Më 2 gusht, Sheshi Skënderbeu në Prishtinë do të shndërrohet në një skenë operistike nën qiellin e hapur, ku do të kulmojë edicioni i pestë i Festivalit Ndërkombëtar të Operës “Rame Lahaj” (RLIOF). Mbrëmja Gala “Rame Lahaj & Friends” pritet të sjellë një ndër ngjarjet më të rëndësishme kulturore të vitit, me pjesëmarrjen e disa prej emrave më të njohur të skenës operistike ndërkombëtare.
Në këtë mbrëmje përmbyllëse do të ngjiten në skenë sopranoja e famshme gjeorgjiane Nino Machaidze, bassi italian Dario Russo, si dhe vetë themeluesi i festivalit, tenori kosovar me famë ndërkombëtare Rame Lahaj. Nën drejtimin e dirigjentit të njohur Roberto Rizzi Brignoli, artistët do të interpretojnë një repertor të përzgjedhur me kujdes nga veprat më të njohura të operës botërore.
Mbrëmja Gala vjen si përmbyllje e një edicioni që këtë vit mban moton “Endrra Pa kufi”, duke synuar të promovojë muzikën si një gjuhë universale që tejkalon çdo ndarje. Në frymën e kësaj ideje, RLIOF do të bashkojë në skenë artistë nga kultura të ndryshme për të dhënë një mesazh uniteti përmes artit.
