Dua Lipa është dhjetë muaj larg për t’i mbushur të 30-at, dhe sikur të jetojë 100 vjet, dyshoj se do të ketë mundësi të performojë në një sallë aq spektakolare sa ajo në “Royal Albert Hall” në Londër. Efekti është i dukshëm ende pa zbarkuar në skenë ylli i muzikës disco/pop me prejardhje nga Kosova. Salla është shndërruar në një arenë luksoze për këtë natë. Një vendkalim i ndërtuar me porosi përshkon qendrën e vendit të ngjarjes, duke u endur rreth bashkëpunëtorëve të Lipës për këtë mbrëmje – orkestra “Heritage” prej 53 instrumentistëve, një kor prej 14 personash dhe bendi me shtatë anëtarë. Si pamje, gjithçka të lë pa frymë.
Mund të argumentohet se e gjithë ngjarja është një madhështi që i përshtatet reputacionit në rritje e sipër të Lipës si një nga artistet më të mëdha në skenën e muzikës pop. Viteve të fundit ka lansuar hite të pozicionuara në vendin e parë të top listave, ka marrë çmime të mëdha të industrisë dhe në muajin qershor e kryesoi skenën e festivalit prestigjioz “Glastonbury”. “Royal Albert Hall” megjithatë, është një eksperiencë krejtësisht e re për Duan, shkruan the Independent.
“Çfarë ëndrre të jesh këtu. Ky është një shou krejt ndryshe nga ata që kam realizuar më herët”, tha këngëtarja në fillim të performancës, dhe nuk e ka gabim.
Mundesh me e lexu edhe…
E veshur me fustan ngjyrë të kuqe mbretërore nga marka “Jean Paul Gautier”, aq i përshtatshëm për skenën që i ngjanë një piste të modës, ky është një shou ku përplasen e vjetra dhe e reja: një moment i denjë për çdo primadonë madhështore sikurse Lipa, përcjell koha.
Mirëpo, në skenë mungojnë valltarët e shumtë në numër, që i kanë karakterizuar performancat live të Lipës deri më sot.
“Nuk i kam valltarët e mi këtu sonte dhe më duhet ta them, po më mungojnë paksa”, tha këngëtarja me shaka.
Gjatë këngëve që e hapën koncertin të cilat erdhën të përziera, nga “End Of An Era” dhe “Houdini”, pjesë e albumit të saj të tretë “Radical Optimism” – plotësia e orkestrës rrezikon të mbulojë zërin e saj. Lipa përpiqet të shfrytëzojë sa më mirë hapësirën e madhe të sallës, duke ecur përgjatë pistës së lakuar me plot elegancë, e në një momemt duke u ngjitur mbi piano. Por ajo kalon shumicën e natës duke qëndruar në qendër të skenës, duke bërë disa lëvizje modeste kërcimi me një lloj ngurtësie të kujdesshme. Shumë më dinamik është Ben Foster, që drejton orkestrën me plot entuziazëm dhe kamerat e shumta që lëvizin përreth dhe mbi skenë.
Këngët e Lipas janë krijuar për të argëtuar, por “Royal Albert Hall” nuk është në të vërtetë sallë vallëzimi. Megjithëkëtë publiku e bën të pamundurën për të lëvizur me tingujt e muzikës. “Levitating”, “Maria”, “New Rules”, “Dance The Night Away”, “Be the One”, “Don’t Start Now”, janë disa prej këngëve që Dua i performoi plot energji. Zëri i saj shkonte duke u forcuar gjatë mbrëmjes dhe shkëlqeu vërtetë në momente si hiti “Falling Forever” nga albumi i fundit “Radical Optimism”.
Ndërsa performanca shkon drejt klimaksit, nuk mund të mos ndihesh i tërhequr nga ajo. Kur ikona Elton John i bashkohet Lipas në skenë për interpretimin e hitit të tyre të përbashkët dhe plot ritëm, “Cold Heart” – atmosfera triumfon. Muzikantit John, i cili qëndron i ulur gjatë performancës, i duhen disa sekonda për të gjetur tonin e tij por shpejtë i del në pah zëri i fuqishëm.
Pjesëmarrja e tij në koncert është një shenjë e rëndësisë së rastit: një mysafir i kategorisë së tillë nuk u shfaq as gjatë performancës së Lipas në skenën “Pyramid” të festivalit më të madh në Mbretërinë e Bashkuar “Glastonbury”. E si mund ta tejkalosh një paraqitje nga vetë Rocket Man? Por Lipa, e veshur tani me një fustan të zi elegant “Chanel”, e gjen mënyrën për ta bërë këtë, duke sjellë në skenë valltarët e saj për një interpretim energjik të këngës “Dance The Night”, kolona zanore e realizuar nga këngëtarja për filmin e vitit të kaluar të “Barbie”, e cila asnjëherë më parë nuk ishte interpretuar live.
Ndërsa “konfeti” bie nga tavani në tingujt hitit “Don’t Start Now” të orkestruar mjaft bukur, salla “Royal Albert Hall” duket se përfundimisht është skena e Dua Lipës. Përkundër të gjitha sfidave të paparashikuara, por gjithmonë falë vullnetit dhe qëllimit të mirë, ajo ka bërë që gjithçka gjatë mbrëmjes të funksionojë./The Independent
Përgatiti:
