Pas takimit me Konjufcën, deklarohen nënkryetarët e partive politike

E përditësuar 13:46

Pas takimit të thirrur nga kryetari në detyrë i Kuvendit të Kosovës, Glauk Konjufca, përfaqësues të partive politike kanë shprehur qëndrimet e tyre rreth procesit të konstituimit të Kuvendit dhe hapave të mëtejshëm për formimin e institucioneve të reja të vendit.

Ministrja e Drejtësisë në detyrë dhe nënkryetarja e Lëvizjes Vetëvendosje (LVV), Albulena Haxhiu, deklaroi se qëndrimet e partisë ndaj subjekteve të tjera politike mbeten të pandryshuara dhe se hetimet për manipulimet me votat e mërgatës janë duke u zhvilluar nga Prokuroria Themelore. “Të gjitha veprimet tona kanë qenë publike dhe transparente. Deri në seancën konstituive janë edhe shtatë ditë. Qëllimi ynë është konstituimi i Kuvendit, dhe ajo që dihet deri tani është emri i kryeministrit”, tha Haxhiu, duke aluduar në Albin Kurtin. Ajo bëri të ditur se Kurti ka ftuar LDK-në në takim për nesër ose pasnesër, për të diskutuar rreth formimit të institucioneve.

Nga ana tjetër, nënkryetari i Partisë Demokratike të Kosovës (PDK), Uran Ismaili, u shpreh se formimi i qeverisë i takon partisë fituese të zgjedhjeve. Ai nuk pranoi të komentojë nëse PDK do të pranonte një ftesë për bashkëpunim nga LVV, duke e cilësuar pyetjen si hipotetike. “Nëse partia e parë nuk arrin ta formojë qeverinë, atëherë ne si parti e dytë jemi të gatshëm të marrim përgjegjësinë. Duhet ndjekur hapat me radhë, brenda kornizës kushtetuese”, tha Ismaili.

Nënkryetarja e Lidhjes Demokratike të Kosovës (LDK), Doarsa Kica-Xhelili, deklaroi se takimi i thirrur nga Konjufca ishte procedural dhe kishte për qëllim koordinimin për seancën konstituive. Ajo nënvizoi se është jetike që institucionet të formohen sa më parë, për të shmangur vonesat që dëmtojnë qytetarët.

Gjithashtu Kica-Xhelili deklaroi se qëndrimet e LDK-së nuk kanë ndryshuar, as pas ftesës së kryetarit të Lëvizjes Vetëvendosje, Albin Kurti, për t’u konsultuar lidhur me konstituimin e Kuvendit të Kosovës.

Kica-Xhelili, para gazetarëve, tha se letra i është dorëzuar kryetarit të LDK-së, Lumir Abdixhiku, dhe se i mbetet atij të përgjigjet për këtë ftesë.

“Sikurse keni parë, letra i është drejtuar kryetarit të LDK-së, Lumir Abdixhiku, dhe rrjedhimisht mbetet te kryetari Abdixhiku të kthejë ose jo një përgjigje zyrtare lidhur me atë nëse e pranon një ftesë të tillë për diskutim. Kjo nuk nënkupton asgjë në raport me qëndrimet tona ndaj Vetëvendosjes”, tha Kica-Xhelili.

Seanca konstituive e Kuvendit është planifikuar të mbahet më 15 prill, ndërsa po shtohen përpjekjet për ndërtimin e bashkëpunimeve të mundshme që do të çojnë drejt krijimit të qeverisë së re./Katror.info

E përditësuar – 12:59 – Përfundon takimi i Konjufcës me partitë politike, ndahen ulëset në Kuvend

Kryeparlamentari i legjislaturës së tetë të Kuvendit të Kosovës, Glauk Konjufca në një deklaratë për media pas mbledhjes me përfaqësuesit e partive politike për seancën konstituive.

Konjufca ka thënë se përfaqësohen interesat e Kosovës e jo personalet. Sipas tij, interesat e shtetit arrihen me bashkëpunim.

“Demokracia dhe politika e kërkon këtë, duke u bërë bashkë të lidhen forcat dhe të vihet një doktrinë e përbashkët për interesat shtetërore. Shprehje të rënda ka pasur edhe nga opozita edhe për mua, por mua nuk më ka mbetur hatri dhe ia zgjati dorën e bashkëpunimit secilit që pajtohemi se mund të bëjmë diçka bashkë për interesat e shtetit tonë”, ka deklaruar Konjufca.

Konjufca ka shtuar se plani B është koalicioni sepse synim kryesor ka qenë që Qeveria të formohet vetëm nga LVV, por që nuk u arritën 500 mijë vota.

“Në këtë mbledhje caktohen ulëset ashtu siç kanë qenë në legjislaturën e kaluar, njëjtë edhe për deputetët e komuniteteve joshumicë. Në mes ulet Vetëvendosja, krahu i djathtë dhe i majtë siç kanë qenë në dy krahët, LDK dhe PDK. Dallimet janë të vogla me legjislaturën e tetë sepse gjatë legjislaturës e kemi miratuar një rregullore të re, aty kemi specifiku normat për legjislaturën e nëntë. Gjithçka ka shkuar mirë”, ka deklaruar Glauk Konjufca pas takimit me përfaqësuesit e partive.

LVV-ja sipas tij nuk e ka caktuar akoma emrin e kryetarit të Kuvendit.

“Kur jemi tek Qeveria është e pamundur pa koalicion që e krijon një mazhorancë që i bën 61 vota. Këtu e kisha futë edhe emri i Kryetarit të Parlamentit. Ende nuk kemi një emër të qartë”, ka deklaruar ai.

Ftesa ishte për kryetarë, mbledhja u zhvillua me përfaqësues të partive.

E përditësuar: 12:25 – Konjufca takohet me nënkryetarët e partive politike para konstituimit të Kuvendit

Kryetari në detyrë i Kuvendit të Kosovës, Glauk Konjufca, zhvilloi takim me nënkryetarët e partive politike opozitare, me qëllim diskutimin për organizimin e seancës konstituive e cila do të mbahet me 15 prill, raporton Ekonomia Online.

Në këtë mbledhje morën pjesë nënkryetarët e Partisë Demokratike të Kosovës (PDK), Lidhjes Demokratike të Kosovës (LDK) dhe Aleancës për Ardhmërinë e Kosovës (AAK), e po ashtu të pranishëm ishin edhe përfaqësuesit e partive të komuniteteve joshumicë . Nuk mori pjesë Lista Serbe.

Takimi u mbajt në Kuvendin e Kosovës.

E përditësuar: 10:29 – Konstituimi i Kuvendit, opozita në takim me Konjufcën shkon me nënkryetarë

Partitë opozitare sot do t’i përgjigjet pozitivisht ftesës së ish-kryetarit të Kuvendit, Glauk Konjufca, për takim me liderët e partive politike, ku do të diskutohet për përgatitjen e seancës konstitutive të legjislaturë së nëntë.

Megjithëse ftesa ka qenë ka qenë për liderët e partive politike, PDK, LDK dhe AAK kanë vendosur që në këtë takim të mos shkojnë Memli Krasniqi, Lumir Abdixhiku dhe Ramush Haradinaj.

Gazeta Nacionale ka mësuar se partitë opozitare në këtë takim do të përfaqësohet nga një nivel më i ulët.

Burimet e gazetës brenda PDK-së kanë bërë me dije se kjo parti në takim me Konjufcën do të përfaqësohet nga nënkryetari i saj, Uran Ismaili.

Edhe Lidhja Demokratike e Kosovës në këtë takim do të përfaqësohet prej njërit nga nënkryetarët.

Kurse, zyrtari i AAK-së që do të shkoj në këtë takim do të ketë një pozitë tjetër në parti.

Zëdhënësi i AAK-së, Kushtrim Xhemajli, ka thënë për gazetën Nacionale se në këtë takim AAK-ja do të përfaqësohet nga Sekretari i Përgjithshëm, Muharrem Nitaj.

***

Konstituimi i Kuvendit, Konjufca sot takon kryetarët e partive politike

Kryetari i Kuvendit në detyrë, Glauk Konjufca sot do të mbajë takim të përbashkët me kryetarët e partive politike.

Ky takim do të mbahet në orën 12:00 në ambientet e Kuvendit të Kosovës. Takimi vjen si rezultat i organizimit të seancës konstituive që do të mbahet më 15 prill.

Kjo seancë u caktua nga ana e presidentes Vjosa Osmani, e LVV po atë ditë synon ta zgjedhë edhe qeverinë siç ka deklaruar Kurti ditë më parë.

LVV-ja ka marrë 42.30% të votave dhe do t’i ketë 48 ulëse në Kuvendin e Kosovës, sipas rezultateve përfundimtare të zgjedhjeve parlamentare të 9 shkurtit – që nënkupton se asaj do t’i nevojitet një partner nga ana e opozitarëve për të qëndruar më tej në pushtet.

Partia Demokratike e Kosovës ka marrë 20.95% të votave (24 deputetë), ndërsa Lidhja Demokratike e Kosovës 18.27% (20 deputetë).

Koalicioni i Aleancës për Ardhmërinë e Kosovës me Nismën dhe të tjerët ka marrë 7.06% të votave (8 deputetë – 5 AAK, 3 Nisma)./Katror.info