Sot, më 15 dhjetor në Prishtinë do të shënohet edicioni i 9-të i mini maratonës “Vrapo Babadimër”.
Programi fillon në orën 12:00 në Sheshin “George Bush”, ndërsa vrapimi/marshimi nis në ora 13:00 nga Sheshi “Zahir Pajaziti”.
Mijëra “Babadimra” pritet të bashkohen këtë vit për të sjellë gëzim dhe për të mbështetur një kauzë të rëndësishme humanitare, njofton organizatori, Jusuf Islami.
Këtë vit, maratona bëhet edhe më e veçantë me pjesëmarrjen e kampionit të vrapimit, Albion Ymeri, i cili me përkushtimin dhe energjinë e tij është frymëzim për të gjithë.
Vlen të përmendet se të gjithë ata që festojnë me kostum të babadimrit mund të udhëtojnë falas me autobusët e trafikut urban.
Kjo iniciativë, e cila filloi në vitin 2016 me vetëm 100 pjesëmarrës, ka arritur të rritet jashtëzakonisht, duke mbledhur vit pas viti mijëra dashamirës. “Sot, jemi krenarë të presim mbi 6,000 pjesëmarrës, të gjithë të bashkuar nën kostumin e babadimrit për një kauzë që sjell shpresë dhe ngrohtësi,” ka shkruar Islami në një postim në Facebook.
Që nga fillimi, ideja ka qenë për të organizuar një event unik me karakter human, një ëndërr është kthyer në një nga ngjarjet më të rëndësishme të fundvitit.
“Këtë vit, Prishtina do të ndriçohet nga drita e kuqe e babadimrave, ndërsa ne do të gëzojmë fëmijët në repartin e hemato-onkologjisë për festat e fundvitit. Ky është qëllimi ynë më i lartë – të shpërndajmë gëzim dhe të japim shpresë për ata që kanë më shumë nevojë.”/Katror.info
Përgatiti:
