Punët e shtëpisë i bëjnë mirë shëndetit Me siguri keni dëgjuar njerëz që ankohen për punët e shumta të shtëpisë, por një hulumtim ka treguar se këto aktivitete i bëjnë mirë shëndetit fizik dhe mendor.
Ekspertët këshillojnë që, herën tjetër kur të dëshironi të bëheni aktiv, në vend të palestrës, zhvishni tutat dhe filloni punët e shtëpisë. Jo vetëm që kurseni para, por përfitoni edhe shumë për trupin dhe mendjen tuaj.
Një studim ka treguar se aktivitetet e shtëpisë mund të jenë po aq efektive sa edhe ushtrimet e moderuara.
Mundesh me e lexu edhe…
Revista “Neurology” zbulon se aktiviteti fizik i përditshëm, si pastrimi apo larja e enëve, mund të reduktojë rrezikun e sëmundjes së Alzheimerit, transmeton Katror.info.
Disa përfitime të tjera shëndetësore nga punët e shtëpisë janë:
1. Redukton stresin
Një artikull i publikuar në vitin 2016 në “British Journal of Sports Medicine” thekson se vetëm 20 minuta aktivitet fizik, përfshirë edhe punët e shtëpisë, mund të reduktojnë stresin dhe shqetësimin deri në 20%.
2. Digj kaloritë
Edhe pse nuk duken si ushtrime të mirëfillta, punët e pastrimit janë një mënyrë efektive për të djegur kalori. Për shembull, pastrimi i shtëpisë mund të djegë mesatarisht 205 kalori në orë, dhe akoma më shumë nëse jeni të lëvizshëm.
3. Ndihmon me alergjitë
Pastrimi i shtëpisë nga pluhuri dhe merimangat mund të lehtësojë ose parandalojë alergjitë, përfshirë alergjinë e polenit. Fshirja me fshesë elektrike, larja e perdeve, pastrimi i lavamanit dhe frigoriferit, si dhe largimi i pluhurit nga mobilet, ndihmojnë në kontrollimin e alergjive dhe përmirësojnë cilësinë e ajrit në shtëpi.
4. Përmirëson koncentrimin
Një shtëpi e çrregullt shpërqendron edhe më të fokusuarit prej nesh. Eliminimi i rrëmujës, si grumbulli i rrobave të ndotura apo shporta e mbushur me gjëra të panevojshme, ju ndihmon të përqendroheni më mirë në detyrat e rëndësishme. Një hapësirë e pastër krijon një ambient produktiv dhe ju jep ndjenjën se keni gjithçka nën kontroll.
5. Largon zemërimin
Pastrimi është një mënyrë produktive për të çliruar zemërimin dhe frustrimin. Disa njerëz zgjedhin të pastrojnë pas një dite të gjatë në punë ose pas një konflikti, duke shmangur veprime apo fjalë të panevojshme.
Fshesa elektrike mund të jetë aleati juaj më i mirë për të menaxhuar emocionet dhe për të qetësuar mendjen. Pra, herën tjetër kur ndiheni të tensionuar, merrni mjetet e pastrimit – është mirë për ju, për shtëpinë tuaj dhe për shëndetin tuaj. /Katror.info
Përgatiti:
