Konsumi global i gazit natyror arriti një rekord në vitin 2024 dhe kërksa për gaz pritet të rritet më tej në vitin 2025, sipas një raporti të publikuar të martën nga Agjencia Ndërkombëtare e Energjisë (IEA), e cila pret tregje “të shtrënguara” këtë vit.
Bota konsumoi 115 miliardë metra kub më shumë gaz natyror (nga burimet fosile) se në vitin 2023, një rritje prej 2.8 për qind, shumë mbi normën mesatare të rritjes prej 2 për qind nga 2010 në 2020, tha IEA-ja bazuar në të dhënat paraprake në raportin e saj tremujor të tregut të gazit, shkruan Albanian Post.
Në tetor, IEA-ja vlerësoi konsumin global të gazit në 4 mijë e 200 miliardë metër kub për vitin 2024.
Mundesh me e lexu edhe…
Sipas vlerësimeve fillestare, gazi ka mbuluar “rreth 40 për qind të rritjes së kërkesës globale për energji”, një pjesë më e madhe se çdo karburant tjetër, thotë IEA-ja, Agjencia e Energjisë me seli në Paris.
Gazi “vazhdon të zëvendësojë naftën dhe nënproduktet e saj në një sërë sektorësh”, si transporti rrugor në distanca të gjata dhe sektori i prodhimit të energjisë elektrike.
Djegia e gazit prodhon më pak dyoksid karboni sesa djegia e qymyrit dhe naftës.
Kërkesa për gaz pritet të “rritet më tej në 2025, e nxitur kryesisht nga rritja e shpejtë në tregjet aziatike”, tha IEA-ja, duke theksuar se “në të njëjtën kohë, bilanci global i gazit mbetet i brishtë, me ofertën që mbetet e shtrënguar dhe tensionet gjeopolitike vazhdojnë të nxisin paqëndrueshmërinë e çmimeve”.
IEA-ja gjithashtu vuri në dukje se ndërsa ndërprerja e tranzitit të gazit rus përmes Ukrainës më 1 janar 2025 “nuk pritet të përbëjë një rrezik të menjëhershëm për sigurinë e furnizimit të Bashkimit Evropian, ai mund të rrisë nevojën e BE-së për importet e gazit natyror të lëngshëm (LNG)”.
Ky gaz i lëngshëm i transportuar nëpërmjet cisternave LNG është shumë i kërkuar në Azi dhe Evropë, të cilit i është dashur të kompensojë që nga fillimi i luftës në Ukrainë në vitin 2022, mungesën e gazit rus, i transportuar historikisht në Perëndim nëpër tubacionet tokësore të gazit.
Megjithatë, importet evropiane të LNG-së ranë me 18 për qind në 2024.
Shtetet e Bashkuara ruajtën pozicionin e tyre si furnizuesi kryesor i Evropës, pavarësisht një rënieje prej 18 për qind të kërkesës, e ndjekur nga Rusia.
Belgjika, Franca dhe Spanja përbënin 85 për qind të importeve totale të LNG-së të Evropës nga Rusia në vitin 2024./Katror.info
Përgatiti:
