Në Kroaci, dje ka filluar bojkoti i planifikuar njëjavor i disa zinxhirëve të njohur të dyqaneve, përfshirë Lidl, Eurospin dhe dm, si dhe i tre produkteve specifike – Coca-Cola dhe pijeve të tjera me gaz, ujit në shishe dhe detergjentëve për enë.
Ky bojkot është organizuar nga platforma Halo, një lëvizje që ka bërë thirrje për ndërmarrjen e këtij veprimi si një reagim ndaj çmimeve të larta të produkteve të jetesës dhe për të kërkuar masa të tjera që mund të adresojnë këtë situatë. Platforma ka njoftuar se ky bojkot do të zgjasë për një javë, duke përfshirë edhe produkte të tjera që shiten në dyqane, dhe synon të dërgojë një mesazh të fortë ndaj kompanive që operojnë në treg, shkruan index.hr, përcjell Telegrafi.
Përveç bojkotit të zinxhirëve të dyqaneve, sot ka filluar një bojkot i përgjithshëm i të gjitha produkteve. Platforma Halo ka publikuar thirrje për të gjithë qytetarët, duke i inkurajuar ata që sot, më 31 janar, të mos blejnë asgjë, kudo që ndodhen.
Mundesh me e lexu edhe…
Sipas këtij bojkoti, konsumatorët janë të ftuar të shmangin çdo lloj shpenzimi, si në dyqane fizike ashtu edhe në ato online, për të dërguar një mesazh të qartë kundër çmimeve të larta dhe për të kërkuar masa që mund të përmirësojnë situatën ekonomike.
Ndërkohë, një grup qytetarësh nga Bosnja dhe Hercegovina, gjithashtu të pakënaqur me çmimet e larta të produkteve të jetesës, kanë nisur një bojkot të ngjashëm, i cili është caktuar të ndodhë po ashtu sot. Ky bojkot është pjesë e një proteste më të gjerë që ka për qëllim të ngrejë vetëdijen për çështje të tilla si inflacioni dhe rritja e kostove të jetesës, që po rëndojnë në mënyrë të konsiderueshme buxhetet e familjeve, shkruan klix.ba.
Në paralajmërimin e bojkotit, organizatorët kanë apeluar që të gjithë qytetarët të respektojnë këtë veprim dhe të shmangin çdo lloj shpenzimi në dyqane, furra, qendra tregtare, pompa benzine dhe restorante.
Ky bojkot, i cili është menduar si një hap konkret për të treguar pakënaqësinë ndaj politikave të çmimeve, ka marrë mbështetje të gjerë, duke përfshirë shumë grupe qytetarësh që kërkojnë ndryshime në politikën e çmimeve dhe një ndihmë më të madhe për të balancuar situatën ekonomike.
Ndryshe, javën e kaluar edhe në Mal të Zi janë bojkotuar për një ditë dyqanet e mëdha shkaku i rritjes së çmimeve./Katror.info
Përgatiti:
