Inxhinierët e Universitetit Northwestern kanë krijuar një “pacemaker” aq të vogël sa mund të futet në majën e një shiringe dhe të injektohet në trup pa prerje, sipas një studimi të publikuar në Nature, shkruan GoodNewsNetwork, përcjell Katror.
I përshtatshëm për zemra të të gjitha përmasave, pajisja është veçanërisht ideale për zemrat delikate të foshnjave të sapolindura me defekte kongjenitale.
Pacemaker-i është më i vogël se një kokërr orizi dhe bashkëpunohet me një pajisje të butë, fleksibile dhe të veshshme që vendoset në gjoksin e pacientit. Kur kjo pajisje ndjen një rrahje të parregullt, lëshon dritë për të aktivizuar pacemaker-in.
Mundesh me e lexu edhe…
Pulset e shkurtra të dritës depërtojnë nëpër lëkurë, kockë dhe muskuj për të kontrolluar ritmin e zemrës.
Pajisja është projektuar për përdorim të përkohshëm – dhe pasi të mos jetë më e nevojshme, tretet vetë brenda trupit. Të gjitha përbërësit e saj janë biokompatibilë, duke shmangur plotësisht nevojën për operacion të dytë për nxjerrje.
“Për aq sa dimë, kemi krijuar pacemaker-in më të vogël në botë,” tha John A. Rogers, profesor në Kirurgji Neurologjike dhe Inxhinieri.
Igor Efimov, profesor në Kardiologji, shtoi: “Rreth 1% e fëmijëve lindin me defekte të zemrës. Fatmirësisht, pas një operacioni, shumica kanë nevojë për stimulim vetëm për disa ditë. Por ato ditë janë kritike. Tani mund ta vendosim këtë pajisje të vogël direkt mbi zemrën e foshnjës, pa pasur nevojë për ndërhyrje tjetër për ta hequr.”
Në vend të baterive tradicionale, pajisja përdor një qelizë galvanike – dy metale që reagojnë me lëngjet trupore për të prodhuar rrymë. Aktivizohet me dritë infra të kuqe, që depërton lehtësisht në trup dhe ndez një çelës të vogël brenda pajisjes.
“Nëse vendosni një dritë nën pëllëmbën e dorës, mund ta shihni që kalon përmes. Trupi ynë është një përçues i shkëlqyer drite,” tha Efimov.
Pavarësisht përmasave të saj (1.8 mm gjerësi, 3.5 mm gjatësi dhe 1 mm trashësi), pajisja prodhon të njëjtin stimulim si një pacemaker i zakonshëm.
“Me këtë madhësi, e thjeshtojmë shumë procedurën, ulim rrezikun dhe eliminojmë nevojën për operim të dytë,” përfundon Rogers./Katror.info
