Administrata Tatimore e Kosovës (ATK) ka rikujtuar të gjitha bizneset se, sipas legjislacionit tatimor, transaksionet me biznese fiktive dhe ato jo-aktive nuk njihen për qëllime tatimore, shkruan Katror.info.
Në një njoftim për media, ATK thekson se shpenzimet e raportuara në Deklaratën e Tatimit në të Ardhura dhe kërkesat për kreditim të TVSH-së, nëse bazohen në transaksione me biznese fiktive ose jo-aktive, nuk do të pranohen.
Po ashtu, ATK-ja ka bërë të ditur se do të përqendrojë aktivitetet e saj te bizneset që kryejnë transaksione fiktive dhe ato që operojnë në mënyrë të parregullt, duke ndërmarrë masat e nevojshme ligjore.
Mundesh me e lexu edhe…
Bizneset këshillohen që para realizimit të ndonjë transaksioni afarist të verifikojnë statusin e partnerëve të tyre përmes listës së tatimpaguesve jo-aktivë, e cila është publikuar në uebfaqen zyrtare të ATK-së: www.atk-ks.org.
Gjithashtu, ATK-ja thekson se çdo faturë apo transaksion fiktiv i identifikuar gjatë verifikimit të dokumentacionit, pavarësisht nëse biznesi është i publikuar në listën e ATK-së apo jo, nuk do të pranohet për qëllime të njohjes tatimore. Për këtë arsye, masa ligjore do të ndërmerren ndaj të dyja palëve të përfshira në transaksionin e pavlefshëm.
ATK rikujton bizneset se respektimi i dispozitave tatimore është detyrim ligjor dhe se përmbushja e këtyre obligimeve kontribuon drejtpërdrejt në përmirësimin e shërbimeve publike, sistemit arsimor, shëndetësisë dhe infrastrukturës në Kosovë./Katror.info
Përgatiti:
