E përditësuar 12:35
Seanca konsitutive e Kuvendit të Kosovës u ndërpre pasi që nuk u arrit që të kalojë raporti për verifikimin e mandateve. Duke marrë parasysh këtë, kryesuesi i Kuvendit të Kosovës, Avni Dehari, tha se “detyrohemi të ndërpresim seancën dhe me letër t’i kërkojmë presidentes se si të veprojmë në të ardhmen”.
E përditësuar 12:15
Mundesh me e lexu edhe…
Deputetët e Kuvendit të Kosovës nuk e kanë votuar raportin e Komisionit të përkohshëm për verifikimin e mandateve dhe kuorumit.
Komisioni i përkohshëm para deputetëve paraqiti raportin dhe kërkoi që ai të votohej, me qëllim që të verifikoheshin mandatet 120 deputetëve të zgjedhur më 9 shkurt, në bazë të listës së certifikuar nga Komisioni Qendror i Zgjedhjeve.
Deputetët e LVV-së dhe të Nismës Socialdemokrate kanë votuar për raportin. Kundër ishin ata të PDK-së, LDK-së dhe AAK-së.
“Pesëdhjetë e dy deputetë kanë votuar për, 46 kundër dhe 11 kanë abstenuar. Në bazë të kësaj, konstatojmë se raporti i Komisionit të përkohshëm nuk kalon”, tha kryesuesi i seancës.
Kryesuesi i seancës ftoi përfaqësuesit e subjekteve politike që të konsultohen, duke bërë që Kuvendi sërish të shkojë në pauzë.
Krasniqi: S’mund të votojmë raportin nëse anëtarët e Qeverisë s’japin dorëheqje
Kryetari i PDK-së, Memli Krasniqi, tha se nuk mund ta votojnë raportin e Komisionit për verifikimin e mandateve, pasi ai është “jokushtetues”.
“Kushtetuta e thotë qartë se nuk mund të bëhesh deputet nëse je kryeministër apo ministër”, tha Krasniqi, duke shtuar se deputetët e zgjedhur të LVV-së – që aktualisht janë pjesë e Qeverisë në detyrë – duhet të japin dorëheqje sepse s’mund të mbajnë të dy postet.
“Kjo mund të zgjidhej lehtë nëse ata japin dorëheqje”, tha Krasniqi.
E përditësuar 12:00 Deputetët kthehen në seancë
Pas pauzës po vazhdon seanca konstituive e Kuvendit të Kosovës.
Seanca konstituive e Legjislaturës së IX të Kuvendit të Republikës së Kosovës, e dalë nga zgjedhjet e 9 shkurtit, shkoi për 15 minuta në pauzë, në mënyrë që Komisioni për verifikimin e mandateve të deputetëve t’i verifikojë mandatet e deputetëve.
E përditësuar 11:27 – Nis seanca konstituive e Kuvendit të Kosovës
Seanca konstituive e Kuvendit të Kosovës ka nisur, pas një ore vonesë.
Seanca po kryesohet nga Avni Dehari – deputeti më i vjetër në moshë – së bashku me deputeten Sala Jashari, që është deputetja më e re në moshë e legjislaturës së nëntë.
Partitë e përfaqësuara në Kuvendin e Kosovës kanë propozuar emrat e tyre për anëtarë të Komisionit të përkohshëm për verifikimin e kuorumit dhe të mandateve të deputetëve.
Ky komision udhëhiqet nga LVV-ja, partia fituese e zgjedhjeve.
Formimi i këtij komisioni është pika e parë e rendit të ditës të seancës konstituive të Kuvendit.
Në sallë janë të pranishëm 119 deputetë, të cilët votuan për krijimin e këtij komisioni të përkohshëm.
Pas formimit të Komisionit të përkohshëm për verifikimin e mandateve dhe kuorumit, seanca plenare shkoi në pauzë 15-minutëshe, në mënyrë që ky komision të mund të përpilojë raportin e tij, i cili më pas duhet të miratohet./REL
***
Sot seanca konstituive e Kuvendit të Kosovës – çfarë pritet të ndodhë?
Kuvendi i Kosovës mban sot, më 15 prill 2025, seancën konstituive të legjislaturës së nëntë, duke shënuar hapin e parë drejt formimit të institucioneve të reja pas zgjedhjeve të fundit parlamentare të mbajtura me 9 shkurt.
Seanca do të zhvillohet në sallën plenare të Kuvendit të Kosovës, me fillim nga ora 10:00. Fillimisht do të bëhet formimi i një komisioni të përkohshëm për verifikimin e kuorumit dhe mandateve të deputetëve. Ajo do të kryesohet nga deputeti më në moshë, i cili do të ndihmohet nga më i riu. Më pas në rend të ditës do të jetë betimi i deputetëve. Pika e tretë do të jetë zgjedhja e kryekuvendarit e pika e katërt zgjedhja e nënkryetarëve të Kuvendit.
Kryesuesi i seancës, pas hapjes dhe paraqitjes së rendit të ditës, kërkon nga subjektet politike që të caktojnë nga një deputet në Komisionin e Përkohshëm që do të merret me verifikimin e kuorumit dhe të mandateve.
Pas verifikimit deputetët me ftesën e kryesuesit betohen solemnisht.
Më pas në rend të ditës për seancën konstituive është zgjedhja e kryetarit dhe e nënkryetarëve të Kuvendit.
Kryetari i Kuvendit propozohet nga grupi më i madh parlamentar dhe ai zgjidhet me shumicën e votave të të gjithë deputetëve të Kuvendit.
Kuvendi konsiderohet i konstituuar me zgjedhjen e kryetarit e pesë nënkryetarëve të tij, dy prej të cilëve janë nga komunitetet.
Ndërprerjet gjatë seancës konstituive nuk mund të jenë më të gjata se 48 orë.
Albin Kurti, kryetar i partisë fituese të zgjedhjeve të 9 shkurtit, Lëvizja Vetëvendosje, ka deklaruar se synon që në seancën konstituive të votohet edhe Qeveria e drejtuar nga ai.
Por, deri të hënën, Vetëvendosje e Kurtit nuk e ka të sigurt mbështetjen e 61 deputetëve, aq sa nevojiten së paku për zgjedhjen e kryekuvendarit dhe për votimin e Qeverisë.
Aktualisht nga 61 votat e nevojshme për konstituimin e Kuvendit, Vetëvendosje ka 56 sosh të konfirmuara. 48 nga deputetët e saj dhe tetë të tjerë nga komunitetet joshumicë.
Marrëveshje me Vetëvendosjen për zgjedhjen e kryekuvendarit e edhe të qeverisë ka mohuar se ka kryetari i Nismës Socialdemokrate, Fatmir Limaj.
Në Kuvend partia e Limajt i ka të siguruara tri ulëse.
“Nisma nuk ka marrëveshje me askënd deri më sot dhe është e gatshme dhe do të punojë fort që Kosova t’i ketë institucionet, të mos shkojë në krizë parlamentare, por ne s`kemi asnjë marrëveshje me asnjë grupim politik”, ka thënë Limaj.
Limaj ka paralajmëruar se zhvillimet në lidhje me bashkëpunimet eventuale do të merren vesh të martën, derisa është shprehur i gatshëm për bashkëpunim me këdo që i ofrohet.
Deklarimet e Limajt për bashkëpunim me Lëvizjen Vetëvendosje, ndarje të turpshme i ka konsideruar bashkëpunëtori i tij nga koalicioni, kryetari i AAK-së, Ramush Haradinaj.
“Ne e votojmë kandidatin për kryetar të Kuvendit. Kuptohet do të bëjmë konsulta të ndërsjella edhe me partitë e tjera opozitare, me PDK-në dhe LDK-në. Po besoj që konstituimi i Kuvendit është interes i të gjithëve e më pastaj pra, sikurse ju e dini, AAK-ja angazhohet dhe punon që qeverinë ta krijojë opozita në rast të pamundësisë ose moskrijimit nga pozita. S’kam komunikim nga intervista e fundit e famshme e z. Limaj. Ka qenë shumë e vështirë, pra krijimi i shumicës nga opozita vetvetiu pozicionimi i tij i hershëm e ka bërë edhe ma të vështirë dhe nëse Nisma e Limaj mbështesin pushtetin kuptohet që ata ndahen nga ne.”
Ndryshe nga AAK-ja, nga PDK-ja janë shprehur se nuk do ta votojnë as kryetarin e Kuvendit.
Deputeti i Partisë Demokratike të Kosovës, Mërgim Lushtaku, ka thënë se ky grup parlamentar nuk do të marrë pjesë në votim derisa nuk ka zgjedhje “të qëndrueshme” për Kosovën. Ai ka bërë thirrje për partitë e tjera politike që t’i mbajnë premtimet dhe mos ta mundësojnë formimin e qeverisë “Kurti 3”.
Ndërkohë votë për kandidatin e Lëvizjes Vetëvendosje për kryetar të Kuvendit e edhe për formimin e Qeverisë kanë premtuar një pjesë e komuniteteve joshumicë.
Në Kuvend do të jenë 48 deputetë të LVV-së, 24 të PDK-së, 20 të LDK-së, 8 të koalicionit AAK-Nisma dhe 20 të komuniteteve./Katror.info
Përgatiti:
