Sot është Dita Ndërkombëtare e Vullnetarëve dhe moto zyrtare e këtij viti është “Nëse secili do ta bënte…”
Më shumë se një miliardë vullnetarë në mbarë botën veprojnë për solidaritet dhe humanizëm për njerëzit dhe planetin. Dita Ndërkombëtare e Vullnetarëve është një ditë që nderon vullnetarët në mbarë botën dhe njeh vlerën e vullnetarizmit në paqe dhe zhvillim.
E natyrisht, kjo ditë festohet edhe nga Katror.info, si promovues kryesor i vullnetarizmit, aktivizmit e nismave qytetare që sjellin ndryshime pozitive në komunitetin e shoqërinë kosovare.
Mundesh me e lexu edhe…
Tema e DNV së këtij viti përqendrohet në fuqinë e secilit drejt veprimit kolektiv – nëse secili do të bënte diçka për komunitetin.
Nëse të gjithë do të ishin vullnetarë, bota do të ishte një vend më i mirë.
Mendoje më shumë se tetë miliardë prej nesh duke bërë vullnetarizëm. Mundësi të pakufishme për zhvillim të qëndrueshëm – ushqim dhe edukim për të gjithë, mjedis i pastër dhe shëndet i mirë për secilin, shoqëri gjithëpërfshirëse dhe paqësore, dhe më shumë.
Ndërsa bota mbledh mbështetje për t’u përballur me sfidat në rritje, janë vullnetarët ata që janë të parët që ndihmojnë. Vullnetarët janë në ballë në kriza dhe emergjenca, shpesh në situata shumë testuese dhe të rënda.
“Në këtë ditë të rëndësishme, le të angazhohemi të sigurojmë që të gjithë njerëzit të mund të japin energjitë e tyre për të formuar një të ardhme më të mirë për të gjithë njerëzit dhe planetin që ndajmë. Le të qëndrojmë me vullnetarët, kudo.” António Guterres, Sekretar i Përgjithshëm i Kombeve të Bashkuara.
Aktivitetet DNV po zhvillohen në mbarë botën, duke përfshirë shtatë ngjarje të nivelit të lartë të bashkëorganizuara nga qeveritë në Azerbajxhan, Bolivi, Irak, Irlandë, Tanzani, Tajlandë dhe Togo.
Nga karvani kombëtar i vullnetarizmit në Togo, tek aktivitetet e ndërgjegjshme për klimën e mbjelljes së pemëve në Azerbajxhan, tek udhëtimi me karrige me rrota të vullnetarëve me aftësi të kufizuara në Tajlandë – çdo ngjarje përforcon diversitetin e vullnetarizmit në mbarë globin.
Vendet dhe grupet vullnetare do të shënojnë frymën e vullnetarizmit së bashku me komunitetet, akademinë, organizatat që përfshijnë vullnetarë dhe agjencitë e OKB-së. Stafi Vullnetar i Kombeve të Bashkuara në selinë qendrore në Bon do të marrë pjesë gjithashtu në një aktivitet vullnetar për të shënuar DNV dhe për të demonstruar frymën e vullnetarizmit midis banorëve vendas.
“Sot u them të gjithë vullnetarëve anembanë globit: Faleminderit. Për zgjedhjen për të përmirësuar botën. Për të gjetur frymëzim për të vepruar. Për krijimin e zgjidhjeve. Për të mbajtur gjallë shpresat tona. Dhe për botën, mesazhi ynë është: Imagjinoni se çfarë mund të arrijmë nëse të gjithë bashkohen. Dhe dalin vullnetarë.” Toily Kurbanov, Koordinator Ekzekutiv, Vullnetarët e Kombeve të Bashkuara./Katror.info
Përgatiti:
