Kryeministri Edi Rama deklaroi sot se Shqipëria është plotësisht e linjëzuar me politikën e jashtme të Bashkimit Europian, ndërsa theksoi ambicien e përbashkët për të përmbyllur negociatat e anëtarësimit deri në vitin 2027.
Gjatë një konference të përbashkët për shtyp në Tiranë me Përfaqësuesen e Lartë të BE-së për Politikën e Jashtme dhe Sigurisë, Kaja Kallas, Rama u shpreh se marrëdhëniet me Brukselin janë në nivelin më të mirë të mundshëm, pa asnjë çështje të hapur.
“Kemi një linjëzim të plotë në të gjitha aspektet me politikën e jashtme të BE-së. Mes Shqipërisë dhe Bashkimit Europian nuk ekziston asnjë problem apo çështje e pazgjidhur”, u shpreh Kryeministri, duke shtuar se kalendari i dakordësuar me Komisionin Europian për mbylljen e negociatave deri në vitin 2027 është ambicioz, por i arritshëm.
Mundesh me e lexu edhe…
Rama theksoi gjithashtu rëndësinë e ruajtjes së unitetit dhe stabilitetit në rajon, në një kohë kur të gjitha vendet e Ballkanit Perëndimor ndajnë të njëjtin synim strategjik – anëtarësimin në Bashkimin Europian.
Nga ana e saj, Kaja Kallas vlerësoi përparimin e Shqipërisë dhe theksoi se objektivi për anëtarësim deri në vitin 2030 është realist, por i kushtëzuar nga përmbushja e reformave, veçanërisht në fushën e sundimit të ligjit dhe luftës kundër korrupsionit.
“Shteti i së drejtës është thelbësor jo vetëm për anëtarësimin në BE, por edhe për rritjen ekonomike. Investuesit ndërkombëtarë duhet të kenë besim te sistemi ligjor i vendit për të investuar”, tha Kallas.
Ajo përfundoi duke theksuar se integrimi është një rrugë me angazhime të ndërsjella, ku të dyja palët duhet të bëjnë “detyrat e shtëpisë” për të arritur objektivin e përbashkët evropian./Katror.info
Përgatiti:
