Tetë mënyra për të qenë më të lumtur këtë vit, sipas shkencës

Disa njerëz janë thjesht më të lumtur se të tjerët. Por, pavarësisht nëse jeni ai tipi që këndon në dush dhe vallëzon në shi, apo jeni më tërhequr dhe serioz, lumturia nuk është diçka që na ndodh automatikisht. Ne të gjithë mund të ndryshojmë zakonet tona për të sjellë më shumë lumturi në jetën tonë.

Ja disa nga këshillat më të mira nga BBC për një vit më të lumtur në 2025.

Miqësia në moshën e tretë, burim lumturie dhe shëndeti

Miqësia është veçanërisht e rëndësishme në moshën e tretë, duke sjellë përfitime unike që ndryshojnë nga marrëdhëniet familjare, të cilat shpesh bazohen në detyrim. Miqësitë, si marrëdhënie vullnetare dhe jo të detyruara, janë më argëtuese dhe më pak të tensionuara.

Edhe pse krijimi i miqësive të reja mund të jetë sfidues për të moshuarit, përvoja jetësore dhe pjekuria e bëjnë këtë proces më të lehtë. Përveç përfitimeve psikologjike, miqësia përmirëson funksionet njohëse dhe shëndetin fizik, duke qenë po aq e rëndësishme sa lidhjet familjare për mirëqenien në moshën e tretë.

Praktikoni ‘bashkëlumturinë‘

Dashamirësia është themeli i njohur i një miqësie të vërtetë. E rrjedhur nga latinishtja që do të thotë ‘dhimbje e përbashkët’, kjo ndjeshmëri na ndihmon të krijojmë lidhje të forta kur miqtë tanë kanë nevojë për ndihmë.

Por ekziston një gjendje e kundërt, relativisht e panjohur dhe po aq e rëndësishme ‘bashkëlumturia’, siç ka shkruar David Robson për BBC-në.

Që do të thotë ‘lumturi e përbashkët’, kjo është një aspekt i nënvlerësuar i marrëdhënieve të mira dhe mund të jetë po aq e rëndësishme sa dhembshuria për ruajtjen e miqësive, sugjerojnë disa studime.

Të mbështesësh entuziastisht një lajm të mirë të një miku dhe të bësh pyetje në lidhje me të është një bazë për të qenë një mik i mirë. Të reagosh shumë pasivisht ose ta minimizosh në mënyrë aktive suksesin e mikut mund të rrezikojë marrëdhënien.

Bëni punë vullnetare

Është thuajse një klishe të thuhet se të bësh diçka për të tjerët të bën të ndihesh më mirë se sa të shpërblesh veten, por sa më shumë që mësohet për altruizmin, aq më shumë duket se kjo është e vërtetë.

Studimet kanë zbuluar madje se vullnetarizmi mund të ndihmojë edhe me probleme serioze si dhimbjet kronike dhe depresioni. Për shembull, një studim i vitit 2002 zbuloi se vullnetarët që ndihmonin të tjerë me dhimbje kronike panë një ulje të ndjeshme të intensitetit të dhimbjeve të tyre gjatë kohës që bënin vullnetarizëm.

Studime të tjera kanë treguar se kujdesi për kafshët mund të përmirësojë shëndetin tonë, dhe kujdesi për bimët shtëpiake mund të na ndihmojë të lulëzojmë, sidomos në pleqëri.

Disa ofrues shëndetësorë tani madje përshkruajnë punën vullnetare si një formë veçanërisht efektive të ‘përshkrimit social’: përshkrime që lidhin njerëzit me burime dhe aktivitete të komunitetit. Për shembull, dërgimi i njerëzve në klasa arti, grupe çiklizmi ose grupe mbështetëse dhe ndihma për ushqim dhe faturat e ngrohjes janë gjithnjë e më shumë të provuara si ndërhyrje të vlefshme shëndetësore që gjithashtu mund të zvogëlojnë presionin mbi shërbimet shëndetësore.

Lidhu me të parët nga trungu familjar

E kaluara mund të ndihmojë të tashmen. Hulumtimet tregojnë se angazhimi me historinë e familjes ka përfitime të mëdha psikologjike. Historitë familjare për kapërcimin e sfidave mund të jenë frymëzuese.
Susan M. Moore, profesore e psikologjisë në Universitetin e Teknologjisë Swinburne, zbuloi se njerëzit që njohin më shumë për historinë e tyre familjare kanë nivele më të larta të mirëqenies. Kërkimi për pemën familjare na ndihmon të ndiejmë më shumë kontroll mbi jetën dhe të kuptojmë më mirë vendin tonë në botë.

Kjo na jep edhe perspektivë dhe mirënjohje, duke ditur se jeta jonë sot është e mundur falë përpjekjeve të të parëve tanë.

Shkruaj një listë

Të numërosh bekimet është këshillë e vjetër, por funksionon. Shkruani një listë me tre gjëra të mira që ju kanë ndodhur qofshin ato ngjarje madhore si kalimi i një provimi të rëndësishëm, apo momente të vogla si takimi me një mik të vjetër. Studimet tregojnë se kjo ushtrim i thjeshtë mund të përmirësojë humorin dhe mirëqenien tuaj.

Shijo pritjen e aktiviteteve argëtuese

Shkencëtarët kanë zbuluar se pritja e një aktiviteti argëtues mund të jetë po aq e kënaqshme sa edhe vetë aktiviteti. Eksperimente me minj që “mësonin” të prisnin shpërblime treguan se ata bëheshin më optimistë. Kjo sugjeron se edhe njerëzit mund të përfitojnë duke planifikuar dhe duke pritur me kënaqësi aktivitete të ardhshme, duke ndihmuar në rritjen e optimizmit.

Mos bëj asgjë

Ndonjëherë, përpjekja e tepruar për të qenë të lumtur mund të jetë pengesë. Studimet tregojnë se dëshira e madhe për lumturi mund të çojë në zhgënjim dhe ndjenja vetmie.

Iris Mauss psikologe, rekomandon një qasje më stoike dhe pranimin e natyrës së paqëndrueshme të jetës.

Kufizo kafeinën

Një filxhan kafe mund të ndihmojë gjatë ditëve të ftohta, por është e rëndësishme të mos e teproni. Kafeina përmirëson përqendrimin dhe ka disa përfitime shëndetësore, por konsumimi i tepërt ose në kohë të papërshtatshme mund të prishë gjumin dhe të shkaktojë ankth.

Shkencëtarët sugjerojnë që filxhani i fundit i kafesë të pihet rreth 8 orë para se të flini dhe të mos tejkaloni 2-3 filxhanë në ditë. /Katror.info