TikTok ka nisur një epokë të re të marketingut, një epokë që e vë në plan të parë origjinalitetin, kreativitetin dhe angazhimin e përdoruesit. Gen Z, me preferencat e tyre unike dhe ndikimin e jashtëzakonshëm në platformë, po e udhëheq këtë transformim digjital. Markat që përshtaten me këto ndryshime dhe përfshijnë TikTok në strategjitë e tyre të marketingut janë më të përgatitura për sukses në epokën digjitale. Gjersa platforma po vazhdon të evoluojë, ndikimi i TikTok në marketingun digjital pritet të rritet, duke e bërë atë platformë thelbësore për markat që përmes saj t’i arrijnë audiencat e reja.
Viteve të fundit, TikTok është shfaqur si fenomen kulturor, duke ripërcaktuar mënyrën se si njerëzit konsumojnë dhe angazhohen me përmbajtjen në internet. Kjo platformë që përmban video të shkurtëra, jo vetëm që ka tërhequr vëmendjen e miliona njerëzve, por gjithashtu ka revolucionarizuar peizazhin e marketingut digjital. Gen Z, brezi i njohur për natyrën e tij të teknologjisë dhe preferencat unike, ka luajtur rol kyç në formësimin e TikTok në një mjet të fuqishëm marketingu.
TikTok, i lansuar në vitin 2016, fitoi shpejt popullaritet dhe sot numëron me mbi 1.7 miliardë përdorues në mbarë botën. Natyra e tij varet në videot e shkurtra, tërheqëse që përfshijnë llojllojshmëri temash, nga sfidat e kërcimit e deri te mësimet e gatimit. Algoritmi i TikTok është aq mirë i menduar, duke u paraqitur përdoruesve një Feed të kuruar, bazuar në interesat e tyre, kësisoj duke mbajtur shikuesit duke naviguar për orë të tëra.
GenZ: Forca lëvizëse
Gjenerata Z, që shpesh përkufizohet si të lindurit midis 1996 dhe 2012, është një grup demografik që u rrit me internetin, telefonat inteligjentë dhe mediat sociale. Ata njihen për vërtetësinë e tyre, dëshirën për t’u shprehur lirshëm dhe kundërshtimin e reklamave tradicionale. TikTok, me përmbajtjen e tij të krijuar nga përdoruesit dhe stilin e papërpunuar, përputhet në mënyrë të përkryer me preferencat e Gen Z.
Ky brez është rritur në një botë digjitale, duke i bërë ata të flasin rrjedhshëm gjuhën e mediave sociale. Ata janë të aftë të filtrojnë përmes përmbajtjes, ta njohin autenticitetin dhe të gravitojnë drejt asaj që duket më reale.
TikTok fokusohet më tepër në përmbajtje reale sesa në reklamat e rafinuara. Markat po përdorin këtë prirje duke krijuar përmbajtje autentike, që ndërlidhen me Gen Z, i cili vlerëson ndershmërinë dhe transparencën.
Marka të shumta të mëdha e kanë vërejtur ndikimin e Gen Z në TikTok dhe kanë filluar t’i përshtatin strategjitë e tyre të marketingut në përputhje me realitetin e ri që TikTok ka krijuar.
Markat botërore kanë përqafuar TikTok
Edhe markat botërore po përqafojnë TikTok. KFC ka përdorur TikTok si një platformë për fushata dhe sfida të ndryshme marketingu për t’u angazhuar me audiencën e saj. Këto fushata në TikTok zakonisht përfshijnë promovimin e produkteve të KFC, prezantimin e artikujve të rinj të menusë dhe inkurajimin e përmbajtjes së krijuar nga përdoruesit në lidhje me markën.
Një shembull mjaft i njohur është “KFC Chicken Dance Challenge”. Në këtë sfidë, përdoruesit u inkurajuan të kërcejnë dhe të krijojnë video që shfaqin kovën ikonike të KFC. Pjesëmarrësit shpesh vendosin rrotullimin e tyre unik në kërcim, duke e bërë atë një mënyrë zbavitëse dhe argëtuese për të promovuar produktet e KFC.
Nike shfrytëzoi TikTok duke krijuar sfidën #YouCantStopUs. Kjo fushatë e Nike ilustron bashkimin e sfidave të rrëfimit dhe hashtag-eve. Marka ftoi përdoruesit të ndajnë video të arritjeve të tyre personale, duke shfaqur shpirtin luftarak dhe atletik. Kësisoj duke e vënë mesazhin e Nike për këmbënguljen dhe tejkalimin e sfidave në qendër të fokusit. Kjo fushatë rezonoi me audiencën e TikTok dhe promovoi një imazh pozitiv të markës.
NBA është tejet e pranishme në TikTok, duke ndarë pikat kryesore, përmbajtje prapaskenash dhe sfida unike. Ata angazhojnë tifozët duke i inkurajuar ata të marrin pjesë në sfida, ku përdoruesit shfaqin aftësitë e tyre të driblimit në basketboll. Kjo qasje ndërvepruese ndihmon për t’i mbajtur tifozët të interesuar në ligën.
Një tjetër kompani është Red Bull, i njohur për sportet ekstreme dhe pijen energjike, kompani që ndan përmbajtje të mbushura me aksion në TikTok, duke shfaqur trike dhe aventura ngazëllyese. Ata gjithashtu angazhohen me influencerë të sporteve ekstreme për të krijuar përmbajtje tërheqëse që lidhet me audiencën e tyre të synuar.
Markat në Kosovë e Shqipëri duhet të jenë në hap me TikTok
Marrë parasysh ndikimin dhe rritjen e performancës që mund të vijë nga TikTok, markat nga Kosova dhe Shqipëra duhet të ecin në hap me zhvillim e TikTok. Duhet të marrin mësime nga brendet botërore si Nike, NBA, Red Bull, e shumë të tjerë nëse duan të ndërtojnë strategji efektive të marketingut digjital.
Kështu për të qenë më afër audiencës, dhe për të identifikuar përvojat dhe interesat e grupeve të synuara, markat në Kosovë dhe Shqipëri duhet të kenë parasysh të kuptojnë audiencën e vet. Kompanitë dhe markat në hapësirat shqip-folëse duhet t’i hulumtojnë dhe kuptojnë audiencën e tyre në TikTok, cilat janë interesat, sjelljet dhe preferencat e tyre.
Mbedhja e këtyre të dhënave do t’i ndihmojë të krijojnë përmbajtje që lidhet me ta. Autenticiteti është çelësi.
Një metodë e mirë për t’iu qasur audiencës është përdorimi i hashtags përkatës më trend, për ta rritur zbulueshmërinë e përmbajtjes suaj.
Identifikimi i hashtags viral në TikTok dhe asaj se çka po ndodhë përbrenda fushës suaj dhe inkorporimi i tyre në postimet tuaja, rrit mundësitë që audienca të lidhet me përmbajtjen tuaj reklamuese.
Krijuesit e marketingut digjital duhet të jenë çdoherë të përditësuar me trendet dhe sfidat, që janë virale në TikTok. Ata duhet të jenë pjesëmarrës të sfidave përkatëse dhe të krijojnë sfida të reja, por duke u siguruar që të përputhen me identitetin e markës.
Përmbajtja duhet të jetë argëtuese. TikTok është platformë argëtimi. Duhet ta gjeni thelbin që përmbajtja juaj të jetë argëtuese, tërheqëse dhe vizualisht e kapshme, për të tërhequr vëmendjen e përdoruesve, që ta mbajë audiencën të angazhuar me përmbajtjen tuaj.
Me jetën dinamike, njeriu i sotëm digjital s’ka mjaftueshëm vëmendje t’i ndjekë përmbajtjet e gjata. Videot në TikTok duhet të jenë të shkurtra, kështu që përcillni mesazhin tuaj shpejt. Synoni për video që janë 15 deri në 60 sekonda të gjata.
Ndikimi i TikTok në marketing është i pamohueshëm, me Gen Z që udhëheq rrugën dhe riformëson industrinë, duke e ndërruar kështu rregullat e vjetra të “lojës’ së marketingut tradicional.
Zhvendosja drejt autenticitetit, përmbajtjes në formë të shkurtër, sfidave, partneriteteve me ndikim dhe kreativitetit ka hapur rrugë të reja për markat për t’u lidhur me audiencën e tyre.
Gjersa TikTok vazhdon të evoluojë, e me shumë aplikacione në ardhje në dritaren e pafundme të teknologjisë, mundësitë e marketingut digjital nuk do të njohin kufi, duke e bërë përdorimin e Tiktok, por edhe të rrjeteve tjera sociale, platforma kyçe për markat që synojnë t’i rrëmbejnë zemrat dhe mendjet e brezit të ardhshëm./Katror.info
Ky artikull është shkruar ekskluzivisht për Katror.info, dhe si i tillë nuk mund të kopjohet/publikohet pa ndjekur rregullat etike gazetareske.
Përgatiti:
