Me rastin e Ditës Ndërkombëtare të Arsimit, Bashkimi Evropian (BE) ka rikonfirmuar angazhimin e saj për avancimin e sektorit të arsimit në Kosovë, përmes një komunikate të Zyrës së BE-së në Kosovë, shkruan Katror.info.
Që nga viti 2007, BE-ja ka investuar mbi 85 milionë euro në iniciativa që synojnë rritjen e cilësisë, aksesit dhe gjithëpërfshirjes së sistemit arsimor, duke mbështetur të gjitha komunitetet në Kosovë. Këto përpjekje synojnë të krijojnë mundësi të krahasueshme me standardet arsimore të vendeve të BE-së, duke kontribuar gjithashtu në zhvillimin ekonomik të bazuar në dije dhe krijimin e vendeve të reja të punës.
Mbështetja gjithëpërfshirëse e BE-së përfshin të gjitha nivelet e arsimit, nga edukimi i hershëm, arsimi bazë, e deri te trajnimi profesional dhe arsimi i lartë. Investimet e BE-së kanë ndihmuar në përmirësimin e infrastrukturës, forcimin e kornizës politike që qeveris arsimin, përmirësimin e materialeve mësimore dhe promovimin e mësimit digjital.
Mundesh me e lexu edhe…
BE-ja gjithashtu ka luajtur një rol kyç në përfshirjen e grupeve të cenueshme në sistemin arsimor, duke siguruar një qasje gjithëpërfshirëse dhe të barabartë për të gjithë.
Si pjesë e Programit për Punësim dhe Arsim, BE-ja ka mbështetur ndërtimin e objekteve të reja për Fakultetin e Shkencave Matematiko-Natyrore, me një investim prej 8.9 milionë euro. Për më tepër, janë financuar ndërtimi dhe rinovimi i mbi 20 shkollave, ndërsa përmirësimet në efikasitetin e energjisë në mbi 60 shkolla kanë ulur konsumin e energjisë deri në 30%, duke nënvizuar përkushtimin e BE-së ndaj qëndrueshmërisë dhe mbrojtjes së mjedisit.
Një ndër iniciativat më të rëndësishme është projekti “Mbështetja e Arsimit Bazë dhe të Mesëm të Lartë (KosEd)”, që fokusohet në zhvillimin e mësimdhënësve, përmirësimin e cilësisë së teksteve shkollore dhe rekrutimin. Ky projekt, i cili angazhon mbi 1,000 mësimdhënës, pritet të ndikojë drejtpërdrejt në 21% të shkollave të Kosovës deri në qershor të vitit 2025.
“Ky investim jo vetëm që ka përmirësuar infrastrukturën arsimore, por gjithashtu ka forcuar kornizën e politikave që qeveris arsimin në Kosovë, ka përmirësuar cilësinë e materialeve mësimore dhe teksteve shkollore, ka promovuar mësimin digjital dhe ka mbështetur përfshirjen e grupeve të cenueshme“, thuhet në bomunikatën e BE.
Në komunikatë përmenden edhe projekte të tjera të rëndësishme që kanë për qëllim përmirësimin e vazhdueshëm të sistemit arsimor në Kosovë. BE-ja mbetet një partner kyç në krijimin e kushteve arsimore që përmirësojnë jetën e nxënësve dhe kontribuojnë në një të ardhme më të ndritur për vendin./Katror.info
Përgatiti:
