Drejtori i Bankës Evropiane për Rindërtim dhe Zhvillim (BERZH), Sergey Maslichenko ka thënë se në vitin 2024, Banka Evropiane për Rindërtim dhe Zhvillim (BERZH) ka investuar rreth 113 milionë euro në 19 projekte në Kosovë, duke shënuar një rritje prej 40% krahasuar me vitin e kaluar.
Në një intervistë për Ekonomia Online, Sergey Maslichenko, theksoi se ky investim reflekton përkushtimin e bankës për zhvillimin ekonomik të Kosovës.
“Në vitin 2024, Banka Evropiane për Rindërtim dhe Zhvillim (BERZH) investoi rreth 113 milionë euro në 19 projekte në Kosovë, duke shënuar një nga nivelet tona më të larta të investimeve në vend. Kjo përfaqëson një rritje prej 40% krahasuar me vitin e kaluar, duke reflektuar përkushtimin tonë të fortë ndaj zhvillimit ekonomik të Kosovës”.
Mundesh me e lexu edhe…
“Po, kemi disa projekte në vazhdim dhe presim formimin e qeverisë së re, pasi kemi projekte të mëdha infrastrukturore që Kosova i ka shumë të nevojshme. Me qeverinë e re, dëshirojmë të vazhdojmë projektet që kemi përgatitur për disa vite dhe muaj. Këto përfshijnë projektin e kanalit të ujit Ibër-Lepenc, i cili është shumë i rëndësishëm për Kosovën, si dhe projekte rrugore, përfshirë rrugën e Prishtinës dhe lidhjen Duhel-Banjë, e cila do të lidhë dy autostradat kryesore, Shkupin dhe Tiranën”, ka deklaruar Maslichenko.
Ai gjithashtu theksoi rëndësinë e projekteve infrastrukturore si kanali i ujit Ibër-Lepenc, rrugët lidhëse, dhe përmirësimi i rrjetit energjetik, duke shtuar se investimet e mëtejshme varen nga miratimi i qeverisë së re.
Maslichenko theksoi nevojën për më shumë investime në infrastrukturë dhe energji për të përmirësuar lidhjet e Kosovës me rajonin.
“Gjithashtu, kemi disa projekte në sektorin e energjisë, duke punuar me Operatorin e Sistemit të Transmetimit për të përmirësuar rrjetin energjetik dhe për të rritur kapacitetin e energjisë, një nevojë e dëshmuar gjatë këtij dimri. Po ashtu, mbështesim sektorin privat për të zhvilluar projekte të reja të energjisë së ripërtëritshme. Në total, kemi një numër të madh projektesh në pritje të investimeve, por na nevojitet qeveria e re për të përcaktuar prioritetet dhe për të dhënë miratimin e nevojshëm, në mënyrë që të mund të bëjmë edhe më shumë këtë vit.”
“Po, gjatë vitit të kaluar kemi punuar shumë me qeverinë dhe kemi vendosur bazat për punën e ardhshme në vend. Besojmë se Kosova ka nevojë për më shumë investime në infrastrukturë, veçanërisht në projekte që rrisin lidhjen e vendit me tregun rajonal, si rrugët, hekurudhat dhe furnizimi me energji elektrike”, tha ai për Ekonomia Online.
Sipas tij, BERZH ka investuar rreth 800 milionë euro në 120 projekte në Kosovë që nga hapja e zyrës së saj në vitin 2012.
“Këto projekte janë thelbësore për zhvillimin e sektorëve ekonomikë dhe rritjen e mundësive të eksportit. Për më tepër, ato do të ndihmojnë bizneset të realizojnë më shumë projekte dhe të rrisin likuiditetin në treg. Duke investuar në infrastrukturë dhe ekonomi, do të krijohen më shumë mundësi për bizneset, punësim për qytetarët dhe një klimë më të favorshme për investitorët ndërkombëtarë.”
“Që nga fillimi, BERZH ka investuar në rreth 120 projekte me një total prej 800 milionë euro. Pjesa më e madhe e këtyre investimeve është bërë pas hapjes së zyrës sonë në Kosovë në vitin 2012, pra gjatë 12 viteve të fundit. Në të kaluarën, financimi ynë mesatar ishte rreth 50 milionë euro në vit, ndërsa vitin e kaluar kaluam 100 milionë. Besojmë se mund të arrijmë në 200 milionë euro investime në vit për Kosovën”, theksoi ai.
Maslichenko beson se mund të arrijnë deri në 200 milionë euro investime çdo vit në Kosovë, duke ndihmuar në rritjen e mundësive të eksportit dhe krijimin e mundësive të punës për qytetarët.
“Një nga projektet më të rëndësishme që kemi financuar vitin e kaluar është programi për modernizimin dhe rritjen e efikasitetit energjetik në ndërtesat publike, duke përfshirë shkolla, çerdhe, spitale dhe ndërtesa administrative. Ky projekt, i realizuar me Fondin e Kosovës për Efiçiencë të Energjisë, ka vlerën më të madhe në historinë tonë në Kosovë – 50 milionë euro, dhe do të mbulojë 400 ndërtesa publike.”
“Një tjetër projekt i rëndësishëm është impjanti i trajtimit të ujërave të zeza në Pejë, financuar me një kredi prej 25 milionë euro dhe një grant prej 10 milionë euro. Ky impjant do të shërbejë rreth 50,000 banorëve, duke përmirësuar mjedisin dhe cilësinë e jetës në Pejë dhe rajonin përreth,” ka thënë drejtori Maslichenko./EO
Përgatiti:
