Agjencia indiane e hapësirës ka publikuar fotot e para të Hënës të realizuara nga anija kozmike Chandrayaan-3, e cila hyri në orbitën Hënës të shtunën, shkruan BBC.
Fotot tregojnë kratere në sipërfaqen hënore, të cilat rriten në madhësi ndërsa anija kozmike i afrohet Hënës. Ateruesi dhe roveri janë planifikuar të prekin sipërfaqen më 23 gusht, dhe nëse kjo pjesë e misionit është e suksesshme, India do të bëhet vendi i parë që do të bëjë një “ulje të butë” të kontrolluar pranë Polit të Jugut. Gjithashtu, do të bëhet vetëm vendi i katërt që do të kryejë një “ulje të butë” në Hënë pas SHBA-së, ish-BRSS dhe Kinës.
Pasi u rrotullua rreth Tokës për dhjetë ditë, anija kozmike u dërgua në orbitë transhënore të martën e kaluar dhe hyri me sukses në orbitën hënore të shtunën.
Mundesh me e lexu edhe…
Agjencia Indiane e Kërkimeve Hapësinore (ISRO) tha se të gjitha kontrollet treguan se anija kozmike Chandrayaan-3 është në gjendje të mirë.
Gjithashtu u theksua se kjo është “hera e tretë radhazi që ISRO lëshon me sukses një anije kozmike në orbitën hënore”.
Shkencëtarët thonë se kjo anije kozmike, e treta në programin e eksplorimit hënor të Indisë, do të vazhdojë suksesin e misioneve të mëparshme hënore.
Ajo u nis 13 vjet pasi India kreu misionin e saj të parë hënor në 2008, i cili zbuloi praninë e molekulave të ujit në sipërfaqen hënore dhe vërtetoi se Hëna ka një atmosferë gjatë ditës.
Anija hapësinore Chandrayaan-2, e cila gjithashtu përmbante një orbiter, një tokëzues dhe një rover, u nis në korrik 2019, por ishte vetëm pjesërisht e suksesshme. Orbiteri vazhdon të qarkullojë dhe studiojë Hënën edhe sot, por ateruesi dhe roveri u shkatërruan gjatë uljes. ISRO analizoi me kujdes të dhënat e incidentit dhe kreu simulime për të korrigjuar gabimet përpara misionit Chandrayaan-3. Ky avion peshon 3900 kg dhe kushton 75 milionë dollarë. Ateruesi quhet VIkram sipas themeluesit të ISRO dhe peshon rreth 1500 kg dhe në “barkun” e tij mban roverin Pragyaan me peshë 26 kg.
Tani shkencëtarët do të fillojnë të zvogëlojnë shpejtësinë e anijes për ta sjellë atë në një pikë ku të jetë e mundur një ulje e butë e Vikram.
“Një seri manovrash janë planifikuar për të reduktuar gradualisht orbitën dhe pozicionin mbi polet hënore. Pas disa manovrave, do të kryhen një seri manovrash komplekse frenimi për të mundësuar një ulje të butë në rajonin e Polit të Jugut të Hënës më 23 gusht”, tha ISRO.
Kur të ulet, roveri i pajisur me gjashtë rrota do të lëvizë rreth shkëmbinjve dhe kratereve në sipërfaqen e Hënës dhe do të mbledhë të dhëna të rëndësishme që do të dërgohen në Tokë për analizë së bashku me fotografitë, shkruan Katror.info.
Roveri mban instrumente që do të hetojnë karakteristikat fizike të sipërfaqes hënore, atmosferën afër sipërfaqes dhe aktivitetin tektonik.
Poli i Jugut i Hënës është ende mjaft i paeksploruar, dhe zona që mbetet në hije është shumë më e madhe se ajo e Polit të Veriut. Shkencëtarët besojnë se ekziston mundësia e ekzistencës së ujit në vende që janë gjithmonë në hije. /Katror.info
Përgatiti:
