Ish-Presidentja e Kosovës dhe aktivistja, Atifete Jahjaga, ka ndarë përvojën dhe vizionin e saj mbi lidershipin gjithëpërfshirës në librin e sapobotuar “Mozaiku Indo-Paqësor: Siguria Gjithëpërfshirëse në Indo-Paqësor”, ku ka bashkëautorësuar kapitullin “Lidershipi për Paqe Pozitive: Transformimi i Shoqërive përmes Përfshirjes dhe Empatisë”, shkruan Katror.info.
Në këtë kapitull, Jahjaga analizon rëndësinë e lidershipit gjithëpërfshirës në trajtimin e padrejtësive sistemike, traumave shoqërore dhe krizave kombëtare. Ajo ndan përvojat e saj si presidente, duke theksuar përpjekjet për reforma institucionale dhe pajtim, me fokus në fuqizimin e zërave të margjinalizuar dhe luftën kundër stigmatizimit pas konfliktit.
“Empatia dhe përfshirja janë forca të fuqishme që shërojnë kombet, tejkalojnë ndarjet dhe sjellin paqen e qëndrueshme,” shprehet Jahjaga, duke vendosur në qendër të diskutimit rëndësinë e ndërtimit të shoqërive të qëndrueshme dhe të drejta përmes lidershipit vizionar.
Mundesh me e lexu edhe…
Kapitulli është bashkëautorësi me Roxane Turner dhe James M. Minnich, duke përfshirë gjithashtu kontributin e ish-kryeministres së Zelandës së Re, Jacinda Ardern. Publikimi përkon me 30-vjetorin e Qendrës Daniel K. Inouye për Studime të Sigurisë Azi-Paqësor dhe shërben si një platformë për ndarjen e mësimeve mbi lidershipin dhe ndërtimin e paqes në nivel global.
Jahjaga ka falënderuar gratë lidere të Kosovës, përfshirë Garentina Kraja, Zana Rudi, Jeta Krasniqi, Teuta Avdimetaj dhe Blerta Zeqiri, për kontributin e tyre të çmuar në pasurimin e këtij kapitulli, duke theksuar rolin e rëndësishëm të gruas në drejtimin e ndryshimeve pozitive.
Ky botim është një testament i përpjekjeve të figurave udhëheqëse të Kosovës për të promovuar paqen dhe përfshirjen, ndërsa përçon një mesazh të fortë për rëndësinë e liderëve që ndajnë vizionin e një shoqërie më të drejtë dhe të qëndrueshme./Katror.info
Përgatiti:
