Paneli Zgjedhor për Ankesa dhe Parashtresa (PZAP) ka dënuar disa nga partitë politike në Kosovë për shkelje të Kodit të Mirësjelljes dhe kjo po shihet nga analistë si një formë që mund të ngrisë standardin e gjuhës së përdorur gjatë fushatës zgjedhore në Kosovë.
PZAP ka njoftuar se ka dënuar me 20 mijë euro Lidhjen Demokratike të Kosovës, me tre mijë euro Lëvizjen Vetëvendosje dhe Aleancën për Ardhmërinë e Kosovës me 12 mijë euro për shkelje të “Kodit të Mirësjelljes” gjatë fushatës zgjedhore.
Lëvizja Vetëvendosje më 13 janar u ankua në PZAP se kandidatja për deputete nga LDK-ja, Xheneta Syka, ka publikuar video në Facebook ku e krahason kryeministrin Albin Kurti me nazistin Adolf Hitler.
Mundesh me e lexu edhe…
Për këtë arsye, më 15 janar, PZAP-ja e ka dënuar LDK-në me 20 mijë euro gjobë – e cila duhet të paguhet në afat prej 15 ditësh.
LDK-ja e ka kundërshtuar gjobën, duke thënë se është bërë nga një profil tjetër dhe jo nga kandidatja për deputete.
PZAP-ja ka konstatuar se videoja ishte postuar në profilin e Sykës, por ishte fshirë më pas. (Vendimi i PZAP-së)
Në vendimet e 15 janarit, PZAP-ja e ka dënuar kryeministrin Albin Kurti me tre mijë euro për gjuhën fyese që ka përdorur për LDK-në gjatë një tubimi në Pejë më 13 janar.
PZAP-ja e pranoi pjesërisht ankesën e LDK-së, duke konstatuar se Kurti ka përdorur gjuhë fyese dhe denigruese duke nxitur urrejtje ndaj kësaj partie kur gjatë tubimit u shpreh: “Prandaj, kur na rastis të dëgjojmë ndonjë udhëheqës të LËDËKYHIT që thotë se po i pëlqen populli, populli ka simpati për ta, kjo mi përngjan asaj mizës që thoshte kudo që po shkoj, po më presin me duartrokitje (ironizon me gjestikulacion dhe shprehje të pakontrolluara të ftyrës)….”. (Vendimi i PZAP-së)
Ndërsa, AAK-ja është dënuar me 12 mijë euro. Lëvizja Vetëvendosje është ankuar se kryetari i AAK-së, Ramush Haradinaj, ka drejtuar akuza të pabaza dhe të pavërtetuara kundrejt kryeministrit Albin Kurti, ashtu si edhe kandidati për deputet i AAK-së, Ardian Gjini. (Vendimi i PZAP-së)
Juristja e së drejtës së medias, Flutura Kusari në një postim në Facebook ka mirëpritur këto dënime, duke shfaqur shpresën se do të ngritët një standard i respektimit të Kodit të Mirësjelljes gjatë fushatës.
“Jam duke i përcjellë me shumë vëmendje vendimet e PZAP-it lidhur me lirinë e shprehjes gjatë fushatës zgjedhore. Këto vendime, megjithatë, do të krijojnë një lloj precedenti dhe standardi për të ardhmen në fushën e shprehjeve politike,” ka shkruar Flutura Kusari.
Ajo ka thënë se dënimi i LDK-së me 20,000 euro gjobë për shkak se një deputete e saj e ka krahasuar Albin Kurtin me Hitlerin është i drejtë dhe nuk duhet të ndryshohet.
“LDK duhet të paguajë dënim dhe të mësojë nga ky gabim. Asnjë politikan në Kosovë nuk duhet të krahasohet në asnjë formë me Hitlerin. Ky krahasim dhe kjo shprehje nuk është liri e shprehjes, është abuzim me lirinë e shprehjes,” është shprehur ajo.
Sipas Kusarit, njëjtë, të gjithë gazetarët, komentatorët apo të tjerët që flasin publikisht dhe që e krahasojnë këdo nga poliitkanët me Hitlerin meritojnë të japin përgjegjësi ligjore për abuzim me lirinë e shprehjes./Katror.info
Përgatiti:
