Fëmijët janë arkitektët e së ardhmes dhe mënyra se si ata ushqehen dhe mbështeten gjatë viteve të formimit ndikon shumë në potencialin e tyre si të rritur.
Duke e pasur parasysh këtë, UNICEF-i në Kosovë është edhe dera e shumë mundësive për të rinjtë, duke u ofruar atyre një platformë për eksplorim, zhvillim të aftësive dhe angazhim në fusha të ndryshme profesionale dhe sociale.
Hanë Ilazi, koordinatore e programeve për të rinjtë, në një intervistë për Katror Media, tha se projektet e UNICEF, përveç rritjes së potencialit të të rinjve, po kontribuojnë edhe në adresimin e sfidave të tyre duke bërë që zëri i tyre të dëgjohet.
Mundesh me e lexu edhe…
“Në Kosovë, kjo organizatë si pjesë e këtij programi, ose kësaj shtylle, ne kemi tri fokuse kyçe, të cilat kanë të bëjnë e para me lehtësimin e tranzicionit të të rinjve për kalimin nga edukimi në punësim, zhvillimin e shkathtësive të ndryshme të shekullit 21, përmes të cilave pastaj ata mësohen si të bëhen agjentë të ndryshimit në komunitetet ku ata jetojnë dhe e treta ka të bëjë me ofrimin e platformave të ndryshme, që këta të rinj të rrisin aktivizimin e tyre vullnetar, por edhe pjesëmarrjen në platforma të ndryshme, ku këta mund të shprehin zërin e tyre dhe të adresojnë nevojat dhe sfidat që këta i kanë, të cilat lidhen kushtimisht me jetën e tyre”, thekson Hana.
Këto tri fokuse janë platformat të cilat u japin qasje dhe mundësi depërtimi të rinjve në disa dimensione.
“E kemi programin e Kosovo Generation Unlimited, e cila është një platformë shumë sektoriale, që tash në këtë vit, është nën udhëheqjen edhe të Ministrisë së Financave, Punës dhe Transfereve. Ne iu ofrojmë mundësi të rinjve që të qasen në punë praktike për një periudhë tremujore, përgjatë të cilës ata kanë mundësi të ngritin shkathtësitë e tyre në profesione të ndryshme dhe njëkohësisht të eksplorojnë pak a shumë një mjedis të punës e si funksionon. Përmes këtij programi të rinjtë arrijnë që të ekspozohen në tregun e punës të fitojnë shkathtësi të caktuara specifike konform fushës ku ata angazhohen dhe njëkohësisht t’i japim mundësi vetes në njëfarë forme që të angazhohen pastaj tutje edhe në entitete të tjera në vazhdim, pra është njëfarë forme një mënyrë edhe orientimi në karrierë për të rinjtë, duke marrë për bazë kalimin prej edukimit në punë dhe ndoshta mungesën e ndërlidhjes së kërkesave të tregut të punës me shkathtësitë të cilat ata i fitojnë në sistemin e edukimit”, thotë ajo.
Përmes programve të ofruara nga UNICEF, të rinjtë mund të fitojnë shkathtësi për tregun më bashkëkohor të punës, si dhe njëkohësisht kontribuojnë në mirëqenien e përbashkët shoqërore, si dhe bëhen pjesë e vendimmarrjes në mënyra të ndryshme.
“Kjo lidhet normalisht direkt prapë me punën vullnetare dhe aktivizmin qytetar të të rinjve kur ne kemi për shembull brendapërbrenda UNICEF-it, një prej platformave kyçe që, lidhet me grupin referues të të rinjve të UNICEF-it (YRG). Ky është një grup i të rinjve gjithëpërfshirës, pra përfshijnë të rinj nga komunitete të ndryshme dhe prapavija të ndryshme, të cilët përfaqësojnë zërin e të rinjve dhe nevojave të tyre në informimin e programeve të UNICEF-it, por edhe në informimin e politikave të ndryshme lokale dhe qendrore përkrah UNICEF-it. Ne kemi programe të ndryshme, të cilat kanë për qëllim ngritjen e shkathtësive të mendimit kritik, shkrimit dhe leximit medial, ngritjen e shkathtësive për avokim social, ngritjen e shkathtësive të gjelbra ose që lidhen me mbrojtjen e mjedisit dhe kështu me radhë, por që të gjitha në bazë e kanë angazhimin e të rinjve vullnetarë dhe ngritjen e aktivizmit qytetar nga ana e tyre”, shton Hana.
Ky grup referues i të rinjve ka filluar në vitin 2019 dhe ka nisur përmes angazhimit të disa asamblistëve të rinj në procesin e zhvillimit të një analize të situatës së grave dhe fëmijëve në Kosovë, ku për herë të parë është përfshirë edhe zëri i të rinjve në këto perspektiva.
Të rinjtë, të cilët iu bashkuan grupit referues të UNICEF-it, në vitin e fundit kanë pasur mundësi që të adresojnë sfidat dhe nevojat e të rinjve të Kosovës jo vetëm në nivel lokal dhe qendror, por edhe në platforma të ndryshme rajonale dhe globale.
Olsa Domi, studente dhe aktiviste e programeve të ndryshme të UNICEF iu bashkua edhe Grupit Referues të të Rinjve, ku në kuadër të punës vullnetare me këtë grup ajo pati mundësinë që të adresojë shumë sfida e problematika të bashkëmoshatarëve të saj.
“Në këto programe kam pasur mundësinë e qasjes me mundësi të ndryshme për realizimin e projekteve të ndryshme që na insistojmë si të rinj në këtë mënyrë jemi njoftu me aktivitete të mrekullueshme që na janë ofruar neve. Grupi referues i të rinjve pra është një platformë dhe një hapësirë shumë e mirë për të adresuar të gjitha problemet dhe sfidat me të cilët ne si të rinj ballafaqohemi në përditshmërinë tonë në Kosovë dhe personalisht ka qenë një ndjenjë shumë e mirë dhe një privilegj shumë i madh që të ndihmojë bashkëmoshatarët e mi për një përfaqësim sa më të mirë të këtyre adresimeve dhe që bashkë me kolegët t’i synojmë zgjidhjet e këtyre problematikave”, shprehet Olsa.
Përvoja e Olsës kaloi përtej adresimit të sfidave, ajo pati rastin edhe të përfaqësojë të rinjtë në nivel ndërkombëtar duke u bërë zëri i tyre përmes projekteve specifike.
“YRG-ja, përveç kësaj mundësie që na ka ofruar, gjithashtu na ka mundësuar edhe qasjen në evente të ndryshme jo vetëm lokale, por edhe rajonale dhe ndërkombëtare siç janë Eventi evropian i të rinjve që mbahet në Parlamentin Evropian në Strazburg çdo vit. Pjesëmarrja në atë vend ka qenë një privilegj shumë i madh dhe një mundësi e mirë për të fasilituar punëtori për gjithëpërfshirje. Gjithashtu një event tjetër shumë i rëndësishëm ka qenë edhe eventi i samitit të Ballkanit Perëndimor që mbahet në Bruksel, gjithashtu edhe aty kam pasur mundësinë që të përfaqësojë zërin e të rinjve të Kosovës, duke adresuar kështu çështje që lidhen me gjithëpërfshirjen dhe arsimimin në Kosovë dhe gjithashtu së fundi është bërë një hulumtim në nivel të Kosovës rreth fushës së orientimit në karrierë dhe të gjitha statistikat që kanë dalë nga ky hulumtim janë prezantuar kështu në një raport të nivelit ndërkombëtar.”
Edhe Edi Miftari anëtar i këtij grupi shprehet se puna vullnetare në UNICEF përveç zhvillimit të shkathtësive i ka ndihmuar atij me fushën të cilën ai e studion edhe në formësimin e personalitetit dhe gjetjen e fushës së interesit të tij.
“Duke qenë se jam pjesë e shumë organizatave dhe trajnimeve të ndryshme, pjesë e Grupit Referues të të Rinjve (YRG), kam qenë pjesë prej vitit 2029, kur kam marrë vesh për këtë grup, dhe prej asaj kohe jam anëtar i rregullt i trajnimeve të ndryshme dhe kampanjave të ndryshme të UNICEF-it”, thotë ai.
Ky grup i të rinjve aktivistë inkurajojnë punën vullnetare për më shumë përfshirje dhe zhvillim të të rinjve.
“Puna vullnetare është diçka që çdo i ri duhet ta ketë prioritet në momentin kur ekziston sadopak energjia dhe vullneti për të përmbushur një synim atëherë pse jo, secili nga ne mund të jetë një përfaqësues i përmbushur i njëri-tjetrit ne mund të mësojmë nga njëri-tjetri dhe imperfeksionet na bëjnë perfekt, prandaj inkurajoj çdo të ri që ka sadopak vullnet dhe energji që të bëhet pjesë e gjitha programeve vullnetare që mundësohen për ne, pasi janë mundësi të mrekullueshme”, shprehet Olsa.
”Filloni mu marrë me punë vullnetare, nëse nuk dini se ku me vazhdu karrierën, vazhdoni me ndjek trajnime të ndryshme”, shprehet Edi.
Ndërsa Hana angazhimin vullnetar e sheh të një rëndësie të veçantë për zhvillimin e tyre social, ekonomik e më gjerë.
“Unë mendoj që është shumë e rëndësishme që të rinjtë në momentin që e kanë mundësinë dhe kanë platformat, të cilat veçse i kanë të mundur të angazhohen në to të shfrytëzojnë këtë moment që jo vetëm të rrisin në njëfarë forme potencialin e tyre dhe të mësohen përgjatë procesit se si duhet t’i adresojmë këto nevoja, por që gjithsesi në mënyrë që të zhvillohet edhe aspekti social edhe aspekti ekonomik dhe të gjitha fushat që prekin jetët e tyre. Është tejet e rëndësishme që të të rinjtë të jenë ata që i shtyjnë përpara sfidat dhe nevojat e tyre dhe kërkojnë me këmbëngulësi që ato të adresohen”, thotë Hana.
Si pjesë e programeve, të cilat mbështesin angazhimin e të rinjve në punë vullnetare dhe aktivizëm qytetar, UNICEF-i ka mbështetur edhe zhvillimin e kornizës ligjore në bashkëpunim me Ministrinë e Kulturës, Rinisë dhe Sportit qysh nga viti 2016 kur ka hyrë në fuqi Udhëzimi administrativ për rregullimin e punës vullnetare të të rinjve, një kornizë e cila për herë të parë është prezantuar në Kosovë, që e rregullon punën vullnetare rinore. Si pjesë e kësaj, po ashtu UNICEF ka mbështetur zhvillimin e platformës Kosovës Volunteers, e cila është platforma e parë e këtij lloji që ka mundësuar lidhjen e të rinjve vullnetarë me ofruesit e punës vullnetare dhe njohjen apo certifikimin e kësaj pune. E duke qenë kështu puna vullnetare e të rinjve shkon jo vetëm në të mirë të komunitetit, por edhe në rritje personale të karrierës së tyre. /Katror.info
Edicionin #48 të plotë e gjeni KËTU 🙂
Përgatiti:
