Federata Angleze e Futbollit (FA) ka njoftuar se të gjitha biletat e disponueshme të ndeshjes Angli – Shqipëri, duel i cili zhvillohet në mitikun “Wembley” të Londrës, janë shitur.
Anglia do të presë Shqipërinë në ndeshjen e parë të kualifikueseve të Kupës së Botës 2026 në Londër, më 21 mars, me fillim nga ora 20:45.
Stadiumi kombëtar i Anglisë, “Wembley”, ka një kapacitet prej 90 mijë vendesh, të cilat do të jenë të mbushura me mbështëtes të të dyja ekipeve në duelin e marsit.
Mundesh me e lexu edhe…
Kujtojmë se biletat për sektorin mik, atë të Shqipërisë, u shitën të gjitha brenda pak orësh nga publikimi i tyre.
Përballja mes Anglisë dhe Shqipërisë do të jetë e para për të dy ekipet në kualifikueset e Kupës së Botës 2026.
Shqipëria nuk ishte shumë me fat në shortin për Kupën e Botës, duke e ditur se vetëm ekipi i parë në grup kualifikohet direkt në Botëror, ndërsa vendi i dytë kalon në play-off. Kuqezinjtë janë pjesë e Grupit K, së bashku me Anglinë, Serbinë, Letoninë dhe Andorrën.
Anglia do të vijë në këtë duel për të nisur një epokë të re nën dreitmin e Thomas Tuchel-it, i cili pasoi Gareth Southgate-n në krye të “Tre Luanëve”.
Nga ana tjetër, Shqipëria do të vijë për të vijuar projektin Sylvinho. Pas kualifikimit të fundit në Euro 2024, kuqezinjtë synojnë një kualifikim të parë historik në një Kupë Bote.
Anglia është skuadra më e fortë në grupin e kuqezinjëve dhe kjo është e kuptueshme se përse. Ajo ka në përbërje disa nga lojtarët më të mirë në botën e futbollit si Jude Bellingham, Harry Kane, Phil Foden, Bukayo Saka, Declan Rice apo dhe Trent Alexander-Arnold.
Vlera në treg e ekipit të Anglisë i kalon 1 miliard euro (sipas grumbullimit të fundit të ekipit), duke qenë skuadra më e vlefshme në futboll aktualisht, mbi Francën, Brazilin dhe Portugalinë (Shqipëria gjendet në vendin e 53, rreth 92 milionë euro).
Kuqezinjtë dhe “Tre Luanët” kanë gjashtë përballje të mëparshme mes tyre, të gjashta që vijnë në kualifikueset për Kupën e Botës dhe të gjashta kanë pasur vetëm një fitues: Anglinë.
Përballja e parë ka qenë më 8 mars 1989, ku kuqezinjtë u mundën 0-2 në Tiranë, ndërsa ajo e fundit më 12 nëntor 2021, ku “Tre Luanët” fituan 5-0 në Londër me golat e Harry Kane (3), Harry Maguire dhe Jordan Henderson.
Në total, kuqezinjtë kanë shënuar vetëm një gol në këto gjashtë përballje dhe kanë pësuar 19./Katror.info
Përgatiti:
