Bordi i Drejtorëve Ekzekutiv të Grupit të Bankës Botërore ka miratuar një Hua të Dytë për Politikat e Rezistencës dhe Zhvillimit të Gjelbër (DPL) prej 120 milionë dollarësh për të mbështetur përpjekjet e Shqipërisë në forcimin e qëndrueshmërisë fiskale dhe promovimin e zhvillimit të gjelbër.
Ky financim shënon të dytin në një seri me dy operacione të krijuar për të ndihmuar vendin tonë që të rrisë qëndrueshmërinë fiskale dhe mjedisore.
Programi fokusohet në fusha kryesore si: forcimi i qëndrueshmërisë së sektorit qeveritar dhe familjeve; përmirësimi i kornizës së tregut të energjisë duke rritur energjinë e rinovueshme dhe efikasitetin e energjisë; mbrojtja e mjedisit dhe reduktimi i gjurmës së karbonit në Shqipëri.
Mundesh me e lexu edhe…
Ky program përputhet me Kornizën e Partneritetit të Vendit për VF2023-2027, duke përforcuar angazhimin e Bankës Botërore për zhvillimin e qëndrueshëm të Shqipërisë dhe përmirësimin e cilësisë së jetës për qytetarët e saj.
“Ne jemi të përkushtuar të mbështesim Shqipërinë në rrugëtimin e saj drejt një të ardhmeje më elastike dhe të qëndrueshme”, tha Richard Record, Ushtruesi i Detyrës së Menaxherit të Bankës Botërore për Shqipërinë. “Ky financim do të ndihmojë vendin të adresojë sfidat kritike në sektorin e energjisë dhe mbrojtjen e mjedisit, duke forcuar gjithashtu aftësinë e qeverisë për të menaxhuar rreziqet fiskale dhe për të mbështetur më mirë popullatat e cenueshme”.
Sipas Bankës Botërore, programi përputhet ngushtë me aspiratat e Shqipërisë për anëtarësim në Bashkimin Evropian, Programin e saj të Reformës Ekonomike 2024-2026 dhe angazhimet e saj për klimën sipas Marrëveshjes së Parisit 2015.
Masat kryesore përfshijnë forcimin e qëndrueshmërisë fiskale, rritjen e sistemeve të ndihmës sociale dhe avancimin e reformave në sektorin e energjisë, shton njoftimi zyrtar i BB-së.
Kuadri i politikës makroekonomike të Shqipërisë mbetet i shëndoshë, i karakterizuar nga deficite fiskale të menaxhueshme, borxhi publik në rënie, politika monetare e qëndrueshme dhe masa makroprudenciale./Katror.info
Përgatiti:
