Kjo është një çështje krenarie kombëtare, ku ekipe të zgjedhura me kujdes kalojnë vite të tëra duke u trajnuar me përkushtim për të arritur nderin më të lartë në fushën e tyre. Qëllimi i tyre është të përfaqësojnë vendin në skenën globale, duke vënë në pah aftësitë dhe përpjekjet që i bëjnë ata të dallohem ndërkombëtarisht.
Jo, nuk është Kupa e Botës në futboll. Është Kupa e Botës në Pastiçeri.
Ky event bienal sjell konkurrentë nga vende si Egjipti, Mauritiusi dhe Koreja e Jugut, në një garë të ëmbël ku ekipet konkurrojnë për të krijuar ëmbëlsira të papërsëritshme, shkruan CNN, transmeton Katror.info.
Konkursi i këtij viti u mbajt më 20 dhe 21 janar 2025.
Çdo ekip përbëhej nga tre anëtarë – secili specialist në çokollatë, akull, dhe sheqer.
Detyra e tyre ishte të krijonin tri ëmbëlsira që do të përfaqësonin vendin e tyre: një ëmbëlsirë të ngrirë, një ëmbëlsirë restoranti e cila mund të shoqërohej me një garniturë speciale në tavolinën e jurisë dhe një krijim artistik nga çokollata.
Dhe kishin vetëm pesë orë për të përfunduar gjithçka.
Kuzhinierët e pastiçerive mbështeteshin te përbërësit dhe dizajnet për të theksuar delikatesat kulinare të vendeve të tyre. E
kipi nga Kina krijoi një dragua të ndërlikuar prej sheqeri, ndërsa konkurrentët nga Meksika përdorën çokollatë, misër dhe produkte të tjera vendase për ëmbëlsirat e tyre.
Në garë, pjesëmarrësit jo vetëm që përfaqësonin vendet e tyre përmes shijes, por edhe përmes veshjeve të veçanta. Ekipi i Kinës mbante aksesorë festivë, ndërsa ai i Francës kishte veshur bluza me shirita bretonë dhe kapela elegante.
Kuzhinierët nga Meksika u paraqitën me maska të frymëzuara nga Dita e të Vdekurve, ndërsa ekipi britanik përgatiti ëmbëlsirat e tyre me kapela tradicionale dhe papion.
Fituesit
Edhe pse eventi i vitit 2025 u mbajt në Lion të Francës, ekipi francez nuk arriti të fitonte medaljen e artë, duke u renditur i dyti.
Çmimi i parë shkoi për kampionët në fuqi, Japoninë. Ekipi japonez përgatiti një granita me limon, dardhë, marigold dhe çokollatë, e formuar në formën e një flete Asanoha (kërpi) për ëmbëlsirën e restorantit.
Për ëmbëlsirën e ngrirë, ata paraqitën një trajtim me kajsi që ngjante me një lodër tradicionale japoneze.
“Kemi përfshirë historinë dhe kulturën e Japonisë në dizajn. Arritëm të ndërthurim shije dhe modele tradicionale delikate për të shfaqur teknikat tona,” tha kuzhinieri Masanori Hata, eksperti i çokollatës në ekip.
“Nuk e mbaj mend momentin kur fituam. Isha aq i habitur dhe nuk mund ta besoja. Japonia u njoh për herë të dytë radhazi, jam i lumtur dhe krenar”, thotë ai.
Ndërkohë, ekipi francez përgatiti një seri vezësh nga çokollata, të mbushura me mus çokollatë-lajthie dhe të shoqëruara me akullore të pjekur me vanilje dhe një konfit mandarine.
Ekipi nga Malajzia zuri vendin e tretë, rezultati më i lartë ndonjëherë për këtë vend nga Azia Juglindore.
Ata fituan pikë të larta për ëmbëlsirën e ngrirë, të cilën e përshkruan si “një përzierje harmonike e agrumeve të gjalla, kajsive të ëmbla dhe erëzave delikate,” një homazh për trashëgiminë multikulturore të vendit.
Fituesit e Kupës së Botës në Pastiçeri 2025
- Japonia
- Franca
- Malajzia
- Kina
- Belgjika
- Italia
- Koreja e Jugut
- Singapori
- Mbretëria e Bashkuar
- Argjentina. /Katror.info
Përgatiti:
