Kosova ende nuk ka një bazë ajrore ushtarake funksionale, ndonëse toka e ish-Aeroportit të Gjakovës është tashmë në pronësi të Forcës së Sigurisë së Kosovës (FSK).
Ndërtimi i një baze ajrore është temë që po nxitet gjithnjë e më shumë në diskursin e sigurisë në vend. Në një përgjigje për KosovaPress, Ministria e Mbrojtjes ka konfirmuar se planifikojnë të zhvillojnë kapacitetet ajrore të FSK-së deri në vitin 2028, duke përfshirë edhe mundësinë e përdorimit të ish-Aeroportit të Gjakovës për qëllime ushtarake.
“Në momentin që do të ndërtohet kapaciteti i flotës ajrore, ish-Aeroporti i Gjakovës mund të përdoret për qëllime të tilla. Sigurisht se kjo është e nevojshme përderisa planifikojmë që deri në vitin 2028 të ndërtojmë kapacitetet ajrore të FSK-së,” thuhet në përgjigjen e Ministrisë.
Mundesh me e lexu edhe…
Ekspertët e sigurisë kanë qëndrime të ndryshme lidhur me këtë çështje. Drejtori i organizatës “OCTOPUS”, Arben Fetoshi, thekson rëndësinë e zhvillimit të kapaciteteve ajrore të Kosovës, veçanërisht në kohën kur sulmet ajrore dhe ato me dron janë bërë pjesë kyçe e luftërave moderne.
“Edhe pse jemi nën ombrellën e NATO-s, është e domosdoshme që Kosova të ndërtojë bazat e saj ajrore. Kjo do t’i siguronte vendit infrastrukturën e nevojshme për mbrojtje, sidomos në rastet kur misioni i KFOR-it mund të largohet,” ka deklaruar Fetoshi.
Në anën tjetër, eksperti i sigurisë Avni Islami, ka një qasje më pragmatike. Ai thekson se gjatë luftës së fundit në Kosovë, sulmet ajrore janë realizuar nga bazat e NATO-s jashtë vendit dhe se për momentin, Kosova duhet të fokusohet më shumë në pajisje për vetëmbrojtje.
“Kosova është e rrethuar nga vende të NATO-s, përjashto Serbinë. Nuk shoh nevojë urgjente për ndërtimin e një baze ajrore, por në një të ardhme të afërt ajo duhet të jetë pjesë e kapaciteteve të plota mbrojtëse të vendit,” ka deklaruar Islami.
Ndërkohë, Ministria e Mbrojtjes nuk ka dhënë përgjigje lidhur me mundësinë e përdorimit të bazës në Golesh për qëllime ajrore deri në publikimin e artikullit.
Vitin e kaluar u tha se Forca e Sigurisë së Kosovës (FSK) po merr përkrahje edhe nga Shtetet e Bashkuara të Amerikës për blerjen e helikopterëve. Për të marrë dritën e gjelbër, ministri i Mbrojtjes Ejup Maqedonci pat qëndruar disa ditë në Departamentin e Shtetit duke realizuar takime në nivelin e lartë.
“Një ndër pikat e diskutimit ka qenë vazhdimësia për blerjen e sistemit të armatimit, tash Forca e Sigurisë së Kosovës nga viti 2025 kalon në një fazë tjetër pra në fazën e tretë të tranzicionit ku do të kërkohen sisteme më të avancuara sidomos të mbështetjes ushtarake, që nënkupton helikopterë që nënkupton radarë të mbrojtjes ajrore. Dhe kemi marrë mbështetje që Shtetet e Bashkuara të Amerikës do ta mbështesin Republikën e Kosovës në ndërtimin e këtyre kapaciteteve. Gjatë dy ditëve ne vijim kemi vizita të rëndësishme që ndërlidhen me blerjet ushtarake” , pat deklaruar Maqedonci për tëvë1.
Gjatë kësaj vizite ministri Maqedonci pat vizituar fabrikën “Sikorsky – Lockheed Martin”, ku prodhohen edhe helikopterët Black Hawk, që si thotë ai, Kosova do t’i ketë në flotën e mbështetjes ajrore të ushtrisë.
“Në përmbyllje të vizitës në ShBA, e vizitova fabrikën “Sikorsky – Lockheed Martin”, ku prodhohen helikopterë të ndryshëm, ndër të cilët edhe helikopterët Black Hawk, që do t’i kemi në flotën e mbështetjes ajrore të ushtrisë së Kosovës. Së bashku me Gjeneral Jasharin e takuam menaxhmentin e kësaj kompanie, ku diskutuam për opsionet e përfshirjes së helikopterëve në inventarin e Forcës së Sigurisë së Kosovës”, ka shkruar Maqedonci, transmeton Telegrafi./KP/Katror.info
Përgatiti:
