Kuvendi i Kosovës ka miratuar në parim ndarjen buxhetore të Buxhetit për vitin 2025. Kuvendi i e kaloi me 59 vota për, dy abstenime dhe asnjë kundër.
60 deputetë votuan pro, asnjë kundër dhe një abstenoi.
***
Mundesh me e lexu edhe…
Kryeministri i Kosovës Albin Kurti prezantoi buxhetin e vitit 2025 për Kosovën, duke e quajtur atë “buxhet për familjen.” Ky buxhet, në vlerë prej 3.6 miliardë eurosh, sipas tij parashikon rritje të pagave, pensioneve dhe mbështetje për sektorët kyç si arsimi, shëndetësia dhe infrastruktura. Kurti theksoi se, pavarësisht krizave globale, Qeveria ka arritur të dyfishojë buxhetin dhe të rrisë të ardhurat, duke siguruar mbështetje për qytetarët. Ai kërkoi votën e deputetëve, duke thënë se me këtë buxhet do të përfitojnë “bizneset dhe ekonomia.”
“Me këtë buxhet, të nderuar deputetë, përfitojnë edhe bizneset edhe ekonomia. Së pari përfitojnë nga rritja e fuqisë blerëse të familjes. Nga 12 miliardë euro sa ishte para qeverisë tonë për vitin 2024 pritet të kalojë 24 miliardë qarkullim. Ky buxhet parasheh mbështetje të buxheteve edhe për qasje në financa. Kjo mbështetje vjen si vijim i mbështetjes së realizuar gjatë viteve që lamë pas. Kontributi kryesor në rritjen ekonomike gjatë periudhës së ardhshme afatmesme pritet të vijë nga konsumi. Konsumi do të rritet nga rritja e pensioneve, rritja e shtesave të fëmijëve jo çfarëdo rritje, rritja e koeficientit për të gjithë të punësuarit, si dhe rritja e pagës minimale që ndodh pas më shumë se një dekadë stagnimi. Me këtë buxhet e kemi prioritet zhvillimin e qëndrueshëm ekonomik, ju ftoj edhe ta votoni buxhetin 2025”, ka thënë ai.
Në reagimet nga opozita, deputeti Mërgim Lushtaku nga Partia Demokratike e Kosovës, e kritikoi buxhetin si një “planifikim të keq që do të dëmtojë bizneset dhe ekonominë”, duke e quajtur atë një buxhet të mbijetesës.
“Këta besimin e qytetarit e kanë marrë si privilegj dhe po mendojnë që në karriget e pushtetit do të qëndrojnë përgjithmonë. Fjalimet populliste nuk po i ngopin qytetarët. Një planifikim i buxhetit do të kontribuonte në përmbushjen e nevojave të qytetarëve, gjë që nuk po ndodh me këtë Qeveri. Buxheti i shtetit nuk është hajgare…Nëse nuk hartohet siç, duhet jo vetëm që nuk ndihmon, por mundet me përkeqësu situatën. Planifikimi i shpenzimeve është i keq pa kurrfarë efekti në zhvillimin ekonomik dhe përmirësimin e jetës së qytetarëve në përgjithësi. Buxheti që nga viti i paraluftës është rrit nga viti në vit. Rritja e buxhetit te pjesa e të hyrave nuk paraqet ndonjë risi”, ka shtuar ai.
Deputeti Avdullah Hoti nga Lidhja Demokratike e Kosovës (LDK) ngriti shqetësimin për premtimet e pambajtura në arsim dhe shëndetësi, si dhe për rënien e investimeve kapitale. Hoti ka deklaruar se shqyrtimi i parë i projektligjit për ndarjet buxhetore duhet të shqyrtohet si një dokument i përkohshëm pasi sipas tij, në zgjedhjet e shkurtit Qeveria do të ndryshojë, duke shtuar se buxheti ka shumë mangësi.
“Në shëndetësi, sigurime shëndetësore dhe sistemin informatik shëndetësor, asnjë nuk është realizuar. Te privatizimi, rishikimi i privatizimeve, fondi sovran dhe banka zhvillimore…Buxheti gjatë këtij mandati qeverisës 11. 4 miliardë euro, ndikimi në ekonomi dhe shoqëri është pothuajse zero. Kanë ndërruar raportet mes subvencioneve dhe investimet kapitale. Janë rreth 520 milionë euro subvencione. Edhe ato investime kapitale që janë premtuar nuk janë realizuar… kanë qenë të planifikuara 3 miliardë euro, janë realizu vetëm 1.2 miliardë euro”, është shprehur ai.
Besnik Tahiri nga Aleanca për Ardhmërinë e Kosovës, gjithashtu e fajësoi qeverinë për mosrealizimin e projekteve të rëndësishme dhe për mosmbajtjen e premtimeve për pensionet dhe pagat.
“Po është rritur ekonomia, është e vërtetë. 240 milionë euro ua keni dhënë dostave të juve përmes tenderëve njëburimor. Kam pasur shumë besim në këtë projektin ‘Superpuna’, më ka pëlqyer si projekt. Ky jo që është ‘Superpuna’, por është superdështim. Punësimi është rritur, por jo në Kosovë. Është rritur në diasporë”, është shprehur ai.
Buxheti për vitin 2025 është i ndarë në disa sektorë, ku për investime kapitale janë parashikuar 930 milionë euro. Shpenzimet për paga dhe shtesa arrijnë në 916.5 milionë euro, ndërsa 535.97 milionë euro do të shpenzohen për mallra dhe shërbime. Shpenzimet për institucionet shëndetësore dhe arsimore janë gjithashtu të larta, me mbi 54 milionë euro për spitale dhe mbi 366 mijë euro për trajnimin e mësuesve.
Qeveria parashikon një rritje ekonomike prej 4.5% për këtë vit, ndërsa për vitin 2025 pritet të arrijë 5.6%. Pavarësisht kritikave, pozita është e bindur se ka mjaft vota për miratimin e buxhetit, i cili është 300 milionë euro më i lartë se ai i vitit 2024./Katror.info
Përgatiti:
