Eh, plakat po shkundën, ama edhe po na ftojnë me dal prej shpisë sepse kjo javë e prillit ka plot ngjarje tepër t’mira, me njerëz tepër t’mirë në vende tepër t’mira. Tepër, tepër mo… Ma s’pari e keni ekspozitën personale të Jetmir Idrizit me përvojat e tij underground prej rrugicave të Kosovës e të Berlinit në favellat braziliane, me fotografi që janë të mbushuna me jetë dhe pasion. Masnej e keni një duet ngjarjesh në Shqipni nga organizata e famshme Art Explora: hapja e projektit të artit kontemporan në ish-residencën e diktatorit Enver Hoxha dhe festivali artistik mesdhetar me ekspozita ne një anije në Durrës. Shkelzen Maliqi osht kurator i ekspozitës së piktorit të famshëm të ndjerë Daut Berisha në Hanin e Dy Robertëve, ndërsa galeria GOCAT në Tiranë po e ekspozon artistin Faton Kryeziu.
Në Gjilan, Fatos Berisha po sjellë premierë teatrale të shfaqjes së tij “God Bless America”, ndërsa në Prizren, Kino Lumbardhi po e mban një seminar interesant disaditor për marrëdhënien e qytetit me lum. Kino Armata në Prishtinë mysafir e ka regjisorin meksikan Tin Dirdamal me filma dhe punëtori.
Mundeni edhe me kcy ton natën në Zone me super eventin SUNRISE, ose në Soma me Sgamo.
Mundesh me e lexu edhe…
E krejt në fund, po ju rekomandojmë edhe teshat e Kaonë, t’mira si për netët e gjata n’club edhe ditët e gjata n’festival.
Qe pra. A ju thamë që kemi plot goodies për këtë Monday Marks!
Me pa: Ekspozita personale e Jetmir Idrizit / Galeria Kombëtare e Kosovës
Galeria Kombëtare e Kosovës me 10 prill e ka ekspozitën personale të artistit Jetmir Idrizi të titullume “Fuqia e dëshirës “, e kurume nga Camille Cousin. Jetmir Idrizin e kena dost por s’pe lavdojmë se e kena dost po se osht njani prej fotografëve ma të dallum nga Prishtina, i cili e ka ndërtu një karrierë nime të pasun përmes një vizioni të tij që fokusohet në rrëfimet njerëzore, identitetin dhe çashtjet sociale. Me një përvojë të gjatë si fotoreporter dhe një formim në gazetari, Jetko ka zgjedhë me ndjekë rrugën e fotografisë artistike dhe dokumentare, tu shku në vende e tu kap momente që pak kosovarë kanë guxu/mujt/dashtë. Një nga projektet ma të njohuna të tij, “TransBrasil”, i nisun në vitin 2015, eksploron jetën dhe identitetin gjinor të komunitetit transgjinor në Brazil. Ky cikël fotografik theu tabu, tu i dhënë një zâ dhe një fytyrë një komuniteti të margjinalizum, dhe u vlerësu me çmimin e parë në kategorinë “Fushatë” në Sony World Photography Awards në vitin 2016. Fotografia e tij karakterizohet nga ndjeshmëria, kompozimi i fuqishëm vizual dhe një qasje etike ndaj subjekteve që portretizon. Jeton mes Berlinit, Prishtinës dhe Buenos Airesit, tu vazhdu të prodhojë vepra që sfidojnë normat, frymëzojnë dialog dhe rikujtojnë se njerëzillaku osht thelbi i artit vizual.
Me përjetu: Festivali mesdhetar Art Explora / Tiranë dhe Durrës
S’po dijna qysh me ja nis me spjegu krejt këtë eksplozion aktivitetesh në Shqipni nga Art Explora? Kjo osht një organizatë e madhe evropianë qe promovon art e kulturë ne shumë forma. Në Tiranë, ish-residenca e Enver Hoxës në bllok “Vila 31” (ku osht e angazhume edhe shoqja jonë Nita Deda) po organizon Javën e Studiove të Hapura prej datës 9 deri më 13 prill për me festu hapjen e madhe të kësaj residence që tash ka fokus artin. Mundeni me zbulu këtë hapësinë të sapo rinovuar, me artistët e parë rezidentë dhe me një program aktivitetesh kulturore të hapura për të gjithë. E masnej në Durrës, nga data 10 deri më 21 Prill, mundeni me përjetu një program dinamik të kurum nga Arnisa Zeqo, (e aty e kemi edhe Rina Metën) me performanca, koncerte, poezi, punëtori dhe anijen-muze të parë në botë, ku ju presin përvoja unike si në anije ashtu edhe në port. Dmth SaBotaaaa…
Me pa: Ekspozita e punimeve të Daut Berisha / Hani i Dy Robertëve, Prishtinë
Ma s’miri po ju tregojmë çka po thotë kuratori Xeni Maliqi për këtë ekspozitë, që mbahet në Hanin e Dy Robertëve me 9 prill, në ora 19:00: “Nga piktorët modernistë kosovarë që karrierat artistike e kanë zhvilluar jashtë Kosovës, Daut Berisha (1946-2023) është ndër më të famshmit si emër por që, paradoksalish, vepra e tij nuk njihet pothuajse fare. Po kërkove informacione për artin e tij në publikimet e pakta të respektueshme për artin modern të Kosovës, mund të gjesh vetëm disa reprodukime të veprës “Triptik” të vitit 1980, dhe nga disa reprodukime nga i ashtuquajturi “Cikli blu”. Aty-këtu eventualisht gjenden edhe reprodukcionet e cilësisë të dobët të disa pikturave dhe skulpturave, si dhe shkrime dhe raporte gazetareske mbi ekspozitat në Francë ku jetonte dhe punonte prej vitesh… Falë bashkëpunimit me vëllaun e tij Arben Berishën, na u dha mundësia që të prezentojmë punët e hershme të Dautit, vizatimet dhe skicat, një sihariq përmes të cilit publiku i Kosovës do të mund të sheh hapat e tij të parë në krijimtari, kur hulumtonte dhe në mënyrë të padjallëzuar shpaloste talentin e tij.”
Me pa: Premiera teatrale “God Bless America” të Fatos Berishës / Teatri i Gjilanit
Hmmmm çfarë rrëfimi?! Fatos Berisha osht edhe autor edhe regjisor. Ngjarja? Qe e lexoni e hec e mos e këqyreni: “God Bless America është historia e katër shitësve të Biblës. Katër shokë, pasi marrin një trajnim nga një specialist shitjeje dhe adresa e sugjerime nga kisha se ku mund të shesin Biblën dhe materiale të tjera religjioze, shetisin në çdo shtet të Amerikës për të shitur Biblën dhe kështu të sigurojnë mireqenien familjare. Ata futen në shtëpitë e njerëzve dhe përpiqen, me metoda të ndryshme, t’i bindin ata të blejnë Biblën. Në rrugëtimin e tyre takojnë njerëz nga shtresa të ndryshme të shoqërisë dhe nuk kursejnë metoda për të shitur biblat. Në një mini-univers të xhunglës bashkëkohore të mbijetesës, ata udhëtojnë nëpër ‘vendin e mundesive – Amerikën’, duke u shtirur si “engjej” në punë dhe duke u shfrenuar në privatësinë e hoteleve dhe dhomave të tyre.” Premiera osht me datën 9 prill në Teatrin e Gjilanit.
Me marrë pjesë: Seminari “Lumbardhi 101” / Kino Lumbardhi, Prizren
Nuk rekomandojmë shpesh seminare, por programi i këtij na intrigoi, plus organizohet nga Lumbardhi. PLUS na nga qyteti pa lum xhelozojmë për qytetet që kanë lum. Seminari Lumbardhi 101: “Si të jetojmë në botën e lumit” zhvillohet më 11 dhe 12 prill në Kino Lumbardhi, dhe e mban në fokus jetën rreth lumit Lumbardhi në qytetin e Prizrenit. Qe pak intro për këtë ngjarje nga vetë organizatorët: “Për një kohë të gjatë, lumi Lumbardh ushqeu jetën, fuqizoi ekonominë dhe formësoi praktikat shoqërore e kulturore të qytetit. Sot, ai përballet me ndotje dhe neglizhencë, i shkëputur nga shoqëria. Lumbardhi 101 është një seminar eksplorues që e adreson këtë gjendje, duke sjell së bashku perspektiva nga ekologjia, urbanizmi, arti, gjuha dhe antropologjia për të ripërfytyruar lumin si një e përbashkët—jo thjesht si një burim, por si një hapësirë kujtese, lidhjeje dhe rigjallërimi. Përmes hulumtimit, dialogut dhe përvojave të ndara, synon të rilidhë banorët njerëzorë dhe jonjerëzorë me ujërat e Lumbardhit dhe të imagjinojë të ardhmen e tij të mundshme.” Super a po?
Me këqyr e me marrë pjesë: Punëtori me Tin Dirdamal dhe premiera e filmit të tij “Saigon. Kosovo” / Kino Armata, Prishtinë
Armata e ka një javë interesante me mysafir interesant. Tin Dirdamal osht një regjisor autodidakt dhe montazhier jo bash konvencional—i njohun për aftësinë me montu “filma të pamundur”. I lindun jo larg kufirnit SHBA-Meksikë, me studime formale në inxhinieri, Dirdamal e mat suksesin e filmave të tij sipas asaj se sa shumë arrin me braktisë gjatë procesit. Gjithashtu autodidakt në psikologji dhe arkitekturë, mjetet e tij ma të dobishme janë dyshimi dhe kontradikta. Në Armata vjen me një workshop me 8-9 prill (duheni mu regjistru), por edhe me shfaqje të filmave, prej të cilëve filmi i shkurtë “Saigon. Kosovo.” na la përshtypje. Veq lexojeni ngjarjen! “Një gru pëson një aksident në Prishtinë. Kur zgjohet, ajo flet vijetnamisht — një gjuhë që nuk e kishte folë kurrë. Një ushtar amerikan pëson një traumë në kokë gjatë një beteje në Luftën e Vietnamit dhe harron qysh me folë anglisht. Kjo është një histori dashurie mes njerëzve që nuk do të takohen kurrë.” Wow. Weird. Wonderful.
Me pa: Ekspozita “Life & Death” e Faton Kryeziu / Galeria GOCAT, Tiranë
GOCAT osht një galeri relativisht e re private në Tiranë, e hapun prej fondacionit Mane. Pranvera në galerinë GOCAT po ja nis me “LIFE & DEATH” – ekspozitën e parë në Shqipni të artistit kosovar Faton Kryeziu dhe Suzana Varvarica, kuratore. Sipas kuratores: “me ngjyra dinamike dhe tekstura të forta, Faton Kryeziu sjell një rrëfim të thellë mbi ciklin e jetës dhe vdekjes, duke ftuar publikun në një dialog përtej telajos. Në këtë ekspozitë, hapësira bashkëkohore e galerisë GOCAT shndërrohet në një udhëtim artistik ku drita dhe errësira, fillimi dhe fundi, takohen në një harmoni dinamike. Për piktorin Faton Kryeziu ‘Jeta dhe Vdekja’ është realiteti se gjithçka që ka fillim ka dhe fundin e vet.” Ekspozita hapet me 10 prill në ora 7.
Me kcy: SUNRISE x ZONE CLUB / Zone Club, Prishtinë
Kolektivi Sunrise po vjen me eventin e parë në Kosovë, ku tjetër pos në Zone.
Line-upi me Anite, Cap, Gescu, Herodot, Liburn pa dyshim që ka me majt skenën deri n’sunrise. Sunrise po thotë: “Na jena gjithmonë të lumtun me bo miq të ri dhe kujtime të mjegullume, prandaj na u bashkoni për debutimin tonë në Prishtinë, më 12 prill, në Zone Club, për një event me stil që do të mbyllet me disa nga talentët tanë më të mirë.” Sunrise it is!
Me kcy: Ndeje me SGAMO / Soma Book Station, Prishtinë
Soma Book Station ka diçka koxha speciale këtë javë! Të shtunën me 12 prill, prej orës 20:00. Me plot entuziazëm po fillojnë sezonin e ri tu mirëpritë njo prej DJ-ve ma të guximshëm dhe më të gjithanshëm të Italisë—SGAMO. Nga performancat në Boiler Room e deri te stejxhi Säule të Berghain, e deri te mix-et speciale në SiriusXM dhe NTS, SGAMO ka shtrirë kadal-dale por fuqishëm kufijtë e muzikës për kllabing në çdo drejtim. Përzgjedhjet e tij përziejnë afrobeat, baile funk, jersey club, rap, edit-e, perkusion të papërpunuar dhe kthesa të papritura. Soma po doket vend perfekt për qit kombinim. Shihemi te veni! Plus ata koktellaaa…
Mu vesh: Kaonë / Prishtinë
eshat e Kaonë janë një festë për sy dhe për shpirtin rebel urban. Koleksionet e saj i përkasin një bote ku ambëlsia takohet me guximin, ku sensualiteti vjen me një buzëqeshje të lehtë dhe një attitude “kqyrëm mirë se s’ki me m’harru”. Prerjet janë flirtuse, shpeshherë të zhveshuna aty ku duhet, ama kurrë banalisht, qysh dijmë me tepru kanihere.
Ngjyrat? Andërr! Nga pastelet e buta që t’i përkëdhelin sytë, e deri te neonët që bërtasin “shine! shine! shine!”, Kaone e din qysh me bo trupin me folë, pa thanë asnjë fjalë. Janë tesha që s’i blen veç për një darkë — ato dojnë me dalë nëpër netë urbane, me kcy nëpër festivale, me shkëly nën dritat e një nate të gjatë verore.
Marrë nga Suzanne Podcast.
Përgatiti:
