Një trajtim eksperimental ka treguar rezultate premtuese për reduktimin e rrezikut të demencës që lidhet me Alzheimerin për pacientët asimptomatikë që pritet të zhvillojnë këtë sëmundje neurodegjenerative.
Hulumtuesit vëzhguan një grup të vogël prej 22 pacientësh që kishin mutacione gjenetike që shkaktojnë mbiprodhimin e amiloidit në tru.
Një nga tiparet kryesore të sëmundjes së Alzheimerit është kur proteina amiloid ngjitet dhe formon pllakë në tru.
Sipas rezultateve të reja të publikuara në revistën Lancet Neurology, kur 22 pacientët morën një ilaç anti-amiloid të quajtur gantenerumab për tetë vjet, rreziku i tyre për të zhvilluar simptoma u ul nga 100 për qind në rreth 50 për qind.
“Çdo njeri në këtë studim ishte i destinuar të zhvillonte sëmundjen e Alzheimerit, dhe disa prej tyre nuk kanë shfaqur ende simptoma”.
“Për t’u dhënë pacientëve mundësinë më të mirë për të mbetur kognitivisht normalë, kemi vazhduar trajtimin me një tjetër antitrup anti-amiloid në shpresën që ata të mos zhvillojnë kurrë simptoma”, tha Randall Bateman, profesor neurologjie në shkollën e mjekësisë të Universitetit të Washingtonit në SHBA dhe një nga autorët e studimit.
Rezultatet sugjerojnë që trajtimi i hershëm mund të vonojë fillimin e simptomave të Alzheimerit.
Përfitimet kognitive u shfaqën tek pacientët që morën trajtimin për tetë vjet, ndërsa të tjerët, që morën trajtim për vetëm dy deri në tre vjet, nuk treguan përmirësime të dukshme.
Kjo sugjeron se terapia parandaluese mund të kërkojë vite trajtim përpara se dikush të zhvillojë simptoma që të jetë efektive.
Charles Marshall, profesor neurologjie klinike në Universitetin Queen Mary në Londër, e cilësoi studimin si “shumë emocionues”, por theksoi dy kufizime të studimit.
“Kufizimi i parë është se ishte një vlerësim dytësor i një numri relativisht të vogël njerëzish që u trajtuan për një kohë të gjatë, dhe prandaj rezultatet nuk janë aq të sigurta sa do të kishin qenë nëse do të ishin rezultatet kryesore të provës”.
“Kufizimi tjetër është se gantenerumabi nuk është aq efektiv sa disa nga trajtimet e tjera që reduktojnë amiloidin dhe që tani janë në dispozicion, duke sugjeruar se mund të arrijmë rezultate më të mira sesa ato që sugjerojnë këto rezultate”, shpjegoi ai.
Gantenerumabi u ndalua në vitin 2022 pasi dështoi të ngadalësojë simptomat e formave më të zakonshme të sëmundjes së Alzheimerit në një provë me mbi 1 mijë 900 pjesëmarrës.
Më shumë kërkime janë të nevojshme për të vlerësuar potencialin e ilaçeve anti-amiloid, kohëzgjatjen më të mirë të trajtimit dhe efektet e tyre tek format jo-gjenetike të sëmundjes, si dhe efektet anësore të mundshme.
Ilaçet anti-amiloid, janë lidhur me efekte anësore si abnormalitetet në skanime të trurit dhe ënjtje të lokalizuar. Ndërkohë që shumica e këtyre efekteve anësore zgjidhen vetë, disa mund të bëhen serioze.
“Në provë, dy pjesëmarrës detyruan të ndërpresin marrjen e ilaçit për shkak të efekteve anësore, por nuk pati efekte anësore që rrezikonin jetën”, thanë hulumtuesit.
Artikulli është publikuar fillimisht në Euronews, e më pas është përkthyer nga Albanian Post.
/Katror.info
Përgatiti:
