Në Tiranë u zhvillua sot ceremonia për nisjen e punimeve për ndërtimin e Teatrit të ri Kombëtar, pikërisht në vendin ku më shumë se dy vjet më parë u shemb godina e vjetër e tij. Projekti, është ai i prezantuar që në krye të herës, i realizuar nga arkitekti i njohur danez Bjarke Ingels.
Ndërtesa e re do të ketë formën e një fjongoje që ndan 3 hapësirat apo zonat funksionale të një teatri: zona ku ndërveprojnë vizitorët me të gjithë hapësirat e nevojshme si holli, black box; zona e përshtatur për ambientet administrative, teknike, dhe hapësirat e nevojshme për aktorët dhe lidhja e tyre me sallën kryesore. Përveç saj do të ketë dhe hapësira të tjera për shfaqje, me një total prej më shumë se 1500 vendesh.
Sipas kryeministrit Rama “ky projekt shkon përtej një Teatri Kombëtar të mirë për Shqipërinë. Ky projekt është një tjetër gur i çmuar në një gjerdan veprash që praktikisht e kanë nxjerrë Tiranën jashtë vetes, jashtë kornizës së vjetër të vetes dhe e kanë projektuar si një kryeqytet europian ku ndodhin dhe bëhen gjëra që tërheqin vëmendjen edhe të të tjerëve”.
Mundesh me e lexu edhe…
Nga ana e tij kryetari i Bashkisë së kryeqytetit u shpreh i bindur se godina e Teatrit të ri do të jetë më e bukura në Ballkan, ndërsa theksoi se ajo do të ngrihet “në tokën e vet, në territorin e vet, pa lëshuar asnjë centimetër, as privatit, as kujt tjetër. Sot kemi rënë dakord që Teatri do të ndërtohet me para publike dhe jo me partneritet”.
Drejtori i Teatrit Kombëtar, Altin Basha i pranishëm në ceremoninë e nisjes së punimeve për ndërtimin e Teatrit të ri Kombëtar tha se ky është një moment i rëndësishëm jo vetëm për artin dhe kulturën, por për gjithë shoqërinë shqiptare. Ai u shpreh se ka qenë dëshmitar i përpjekjeve të vazhdueshme të trupës së Teatrit Kombëtar, të cilët, siç thekson Basha, tek ajo godinë nuk gjenin mjetet për të bërë artin e tyre.
Sipas tij, ndërtimi i Teatrit të ri do t’i shërbejë jo vetëm artistëve aktualë, por edhe brezave të ardhshëm. Basha tha se ky është një moment për artin dhe kulturën shqiptare, por edhe për gjithë shoqërinë.
“Diskutimi për teatrin ka nisur që në vitet ’50. U deshën 70-80 vjet që dëshira e tyre të kishte një zgjidhje dhe kjo zgjidhje ishte më e mira e mundshme për një teatër të ri, një teatër të investuar me paratë e taksapaguesve. Ky teatër nuk i përket vetëm të tashmes, por edhe të ardhmes”, tha drejtori i Teatrit Kombëtar, Altin Basha./Katror.info
Përgatiti:
