Ecja e përditshme me rreth 7,000 hapa mund të jetë e mjaftueshme për të përmirësuar funksionin e trurit dhe për të mbrojtur organizmin nga një sërë sëmundjesh serioze, sipas një studimi të publikuar në “The Lancet Public Health”.
Ky numër, më i ulët se objektivi i zakonshëm prej 10,000 hapash, mund të jetë një qëllim më i arritshëm për shumë njerëz, dhe studimi sugjeron se ai lidhet me uljen e ndjeshme të rrezikut nga sëmundje si sëmundjet e zemrës, kanceri, demenca dhe depresioni, shkruan BBC, përcjell Katror.info.
Përfitimet nga ecja me 7,000 hapa në ditë përfshijnë:
- Sëmundjet kardiovaskulare – rënie e rrezikut me 25%
- Kanceri – rënie me 6%
- Demenca – rënie me 38%
- Depresioni – rënie me 22%
“E kemi krijuar idenë se duhet të ecim 10,000 hapa në ditë, por kjo nuk është mbështetur nga prova shkencore,” tha Dr. Melody Ding, autorja kryesore e studimit.
Mundesh me e lexu edhe…
Origjina e shifrës 10,000 hapa lidhet me një fushatë marketingu në Japoni në vitet 1960, ku u prezantua pedometri i quajtur “manpo-kei”, që do të thotë “matës i 10,000 hapave”.
Studimi analizoi të dhëna nga mbi 160,000 të rritur në mbarë botën, duke konfirmuar se edhe ecja me 4,000 hapa ka përfitime më të mëdha sesa një stil jete me vetëm 2,000 hapa në ditë.
Megjithatë, për shumë sëmundje, përfitimet më të mëdha arrihen rreth shifrës 7,000 hapa, ndërsa shtimi i mëtejshëm i hapave sjell përfitime të tjera sidomos për shëndetin e zemrës.
Ekspertët theksojnë se ndjekja e numrit të hapave mund të jetë një mënyrë praktike dhe më e kuptueshme për njerëzit sesa udhëzimet aktuale që bazohen në minuta aktiviteti fizik. OBSH, për shembull, rekomandon 150 minuta aktivitet aerobik të moderuar në javë, ose 75 minuta aktivitet intensiv.
“Numërimi i hapave mund të ndihmojë njerëzit të shpërndajnë aktivitetin fizik gjatë ditës,” shtoi Dr. Ding, duke përmendur se disa persona që notojnë, çiklizojnë ose kanë kufizime fizike mund të ndjekin forma të tjera të aktivitetit.
Ekspertë të tjerë, si Dr. Daniel Bailey nga Brunel University dhe Dr. Andrew Scott nga University of Portsmouth, pajtohen se 10,000 hapa nuk është një shifër e domosdoshme. Ata theksojnë se çdo rritje e aktivitetit fizik është pozitive, dhe njerëzit nuk duhet të shqetësohen nëse nuk arrijnë një numër fiks çdo ditë./Katror.info
