Një anije kozmike e NASA-s po synon të shënojë histori, duke arritur afrimin më të madh ndonjëherë pranë Diellit.
BBC-ja ka njoftuar se sonda diellore, mjet për studime hapësire, është futur thellë në atmosferën e jashtme të Diellit dhe ka duruar temperatura të mëdha dhe rrezatim ekstrem. Aktualisht sonda gjendet jashtë komunikimit tash e disa ditë, por shkencëtarët po presin një sinjal më 27 dhjetor, për të parë nëse ka mbijetuar.
Lideri i Departamentit të Shkencës në Administratën Kombëtare Aeronautike Hapësinore, Nicola Fox, ka thënë se për shekuj është studiuar Dielli, “por ju nuk e përjetoni atmosferën e një vendi pa shkuar për ta vizituar”.
Mundesh me e lexu edhe…
“Dhe kështu, ne nuk mund ta përjetojmë vërtet atmosferën e yllit tonë nëse nuk fluturojmë nëpër të”, është shprehur ai.
Misioni hapësinor amerikan, Parker Solar Probe, është lansuar në vitin 2018, duke u nisur drejt qendrës së sistemit tonë diellor. Sonda i është afruar 21 herë Diellit, por kjo në fund të 2024-s po konsiderohet arritje rekorde, duke shkuar 6.2 milionë kilometra pranë.
“Ne jemi 149.7 milionë kilometra larg Diellit, kështu që nëse e merr si krahasim që Dielli e Toka janë një metër larg njëri-tjetrit, Sonda Parker është katër centimetra nga Dielli – kështu që është afër, është shprehur Fox.
Sonda pritet të durojë temperaturën prej 1.400 gradë celsius dhe rrezatimin që mund t’i dëmtojë pajisjet në bord. Ajo mbrohet nga një mburojë e trashë prej 11.5 centimetra, e përbërë nga karboni, por taktika e anijes kozmike synon të afrohet shpejt pranë Diellit dhe të largohet menjëherë.
Kjo anije do të lëvizë më shpejt se secili objekt i ndërtuar ndonjëherë, duke arritur 692,000 kilometra në orë. Me këtë shpejtësi, fluturimi nga Londra në New York do të zgjaste më pak se 30 sekonda.
Shkencëtarët po shpresojnë se derisa anija kozmike t’i afrohet Diellit, zbulimi do të zgjidhë një mister të madh.
“Korona e Diellit është me të vërtetë, shumë e nxehtë dhe ne nuk e dimë pse”, ka thënë Jenifer Millard, astronom në Wales. Misioni synon të ndihmojë gjithashtu që të kuptohet më mirë era diellore, si rrjedhë e vazhdueshme e grimcave të ngarkuara që shpërthejnë nga korona.
Korona diellore konsiderohet atmosfera e jashtme e Diellit. Ajo është shumë e nxehtë dhe s’ka shumë studime mbi rëndësinë e saj, ndërsa era diellore është erë që shkaktohet nga rrymat e ndryshme në Diell dhe shpesh është shkaktare e disa prej fenomeneve në Tokë./Katror.info
Përgatiti:
