Gjashtë nga tetë kamionë sa janë blerë nga Komuna e Prishtinës për KRM “Pastrimi” janë dorëzuar të enjten, raporton Ekonomia Online.
Vlera totale e këtij projekti është 1. 4 milion euro, ndërsa vazhdon të mbetet “gjendje e jashtëzakonshme me mbeturina”.
Drejtori i Shërbimeve Publike në Komunën e Prishtinës, Bekim Brestovci, ka thënë se në kryeqytet vazhdon të mbetët “gjendja e jashtëzakonshme me mbeturina”, ndërsa përmendi edhe numrin e madh të kontejnerëve për të cilat pret që kompania t’i shpërndajë sa më shpejtë.
Mundesh me e lexu edhe…
“Po bëjmë pranim dorëzimin e 6 prej 8 kamionëve të cilët komuna i ka blerë me një vlerë prej 1.4 milion euro dhe këta do t’i dedikohen ndërmarrjes ‘Pastrimi’ në mënyrë që ta kemi më të lehtë te përballojmë situatën në të cilën jemi. Ne tani kemi edhe një stok prej 2500 kontejnerë të cilët pritet së shpejti ndërmarrja t’i shpërndaj në kryeqytet”.
“Ne e kemi krijuar një grup punë që në përditshmëri po e bënë verifikimin e gjendjes në teren. Po i shqyrtojmë ankesat që po vijnë nga qytetarët. Ne e kemi pasur një raport të përpiluar për të vazhduar gjendjen e jashtëzakonshme dhe jemi në vlerësim të situatës se si është situata dhe cilat janë hapat konkret që duhet t’i marrim”, ka thënë Brestovci.
E kryeshefi i Ndërmarrjes “Pastrimi”, Petrit Reçica, ka thënë se ende nuk e kuptojnë arsyen se pse komuna e Prishtinës e ka shpallur gjendje së jashtëzakonshme, duke shtuar se me pranimin e këtyre kamionëve kjo gjendje duhet që të hiqet.
“Këtë pjesë të gjendjes së jashtëzakonshme apo emergjente ende nuk e kam të qartë. Ende nuk e dimë se në çfarë forme është shpallur kjo gjendje, pasi edhe ne jemi duke kryer disa matje në terren. Të hënën në mëngjes kemi mbuluar tërësisht territorin dhe po bëjmë analiza për të parë sa ka pasur vonesa në shërbime nga operatori privat. Sepse një gjë të tillë nuk e kemi pranuar zyrtarisht as nga operatori privat, as nga komuna. Shumë shpejt do të dalim me një raport zyrtar. Sigurisht, vlerësoj që me shtimin e kamionëve, gjendja do të përmirësohet ndjeshëm, duke arritur një rritje deri në 300% në shërbim, dhe besoj se një gjendje e tillë nuk duhet të vazhdojë.”, u shpreh ai.
Ndërkaq më 5 shkurt 2025, Katror.info raportoi se me vendim të Komunës së Prishtinës, nga 1 janari 2025, qytetarët e Prishtinës nuk janë të detyruar të paguajnë faturat për shërbimin e mbetjeve ndaj Kompanisë “Pastrimi”. Në anën tjetër, KRM “Pastrimi” ka akuzuar komunën për shkelje të ligjit dhe ka theksuar se vendimi krijon konfuzion mes qytetarëve, duke e kundërshtuar atë si një hap në shkelje të rregullores për menaxhimin e mbeturinave, ndërkaq ka kërkuar që qytetarët të vazhdojnë të bëjnë pagesat për shërbimet e mbetjeve.
Gjithashtu, kontigjenti prej 2000 kontenjerësh pati arritur në kryeqytet më 5 nëntor 2024, mirëpo ende nuk dihet data e saktë se kur do të bëhet shpërndarja e tyre./Katror.info
Përgatiti:
