Apple pritet të sjellë risi të mëdha me iPhone 17 Pro

Apple pritet të rezervojë risitë më të mëdha dhe përmirësimet më domethënëse për modelet iPhone 17 Pro, të cilat pritet të prezantohen në muajin shtator 2025, në përputhje me ciklin vjetor të kompanisë. Tashmë kanë filluar të qarkullojnë detaje të shumta rreth pamjes, specifikave teknike dhe funksioneve të reja që priten me këtë seri, veçanërisht për modelet Pro.

Kornizë e re prej alumini dhe dizajn i ridizenjuar

iPhone 17 Pro pritet të ketë një kornizë prej alumini, ndryshe nga iPhone 15 dhe 16 Pro që përdorin titan, ndërsa modelet më të vjetra janë prodhuar me çelik inox. Pjesa e pasme do të kombinojë aluminin dhe xhamin, duke sjellë një pamje të re dhe moderne.

Modul i ri kamere me dizajn drejtkëndëshi

Apple pritet të aplikojë një modul të madh kamere në formë drejtkëndëshi me skaje të rrumbullakosura, duke ruajtur pozicionimin trekëndor të lenteve në pjesën e pasme.

Ekran më rezistent dhe bateri më e fuqishme

iPhone 17 Pro pritet të ketë një ekran më rezistent ndaj gërvishtjeve, falë një shtrese të re antireflektuese. Ndërkohë, modeli Pro Max do të ketë një bateri më të madhe, e mundësuar nga një dizajn pak më i trashë.

Çipi A19 Pro dhe Wi-Fi 7

Modeli Pro do të përfshijë çipin A19 Pro, që do të prodhohet me teknologjinë më të avancuar 3nm të gjeneratës së tretë nga TSMC, duke sjellë përmirësime në shpejtësi dhe efikasitet energjetik. Për herë të parë, pritet që të gjithë modelet e iPhone 17 të përdorin çipin Apple Wi-Fi 7, duke braktisur zgjidhjet e Broadcom.

Kamera të përmirësuara për foto dhe video

iPhone 17 Pro do të ketë përmirësime të dukshme në kamerë:

• Kamerë e përparme 24 MP, dy herë më shumë se modeli paraardhës;
• Kamerë telefoto 48 MP në pjesën e pasme, një rritje e madhe nga 12 MP që ka iPhone 16 Pro;
• Regjistrim video në 8K, një veçori e shumëpritur që mund të debutojë për herë të parë me këtë seri;
• Regjistrim video njëkohësisht me kamerën e përparme dhe të pasme, drejtpërdrejt nga aplikacioni Camera.

12 GB RAM dhe sistem i përmirësuar ftohjeje

Modeli i ri pritet të vijë me 12 GB RAM, një rritje e ndjeshme që do të përmirësojë multitasking-un dhe funksionet e avancuara të Apple Intelligence. Për të përballuar fuqinë shtesë, Apple do të përdorë një sistem të ri ftohjeje me dhomë me avull (vapor chamber) për shpërndarje më efikase të nxehtësisë./Katror.info