Drenusha Krasniqi Vanmeter, aktiviste e njohur e komunitetit shqiptaro-amerikan në Boston të SHBA-së, ka mobilizuar rrjetin e Bibliotekës Publike të Bostonit, duke mundësuar dhurimin e një sasie të madhe librash të cilët do të dërgohen në Bibliotekën e Fëmijëve në Prishtinë, shkruan Katror.info.
Drenusha, e lindur dhe e rritur në Prishtinë, ka kaluar një udhëtim të jashtëzakonshëm për t’u shpërngulur në SHBA, ku fitoi një bursë të plotë për të studiuar shkencat. Që nga viti 2021, ajo ka qenë studiuese në Spitalin e Syve dhe Veshëve të Harvardit dhe së fundmi është pranuar në Kolegjin e Mjekësisë Cleveland Clinic Lerner (CCLCM), një ndër më prestigjiozet në botë.
Përveç angazhimit të saj të shkëlqyer në fushën e neuroshkencës dhe oftalmologjisë, Drenusha ka një përkushtim të thellë ndaj drejtësisë sociale. Ajo themeloi organizatën “Beyond the Shadows”, e cila mbështet të mbijetuarit e dhunës seksuale gjatë luftës në Kosovë. Tani, ajo është duke punuar për të krijuar ura lidhëse mes bibliotekave të Bostonit dhe Prishtinës.
Mundesh me e lexu edhe…
Ky projekt është një tjetër dëshmi e përkushtimit të Drenushës për të dhënë një kontribut të vyer dhe për të ndihmuar shoqërinë përmes arsimit dhe librave. Ajo, së bashku me një ekip vullnetarësh të angazhuar, ka arritur të mbledhë libra nga biblioteka të ndryshme dhe t’i dërgojë për fëmijët e Prishtinës, duke u mundësuar atyre mundësi për të zgjeruar horizontet e tyre.
Dhurimi i librave për Bibliotekën e Fëmijëve në Prishtinë është një tjetër shembull i fuqisë së bashkëpunimit dhe solidaritetit ndërmjet dy komuniteteve./Katror.info
Përgatiti:
