Tridhjetë ekipe studentësh nga Kosova, Shqipëria, Maqedonia e Veriut dhe Iowa po marrin pjesë në Konkursin Ndërkombëtar të Mbrojtjes në Cybersecurity 2025, i cili po zhvillohet në hollin e fakulteteve teknike të Universitetit të Prishtinës, organizuar në bashkëpunim me Universitetin Shtetëror Amerikan, shkruan Kosova Press.
Studentët kanë shprehur kënaqësinë për mundësinë që u është dhënë për të marrë pjesë në këtë konkurs, ndërsa shprehin besimin se do të arrijnë të fitojnë. Megjithatë, ata theksojnë se eksperienca e re që po fitojnë do t’i ndihmojë për të siguruar një vend në tregun e punës në të ardhmen.
Profesori Blerim Rexha nga Fakulteti i Inxhinierisë Elektrike dhe Kompjuterike dha më shumë detaje rreth këtij konkursi. Ai tha se Universiteti i Prishtinës përfaqësohet me katër ekipe, të cilat do të fitojnë eksperienca të reja në fushën e sigurisë kibernetike.
Mundesh me e lexu edhe…
Profesori nga Tetova, Festim Halili, tha se ky konkurs është shumë i rëndësishëm për të fituar njohuri të reja mbi mbrojtjen e të dhënave dhe sigurinë kibernetike. Po ashtu, studentët nga Tirana po marrin pjesë në këtë konkurs. Profesoresha në Universitetin e Tiranës, Edlira Martiri, tha se ata presin të arrijnë objektiva të rëndësishëm nga ky konkurs, si njohja me sulmet reale.
Studentja Vlera Islami nga Fakulteti i Inxhinierisë Kompjuterike tha se eksperienca e saj e re do t’i shërbejë shumë në karrierën e saj të ardhshme në tregun e punës. Ndërkohë, një tjetër student i Fakultetit të Inxhinierisë Elektrike dhe Kompjuterike, Malsor Abdyli, tha se kjo është hera e dytë që merr pjesë në këtë konkurs. Ai theksoi ndikimin pozitiv të këtij konkursi, duke shpjeguar se pas pjesëmarrjes në vitin e kaluar, ai arriti të hyjë në tregun e punës dhe të bëhet pjesë e industrisë së sigurisë kibernetike.
Ky konkurs ofron mundësi të shkëlqyera për studentët që të shfaqin aftësitë e tyre dhe të fitojnë eksperiencën praktike të nevojshme për të pasur sukses në industrinë e sigurisë kibernetike./Katror.info
Përgatiti:
