Për herë të parë në Kosovë është kryer një ndërhyrje shumë e rrallë kirurgjikale vaskulare – Bypass aorto-bifemoral me graft sintetik “Dacron”.
Lajmi është bërë i ditur nga Shërbimi Spitalor Klinik dhe Universitar i Kosovës (ShSKUK), përmes një njoftimi zyrtar, ku theksohet se ndërhyrja u realizua në Klinikën e Kirurgjisë Vaskulare të Qendrës Klinike Universitare të Kosovës (QKUK).
Sipas ShSKUK-së, operacioni është kryer te një pacient 48-vjeçar, i cili përveç mbylljes së segmentit të poshtëm të aortës abdominale, të shkaktuar nga sëmundja aterosklerotike, paraqiste edhe një anomali shumë të rrallë anatomike. Kjo anomali sipas njoftimit haset në vetëm 0.05 për qind të rasteve në literaturën mjekësore.
Mundesh me e lexu edhe…
“Bëhej fjalë për një rast me rrezik të lartë kirurgjikal për shkak të pozitës jonormale të enëve të mëdha të gjakut dhe obezitetit të pacientit. Pavarësisht kësaj, ekipi mjekësor vendosi që pacienti t’i nënshtrohej operacionit në kushte të anestezionit të përgjithshëm”, thuhet në njoftim.
Operacioni ka zgjatur më shumë se pesë orë dhe është realizuar nga një ekip i përbërë nga Prof. Ass. Dr. Lulzim Vokrri, Dr. Hajriz Rudari, Dr. Ramë Gashani, Dr. Albion Haxhijaha dhe instrumentarja Antigona, ndërsa për anestezionin dhe reanimimin u përkujdes Dr. Flora Marashi me mbështetjen e stafit teknik.
“Pas operacionit janë kryer ekzaminimet kontrolluese, të cilat kanë vërtetuar se intervenimi ka qenë i suksesshëm në tërësi. Pacienti është liruar nga spitali pas dhjetë ditësh, në gjendje shumë të mirë shëndetësore”, përfundon njoftimi i ShSKUK-së. /Katror.info
Përgatiti:
