsumimi i agrumeve lidhet me një rrezik më të ulët të depresionit.
Depresioni klinik prek qindra miliona njerëz në mbarë botën, dhe rreth 70% e tyre nuk i përgjigjen trajtimit me ilaçe. Shkaqet e tij janë komplekse dhe shpesh të vështira për t’u kuptuar. Megjithatë, duke qenë se një dietë e keqe nuk mund të zëvendësohet me medikamente, një shkencëtar vendosi të hulumtojë lidhjen mes ushqyerjes dhe depresionit, shkruan Good News Network, transmeton Katror.info.
Dr. Raaj Mehta, instruktor në mjekësi në Harvard Medical School dhe mjek në Massachusetts General Hospital, ka gjetur prova që konsumimi i një portokalli të madhësisë mesatare mund të ulë rrezikun e depresionit me 20%.
Mundesh me e lexu edhe…
“Po punoja me një postdoktor të shkëlqyer, Chatpol Samuthpongtorn, i cili po hulumtonte literaturën mbi depresionin për një projekt interesant,” shpjegoi Dr. Mehta për Harvard Gazette.
“Gjatë kërkimeve, ai hasi në një studim të vitit 2016 që sugjeronte se agrumet mund të ndikonin në uljen e rrezikut të depresionit”, tha ai.
“Kjo na intrigoi, sepse kishim në dispozicion një grup të dhënash shumë të pasur për ta verifikuar këtë teori. Studimi quhet Nurses’ Health Study II (NHS2) dhe ka nisur në vitin 1989 me synimin për të identifikuar faktorët e rrezikut për sëmundjet kronike te gratë”, shpjegon ai tutje.
“NHS2 përfshin mbi 100,000 gra, të cilat çdo dy vjet ofrojnë informacione të hollësishme për stilin e tyre të jetesës, dietën, përdorimin e ilaçeve dhe shëndetin. Ne e shfrytëzuam këtë bazë të dhënash për të analizuar nëse infermieret që konsumonin më shumë agrume kishin më pak gjasa të zhvillonin depresion krahasuar me ato që konsumonin më pak. Dhe rezultatet e konfirmuan këtë hipotezë”, thekson ai.
Studimi tregoi se, ndryshe nga konsumi i përgjithshëm i frutave dhe perimeve, vetëm agrumet kishin një ndikim të dukshëm. Dr. Mehta hipotezoi se ky efekt mund të lidhet me rritjen e një lloji të veçantë bakteresh në zorrë, të quajtura F. prausnitzii, të cilat ishin më të pranishme tek ata që konsumonin më shumë agrume.
Duke qenë se NHS2 përfshinte vetëm gra, studiuesit analizuan të dhënat edhe për burrat dhe arritën në të njëjtin përfundim: një ulje prej 20% e rrezikut për depresion dhe nivele më të larta të F. prausnitzii në zorrë.
Kur u pyet për mekanizmin e mundshëm që shpjegon këtë efekt, Dr. Mehta sugjeroi se bakteret e zorrëve mund të ndikojnë në prodhimin e neurotransmetuesve si dopamina dhe serotonina përmes ciklit të S-adenosil-L-metioninës. Këto kimikate janë të njohura për ndikimin e tyre në rregullimin e humorit dhe mirëqenies psikologjike.
“Ka gjithnjë e më shumë prova që tregojnë lidhjen mes shëndetit të zorrëve dhe funksionit të trurit, kështu që nuk u befasova nga këto rezultate,” tha ai për Harvard Gazette.
“Megjithatë, nuk e kisha menduar më parë lidhjen midis agrumeve dhe shëndetit mendor. Gjithmonë dëgjojmë se peshku është ‘ushqim për trurin,’ por askush nuk thotë të njëjtën gjë për portokajtë”, shtoi ai.
Një nga pyetjet për të ardhmen është nëse ky efekt është i veçantë për portokallin apo nëse edhe fruta të tjera, si limoni, grejpfruti dhe mandarinat, kanë ndikim të ngjashëm. /Katror.info
Përgatiti:
