Opozita e qendrës së djathtë në Grenlandë ka dalë fituese në zgjedhjet e përgjithshme, tregojnë rezultatet pothuajse të plota, në një votim të ndikuar nga premtimi i presidentit amerikan Donald Trump për të marrë territorin autonom të Danimarkës.
Sipas të dhënave zyrtare, me më shumë se 90 për qind të votave të numëruara, partia Demokraatit – e cila mbështet një qasje graduale ndaj pavarësisë – kryeson me gati 30 për qind të votave. Në vend të dytë renditet partia Naleraq, e cila kërkon një ndarje të menjëhershme nga Kopenhaga dhe lidhje më të ngushta me SHBA-në, duke marrë rreth 25 për qind të votave.
Inuit Ataqatigiit (IA), partia e kryeministrit në largim, Mute B Egede, e cila gjithashtu mbështet pavarësinë, është e treta me mbi 21 për qind të votave.
Mundesh me e lexu edhe…
Një votim me ndikim strategjik
Grenlanda, ishulli më i madh në botë, është një territor autonom i Danimarkës, e cila ndodhet rreth 3,000 kilometra larg. Ndërsa ishulli ka vetëqeverisje për çështjet e brendshme, politika e jashtme dhe mbrojtja mbeten nën kontrollin e Kopenhagës.
Nga 57,000 banorë të Grenlandës, rreth 44,000 kishin të drejtë vote për të zgjedhur 31 deputetët e parlamentit dhe qeverinë lokale. Në garë ishin gjashtë parti politike.
Partia Siumut – partnerja e Egedes në koalicionin aktual të krahut të majtë – është renditur e katërta me afro 15 për qind të votave. Ndërkohë, dy partitë e tjera, Atassut dhe Qulleq, kanë marrë përkatësisht 7 dhe 1 për qind të votave. Procesi zgjedhor u zhvillua në 72 qendra votimi në të gjithë ishullin.
Trump insiston për Grenlandën
Interesimi i presidentit amerikan për Grenlandën nuk është i ri. Trump e shprehu për herë të parë idenë e blerjes së ishullit gjatë mandatit të tij të parë në vitin 2019. Tani, pasi ka marrë detyrën për herë të dytë në janar 2025, ai e ka përsëritur synimin e tij.
“Ne kemi nevojë për Grenlandën për sigurinë kombëtare. Në një mënyrë ose në një tjetër do ta arrijmë atë,” deklaroi Trump gjatë një fjalimi në Kongresin e SHBA javën e kaluar.
Megjithatë, liderët e Grenlandës dhe Danimarkës kanë refuzuar vazhdimisht idenë e tij. Kryeministri në largim, Egede, ka theksuar se Grenlanda nuk është në shitje dhe se meriton të “trajtohet me respekt”./Katror.info
Përgatiti:
