Zbulohen 2 mijë fragmente statujash bronzi në qytetin antik të Metropolisit në Turqi

Në një zbulim arkeologjik të jashtëzakonshëm në qytetin antik të Metropolisit, që ndodhet në qytetin e Izmirit në Turqi janë gjetur rreth 2 mijë fragmente statujash prej bronzi nga periudha antike.

Gërmimet po kryhen në kuadër të projektit “Heritage to the Future Project” të Ministrisë së Kulturës dhe Turizmit në Turqi, nën drejtimin e Serdar Aybek, profesor i Arkeologjisë në Universitetin Dokuz Eylul, dhe në bashkëpunim me Fondacionin Sabanci, shkruan Albanian Post.

Arkeologët kanë zbuluar prova të shumta të civilizimeve që nga vendbanimet e para në periudhën e vonë të neolitit deri në periudhën klasike, nga periudha helenistike deri te periudhat romake, bizantine dhe osmane, në qytetin antik të Metropolisit, i njohur gjithashtu si “Qyteti i Hyjneshës Mëmë”, ku gërmimet kanë vazhduar që nga viti 1990.

Në këtë qytet të lashtë, ku janë bërë shumë zbulime, janë gjetur fragmente të rëndësishme në një zonë që mendohet se ka shërbyer si një “një punishte e vjetër hekurish”.

Sipas “Arkeonews” – faqe lajmesh ku trajtohen temat arkeologjike – Aybek theksoi se fragmentet e statujave prej bronzi u gjetën në një cep të hapësirës së njohur si “një punishte e vjetër hekurish”, ku ato ishin copëtuar për t’u shkrirë dhe ishin ruajtur në sasi të mëdha.

“Zbulimet përfshijnë pjesë statujash nga periudha helenistike dhe figura nga periudha romake. Deri tani kemi zbuluar afërsisht 2 mijë fragmente statujash prej bronzi”, ka thënë ai.

Ai theksoi rëndësinë e copëzave të statujave prej bronzit, duke thënë se “grumbullimi dhe riciklimi i statujave në antikitetin e vonë ofron prova konkrete në Metropolis. Ndër zbulimet e copëzave të statujave janë pjesë si kokat, sytë, gishtat dhe sandalet.”

Aybek sqaroi se gjatë antikitetit të vonë, me braktisjen e besimeve mitologjike dhe dominimin e krishtërimit në rajon, statujat prej bronzi nga periudhat mitologjike u shkatërruan.

“Edhe pse nuk kemi ende prova arkeologjike për të konfirmuar këtë supozim, mund të themi se një pjesë e madhe e statujave u ripërdorën për prerjen e monedhave. Në atë periudhë, në vend që të prodhoheshin materiale të reja, statujat e dëmtuara ose të vjetruara u copëtuan dhe u përgatitën për t’u shkrirë”, shtoi ai.

Fragmentet mund të jenë pjesë e statujave të ndërtuara për të nderuar bamirësit e listuar në mbishkrimin “Metropolitan Apollonios”, sipas Aybek, i cili theksoi për rëndësinë historike të statujave prej bronzi në antikitet.

Përveç fragmenteve të statujave, arkeologët kanë zbuluar pllaka bronzi katrore dhe drejtkëndëshe që mendohet se përdoreshin për hedhjen dhe riparimin e statujave, duke sugjeruar se Metropolisi mund të ketë qenë një qendër për krijimin ose riparimin e statujave prej bronzi./Katror.info