Në kuadër të bashkëpunimit bilateral me Republikën e Shqipërisë, Qendra Ndërkombëtare Trajnuese për Kërkim-Shpëtim e Gardës Kombëtare të Forcës së Sigurisë së Kosovës (FSK) ka realizuar trajnimin e avancuar në fushën e kërkim-shpëtimit malor, me pjesëmarrjen e Forcave të Armatosura të Republikës së Shqipërisë (FARSH) dhe pjesëtarëve të Forcës së Sigurisë së Kosovës (FSK).
Në një postim në rrjetin social “Facebook”, FSK njofton se trajnimi është zhvilluar në disa nga terrenet më karakteristike për operacione shpëtimi, përfshirë Kullën e repelimit në QNTKSH, Gurin e Plakës, Shtëpinë malore në Prizren, Via Ferrata “Panorama” dhe Liqenin e Jazhinicës.
Pjesëmarrësit u trajnuan në teknikat e lidhjes dhe përdorimit të litarëve, ngjitje dhe repelim në terrene alpine, navigim në zona malore, ndihmën e parë dhe menaxhimin e traumave në kushte të vështira, si dhe evakuimin e të lënduarve nga terrene të thepisura.
Mundesh me e lexu edhe…
Tutje, FSK bën të ditur se ky trajnim shënon edhe një hap të rëndësishëm drejt rritjes së kapaciteteve për reagim në situata emergjente malore dhe forcon më tej ndërveprimin ndërmjet dy forcave, pra të Forcave të Armatosura të Shqipërisë dhe të Forcës së Sigurisë së Kosovës. /Katror.info
