Nesër, me rastin e Ditës Botërore Kundër Kancerit, Baleti Kombëtar i Kosovës do të shfaq premierën e baletit “Hope” në atelienë e Pallatit të Rinisë në Prishtinë. Kjo shfaqje vjen si pjesë e angazhimit artistik për të ndihmuar dhe sensibilizuar mbi sfidat e personave të prekur nga kanceri, shkruan Katror.info.
Drejtori i Baletit Kombëtar të Kosovës në një intervistë për RTK, Sinan Kajtazi, theksoi se kjo shfaqje ka një rëndësi të veçantë, pasi artistët përmes artit të tyre po kontribuojnë për një kauzë me vlerë shoqërore. Ai u shpreh se ky projekt ka ardhur si rezultat i bashkëpunimit me organizatën ‘Action for Health’, e cila ka propozuar idenë e trajtimit të kësaj teme përmes artit skenik.
“Hope” është konceptuar dhe realizuar nga balerini dhe koreografi Sead Vuniqi, i cili së bashku me një grup prej nëntë balerinësh të Baletit Kombëtar të Kosovës ka punuar mbi tre javë për ta sjellë këtë shfaqje.
Kajtazi theksoi se gjuha e trupit dhe fuqia e koreografisë janë mjete të fuqishme artistike për të trajtuar tematika të ndjeshme dhe për të përçuar mesazhe të fuqishme tek publiku. Ai shtoi se secili shikues mund ta gjejë veten në këtë histori, duke reflektuar mbi përvojat personale dhe duke u solidarizuar me ata që përballen me sëmundje të rënda.
Shfaqja “Hope” sjell një rrugëtim emocional që trajton sfidën e përballjes me kancerin dhe forcën e shpirtit njerëzor për të mbajtur gjallë shpresën. Me një qasje artistike, baleti synon të paraqesë momentet e pasigurisë, dhimbjes, por edhe triumfit dhe solidaritetit.
Premiera e kësaj shfaqjeje shënon një moment të rëndësishëm për Baletin Kombëtar të Kosovës, duke e vendosur artin në shërbi të kauzave me ndikim shoqëror./Katror.info
Përgatiti:
