Me thirrjen e “Thuaj JO qeseve plastike!”, një iniciativë e mbështetur nga GIZ Kosova, po synon të sjellë ndryshime të rëndësishme në politikat mjedisore të vendit, shkruan Katror.info
Përmes një kornize të re ligjore të miratuar në bashkëpunim me institucionet vendore, synimi është që të reduktohet ndjeshëm përdorimi i qeseve plastike, të cilat kanë krijuar probleme serioze për natyrën dhe shëndetin publik.
Qeset plastike, edhe pse janë të njëpërdorimshme, qëndrojnë në mjedis deri në 300 vjet dhe janë ndër llojet më pak të riciklueshme të plastikës. Konsumi mesatar prej 335 qeseve për person në vit e ka renditur Kosovën ndër vendet me përdorimin më të lartë në Evropë, duke kontribuar në ndotjen e rrugëve, lumenjve dhe peizazheve natyrore. Si rezultat i një analize të thelluar mbi ndikimin e tyre në mjedis, është hartuar një kornizë ligjore që parashikon masa të qarta për reduktimin e qeseve plastike dhe nxitjen e përdorimit të alternativave të qëndrueshme.
Mundesh me e lexu edhe…
Sipas kësaj kornize, Kosova synon që deri në fund të vitit 2024 ta ulë përdorimin e qeseve plastike në 180 për person në vit, ndërsa deri më 2030 në vetëm 40. Ndalohet prodhimi, importi dhe shitja e qeseve me dorëza deri në 25 mikron dhe atyre okso-degraduese, ndërsa për qeset nga 25 deri në 50 mikron vendoset një çmim minimal prej 0.05 euro, ku 0.02 euro do të kalojnë në buxhetin e Kosovës. Lejohet vetëm përdorimi i qeseve plastike të biodegradueshme dhe të kompostueshme, të cilat duhet të jenë të certifikuara dhe nuk i nënshtrohen taksave.
Zyra e GIZ Kosova e ka cilësuar këtë hap si një sukses të përbashkët dhe një shembull pozitiv të bashkëpunimit ndërmjet institucioneve dhe partnerëve ndërkombëtarë. “Përmes kësaj iniciative, Kosova tregon se është e gatshme të përballet me sfidat mjedisore dhe të ndërmarrë hapa konkretë për një të ardhme më të gjelbër. Ndalimi i qeseve plastike është më shumë se një akt simbolik – është një investim në shëndetin dhe mirëqenien e brezave të ardhshëm,” thuhet në postimin e GIZ në Facebook.
GIZ thekson se ndërgjegjësimi qytetar dhe veprimet individuale janë thelbësore për suksesin e kësaj nisme. Qytetarët ftohen të shmangin përdorimin e qeseve plastike dhe të zgjedhin alternativa të riciklueshme apo biodegraduese, duke kontribuar në mbrojtjen e mjedisit dhe zvogëlimin e ndotjes. Fushata është një kujtesë se ndryshimi fillon me zgjedhje të përditshme dhe me angazhim të përbashkët për një Kosovë më të pastër./Katror.info
Përgatiti:
