Në Muajin Ndërkombëtar të Parandalimit të Vetëvrasjeve, presidentja e shtetit, Vjosa Osmani, ka deklaruar se shëndeti mendor nuk duhet të jetë temë që heshtet, por një prioritet i përditshëm, ndërsa ka theksuar se parandalimi i vetëvrasjeve është përgjegjësi e secilit.
“Pata nderin t’i bashkohesha nismës ‘Linja e Jetës’, për të rritur ndërgjegjësimin mbi këtë kauzë të rëndësishme. Sot dhe çdo ditë riafirmojmë përkushtimin tonë për të ndërtuar një shoqëri ku dhimbja nuk mbulohet me heshtje dhe ku çdo njeri ndjen se kurrë nuk është vetëm. Shëndeti mendor nuk duhet të jetë temë që heshtet, por prioritet i përditshëm”, tha presidentja.
Përmes një video-mesazhi, ajo theksoi se çdo histori ka rëndësi dhe se asnjë dhimbje nuk duhet të mbetet në heshtje.
Mundesh me e lexu edhe…
“Çdo jetë është e shtrenjtë, çdo histori ka rëndësi dhe asnjë dhimbje nuk duhet të mbetet në heshtje. Detyra jonë është të flasim hapur, të dëgjojmë me zemër dhe të qëndrojmë pranë njëri-tjetrit. Sepse kur tregojmë solidaritet, kur pranojmë dhe përqafojmë njëri-tjetrin pa paragjykim, ne bëhemi dritë dhe shpresë për ata që kanë më së shumti nevojë. Krijimi i një hapësire ku jeta respektohet, ku dhimbja nuk heshtet dhe ku secili njeri ndjen se kurrë nuk është vetëm, le të jetë ky angazhimi ynë i përditshëm”, tha ajo./Katror.info
