Forcës së Sigurisë së Kosovës i shtohen edhe 344 djem dhe vajza, të cilët janë betuar si pjesë e gjeneratës 01/2025 dhe do të kontribuojnë në mbrojtjen e atdheut, shkruan Katror.info.
Pjesë e ceremonisë ishin edhe krerët e shtetit, duke përfshirë Presidenten, Vjosa Osmani dhe kryeministrin, Albin Kurti, të cilët shprehën mirënjohjen dhe urimet e tyre për rekrutët e rinj të Forcës së Sigurisë së Kosovës.
Në fjalën e saj, Presidentja Osmani tha se Kosova është e lirë falë sakrificës së dëshmorëve dhe martirëve, ndërsa e cilësoi ushtrinë jo vetëm si një forcë të armatosur, por edhe si një betim të përhershëm për mbrojtjen dhe sigurinë e vendit.
Mundesh me e lexu edhe…
“Sot është një ditë e veçantë për ju dhe për gjithë Republikën e Kosovës. 344 djem dhe vajza i bashkohen radhëve të FSK-së, duke u bërë pjesë e një misioni të shenjtë – mbrojtjes së atdheut, garantimit të sigurisë dhe mbështetjes së paqes brenda dhe përtej kufijve tanë,” deklaroi Osmani.
Presidentja nënvizoi gjithashtu orientimin e qartë të Kosovës drejt integrimeve euroatlantike, duke theksuar se vendi ka një ushtri të fortë dhe të denjë për të qenë pjesë e strukturave ndërkombëtare të mbrojtjes dhe sigurisë.
“Me profesionalizmin dhe përgatitjen e ushtarakëve tanë, po dëshmojmë se Kosova është e gatshme të kontribuojë për paqen dhe stabilitetin global,” tha ajo.
Ndërkaq, Kryeministri në detyrë i Kosovës, Albin Kurti, gjatë fjalës së tij në ceremoninë e certifikimit të rekrutëve të Forcës së Sigurisë së Kosovës, theksoi se ushtria e Kosovës po zhvillohet dhe fuqizohet çdo ditë e më shumë. Ai shtoi se gjatë mandatit katërvjeçar, qeveria ka dyfishuar numrin e ushtarëve të rinj dhe ka investuar në armatim luftarak.
“Mbështetja jonë do të jetë vazhdimësi e mbështetjes katër vjeçare që kemi bërë deri tani. Përgjatë këtij mandati kemi dyfishuar numrin e ushtarëve, kemi rekrutuar 2315 ushtarë të rinj të cilëve do të ju shtohen edhe 390 ushtarë të tjerë në muajt e ardhshëm, në total 2705 ushtarë. Kemi investuar në armatim në vlerë prej 319 milionë duke blerë dronët luftarak ‘Bayraktar’, sistemin raketor anti tank, dhe së shpejti do t’i kemi edhe helikopterët ‘Black Hawk’ (Skifterët e zi) në inventarin e ushtrisë. Kemi vendosur themelin e industrisë së mbrojtjes me fabrikën për prodhimin e municionit Made in Kosova, e të gjitha këto sipas standardeve të vendeve të NATO-s”, tha ai./Katror.info
Përgatiti:
